A fosi brifi fu Petrus

5 Mi na wan owru man tu èn mi si fa Krestes pina, iya, mi o kisi a glori tu di o de fu si. Dati meki mi wani aksi den owru man di de na un mindri, a sani disi: 2 Luku den skapu fu Gado di a gi unu fu sorgu. No du dati neleki na dwengi sma dwengi unu, ma du en nanga prisiri. No du en tu fu di unu lobi fu kisi wini na wan fasi di no fiti, ma du en fu di unu e angri fu dini trawan. 3 No prei basi tu gi den wan di de wan gudu fu Gado, ma tron eksempre gi den skapu. 4 Te a gran skapuman sori ensrefi, dan Gado o gi unu wan moi kransi di no e pori.

5 Sosrefi un yonkuman, saka unsrefi na ondro den owru man. Ma un alamala musu abi sakafasi te unu de nanga makandra, bika Gado e kakafutu gi den wan di abi heimemre, ma a e sori bun-ati gi den sma di abi sakafasi.

6 Sobun, saka unsrefi na ondro a bigi èn makti Gado, so taki a kan hei unu na a reti ten. 7 Trowe ala un hebi na en tapu, bika a e broko en ede nanga unu. 8 Tan nanga krin frustan. De na ai. Didibri, a feanti fu unu, e waka lontu leki wan lew di e bari, fu di a e suku fu swari wan sma. 9 Ma kakafutu gi en èn abi wan tranga bribi, fu di unu sabi taki na heri grontapu ala den brada fu unu e pina na a srefi fasi. 10 Ma baka te unu pina wan syatu pisi ten, dan a Gado di e sori sma bun-ati na ala fasi, iya, a Gado di kari unu fu kisi a glori fu en fu têgo, fu di unu de wán nanga Krestes, o gi unu leri dorodoro. A o meki unu tanapu kánkan, a o meki unu kon tranga. 11 Na en abi a makti fu têgo. Amen.

12 Selfanus na wan sma di mi e si leki wan futuboi fu Gado di e gi yesi na en ala ten. Mi meki a skrifi unu a syatu brifi disi, fu gi unu deki-ati èn fu fruteri unu sondro fu tweifri taki disi na a bun-ati fu Gado trutru. Tan poti bribi na ini a bun-ati disi. 13 A wan di de na Babilon èn di Gado kari tu neleki fa a kari unu, e seni taki unu odi. Mi manpikin Markus e seni taki unu odi tu. 14 Gi makandra odi nanga wan bosi fu sori taki unu lobi makandra.

Meki sani waka bun nanga un alamala di de bakaman fu Krestes.