Odo
26 Neleki fa snew no e fadon na dreiten èn neleki fa alen no e fadon na a kotiten,
na so a no fiti taki wan donsma e kisi glori.
2 Leki fa wan fowru no e frei gwe fu soso èn leki fa wan zwaluw-fowru no e frei lontu fu soso,
na so sma no e fluku wan trawan fu soso.*
3 Wan wipi na fu naki wan asi, wan t’tei na fu poti na ini a mofo fu wan buriki
èn wan tiki na fu naki den donsma na tapu den baka.
5 Ma te yu e piki a donsma, dan tyari a don fu en kon na krin,
so taki a no denki taki a koni.
6 Te wan sma e meki wan donsma luku den afersi fu en,
dan a de leki wan sma di e malengri en eigi futu èn di e gi ensrefi mankeri.*
7 Den odo di e kmoto na ini a mofo fu wan donsma
de leki den malengri futu fu wan sma di lan.
8 Fu gi glori na wan donman,
de leki te yu e tai wan ston na wan slinger.
9 Wan odo di e kmoto na ini a mofo fu wan donsma
de leki wan makabon na ini na anu fu wan drunguman.
10 Wan sma di e yuru wan donman noso iniwan sma di e waka psa,
de leki wan sma di e sutu en peiri go na tapu ala sani.*
11 Leki wan dagu di e drai go baka fu nyan en eigi braak,
na so wan donsma e du den don sani fu en ala leisi baka.
12 Yu si wan man di denki taki a koni?
Moro howpu de gi wan donman, leki gi a sma dati.
14 Leki fa wan doro e drai opo èn a e tapu baka,
na so wan lesiman e drai na tapu en bedi.
15 A lesiman poti en anu na ini a komki nanga n’nyan,
ma a weri tumsi fu tyari en anu go na en mofo.
16 Wan lesiman denki taki a koni moro seibi sma di e gi wan bun piki.
17 Wan sma di e waka psa èn di e kisi bigi atibron fu* wan trobi na mindri trawan,
de leki wan sma di e grabu den yesi fu wan dagu hori.
18 Leki wan lawman di e sutu faya peiri di kan kiri sma,
19 na so wan man de di e meki grofu spotu nanga trawan èn di e taki: „Na wan grap mi ben e meki!”
20 Pe udu no de, wan faya e dede.
Pe ogr’ati leiman no de, trobi e kon kowru.
21 Leki fa krofaya nanga udu e meki wan faya kon moro bigi,
na so wan man di lobi hartaki kan meki wan trobi kon moro bigi.
22 Den sani di wan ogr’ati leiman e taki de leki switi sani di sma e swari
èn di e saka go te na ini den bere.
24 Wan sma di e teige wan trawan kan taki switi nanga en,
ma na ini en ati a lai nanga triki.
26 Aladi a e kori trawan fu no meki den sabi taki a e teige den,
tòg a takru fasi fu en o kon na krin na fesi ala sma.
27 A sma di e diki wan olo, o fadon go na ini.
A srefi ston di wan sma e lolo gwe, o lolo kon baka èn a o masi en.
28 Wan leimofo sma e teige den sma di a e pina nanga den lei fu en.
Wan sma di e taki switi fu kori trawan e pori sma libi.