Gi den Filipisma
2 Efu unu e gi makandra deki-ati leki Kresten, efu unu e trowstu makandra fu di unu abi lobi, efu unu e sori taki unu e broko un ede nanga makandra èn efu unu abi trutru lobi nanga sari-ati gi makandra, 2 dan unu e meki a prisiri fu mi kon moro bigi, fu di unu abi a srefi denki nanga a srefi lobi, fu di unu de wán trutru èn unu abi wán denki. 3 No strei nanga makandra èn no prakseri tumusi furu fu unsrefi, ma abi sakafasi èn si trawan moro hei leki unsrefi. 4 No poti prakseri na un eigi afersi nomo, ma poti prakseri na den afersi fu trawan tu.
5 Tan abi a srefi denki di Krestes Yesus ben abi tu. 6 Aladi a ben de leki fa Gado de, toku a no prakseri fu teki a makti fu en abra nanga tranga fu kan de a srefi leki Gado. 7 Nôno, ma a gowe libi ala san a ben abi. A kon de leki fa wan srafu de èn a tron wan libisma. 8 Ma a du moro leki dati srefi. Di a tron wan libisma, a saka ensrefi èn a gi yesi na ini ala sani. Iya, a gi yesi srefi di a ben musu dede na wan pinapostu. 9 Na fu dati ede Gado poti en moro hei tu leki fa a ben de kaba èn a gi en wan nen di bigi moro ibri tra nen. 10 Na so ala den wan di de na hemel, den wan di de na grontapu, nanga den wan di de na ondro gron, ben o boigi den kindi na ini a nen fu Yesus. 11 Ala sma ben o taki krin dati Yesus Krestes na Masra èn na so Gado a Tata o kisi glori.
12 We, mi lobiwan, di mi ben de nanga unu, unu ben e gi yesi na Gado ala ten, ma now di mi no de nanga unu, unu de klariklari fu gi yesi na Gado moro srefi. Sobun, nanga frede èn nanga beifi un musu tan meki muiti fu kisi frulusu, 13 bika Gado na a sma di e gi un krakti. A e gi unu a firi nanga a krakti fu du sani di e plisi en. 14 Tan du ala sani sondro fu krutukrutu èn sondro fu haritaki nanga sma, 15 so taki sma no man feni fowtu na un tapu èn taki unu kan de sma di no e du nowan ogri. Iya, unu kan de pikin fu Gado di e tyari densrefi na wan fasi di fiti na mindri den ogri sma fu a ten disi di e du kruktudu. Na ini a grontapu disi unu de leki sma di e skèin leti. 16 Tan hori steifi na a wortu di e gi libi, so taki na a dei fu Krestes mi kan prisiri srefisrefi, fu di mi sabi taki mi no lon fu soso, noso wroko tranga fu soso. 17 Ma srefi te mi e gi misrefi leki wan dringi-ofrandi di kanti trowe na tapu na ofrandi fu yu, toku mi breiti èn mi e prisiri makandra nanga un alamala. Na bribi meki taki unu tyari den sortu ofrandi dati èn taki unu e du a wroko fu Gado. 18 We, na so un musu breiti èn prisiri tu makandra nanga mi.
19 Ma mi howpu taki, efu Masra Yesus wani, mi kan seni Timoteyus kon na unu heri esi, so taki mi kan kisi deki-ati te mi yere fa a e go nanga unu. 20 Mi no abi nowan tra sma di e denki leki fa en e denki èn di o sorgu trutru gi den sani di abi fu du nanga unu, 21 bika ala den trawan e suku den eigi bun. Den no e suku a bun fu Krestes Yesus. 22 Ma unu sabi taki a ben sori krin kaba sortu sma a de, taki neleki wan pikin nanga en papa, a wroko tranga nanga mi fu meki a bun nyunsu go na fesi. 23 Sobun, en na a sma di mi howpu fu seni kon, so esi leki mi sabi fa sani o waka nanga mi. 24 Iya, mi sabi taki efu Masra wani, dan mi srefi o kon heri esi tu.
25 Ma mi feni taki a de fanowdu fu seni mi brada Epafroditus kon na unu baka. A ben e wroko makandra nanga mi èn a ben e strei tu makandra nanga mi. Unu ben seni en kon na mi leki futuboi fu yepi mi nanga den sani di mi abi fanowdu. 26 Now a e angri fu si un alamala èn a lasi-ati fu di unu yere taki a kon siki. 27 A tru taki a ben kon siki so te, taki a ben de fu dede srefi. Ma Gado ben abi sari-ati nanga en. Fu taki en leti, a no ben abi sari-ati nanga en wawan, ma a ben abi sari-ati nanga mi tu, so taki mi no ben o sari, moro leki fa mi e sari kaba. 28 Sobun, mi e seni en kon na unu moro esi, so taki te unu si en baka, unu kan prisiri. Dan mi no o abi so furu broko-ede moro. 29 Fu dati ede un musu gi en wan switikon, leki fa unu gwenti du nanga tra bakaman fu Masra. Du dati nanga ala prisiri. Tan lespeki den sortu brada dati, 30 bika na fu a wroko fu Masra ede meki pikinmoro a dede, fu di a ben e du sani di ben kan meki taki a lasi en libi srefi, di a ben e yepi mi fu di unsrefi no ben man.