Gi den Galasiasma

2 Baka 14 yari mi nanga Barnabas go baka na Yerusalem èn mi tyari Titus go tu. 2 Mi go fu di Masra sori mi taki mi musu go èn mi ferteri den a bun nyunsu di mi e prati gi den trakondre sma. Ma na soso den brada di e teki fesi na ini a gemeente mi ferteri, fu di mi no ben wani taki a wroko di mi e du noso di mi ben du, ben o de fu soso. 3 Titus di ben de nanga mi na wan Grikisma, ma tòg nowan sma ben dwengi en fu besnèi.* 4 Na den sma di ben du leki den na brada, ben wani disi. Kibrikibri den ben boro kon na ini a gemeente fu si fa wi, di de wán nanga Krestes Yesus, de fri. Bika den ben wani meki wi tron srafu fu a Wet baka. 5 Ma wi no saka wisrefi na ondro den man disi, nôno, wi no du dati srefsrefi. Na so den tru leri di unu kon sabi nanga yepi fu a bun nyunsu kan tan nanga unu.

6 Kande a gersi leki den man disi prenspari, ma fu taki en leti, den man disi no ferteri mi nowan nyun sani. Iya, gi mi a no abi trobi sortu sma den ben de, bika Gado no e si sma leki fa libisma e si den. 7 Na presi fu dati, den kon si taki mi kisi a frantwortu fu ferteri a bun nyunsu na den sma di no besnèi, neleki fa Petrus kisi a frantwortu fu ferteri a bun nyunsu na den sma di besnèi. 8 Bika a sma di gi Petrus a wroko fu de wan apostel gi den sma di besnèi, ben gi mi a wroko tu fu de wan apostel gi den trakondre sma. 9 Di den si taki Gado sori mi bun-ati, dan Yakobus, Seifas* nanga Yohanes, di sma ben e si leki stonfutu fu a gemeente, seki anu nanga mi èn nanga Barnabas. Den ben agri taki wi ben o go na den trakondre sma, ma den ben o go na den sma di besnèi. 10 A wan-enkri sani di den aksi wi na fu hori den pôtiwan na prakseri. Mi du bun furu muiti fu du dati tu.

11 Ma di Seifas* kon na Antiokia mi pir’ai gi en, bika ala sma ben si taki a ben e du wan sani di no bun. 12 Fosi a ben gwenti nyan nanga den trakondre sma. Ma di son sma fu Yakobus doro, a no du dati moro èn a no ben e bemui nanga den srefi, fu di a ben frede den sma di besnèi. 13 Den tra Dyu bigin hoigri tu leki en èn srefi Barnabas ben hoigri leki den. 14 Ma di mi si taki den no ben e du san den tru leri fu a bun nyunsu e sori, dan leti na fesi den alamala mi taigi Seifas:* „Efu yu na wan Dyu, ma yu e libi leki den trakondre sma èn no leki fa den Dyu e libi, dan fu san ede yu wani taki den trakondre sma musu libi leki fa den Dyu gwenti?”

15 Wi gebore leki Dyu èn wi no de leki den trakondre sma di de sondari. 16 Wi sabi taki Gado e si wan sma leki wan ret’ati sma, soso te a e bribi na ini Yesus Krestes èn no te a e du san a Wet e taki. Sobun, wi e bribi na ini Krestes Yesus, so taki a no a Wet, ma na a bribi di wi abi na ini Krestes kan meki taki Gado si wi leki ret’ati sma. Bika a no te wan sma e du san a Wet taki, dan Gado o si en leki wan ret’ati sma. 17 Ma efu wi e du muiti fu Gado si wi leki ret’ati sma nanga yepi fu Krestes èn tòg a de so taki wi na sondari, dan disi wani taki dati Krestes e gi wi dek’ati fu sondu? Noiti! 18 Bika efu mi e go bow den srefi sani baka di misrefi ben broko puru, dan mi e sori taki mi na wan sma di no e du san a Wet taki. 19 Fu di mi du san a Wet taki, meki mi kon fri fu a Wet so taki mi kan libi gi Gado. 20 Den spikri mi na wan postu nanga Krestes. A no mi e libi moro, ma na Krestes e libi èn a de wán nanga mi. Iya, a libi di mi e libi now leki libisma, na fu di mi e bribi na ini a Manpkin fu Gado di lobi mi èn di gi en libi fu mi ede. 21 Mi no e si a bun-ati fu Gado leki wan soso sani.* Bika efu na a Wet e meki wan sma tron wan ret’ati sma, dan Krestes dede fu soso.