A fosi brifi gi den Korentesma

8 Now mi wani taki fu nyanyan di sma e tyari leki ofrandi gi falsi gado. Wi sabi taki wi alamala abi sabi. Sabi e meki sma kisi bigimemre, ma lobi e gi sma deki-ati. 2 Efu wan sma denki taki a sabi wan sani, dan a no sabi a sani ete soleki fa a musu sabi en. 3 Ma efu wan sma lobi Gado, dan Gado sabi a sma dati.

4 Now mi wani taki fu a nyan di sma e nyan den sani di trawan e tyari leki ofrandi gi falsi gado. Wi sabi taki wan falsi gado na noti, èn taki wán Gado nomo de. 5 Furu sani de na hemel noso grontapu di sma e kari „gado”. Sobun, furu „gado” nanga furu „masra” de. 6 Ma gi wi wán Gado nomo de èn dati na a Tata. Ala sani komopo fu en èn wi e libi gi en. Wán Masra nomo de èn dati na Yesus Krestes. Gado gebroiki en fu meki ala tra sani èn wi kon de nanga yepi fu en.

7 Ma toku a no ala sma sabi dati. Fu di son sma ben anbegi falsi gado fosi, meki te den e nyan, den e si a nyanyan leki wan sani di sma tyari leki ofrandi gi wan falsi gado. A konsensi fu den swaki, èn dati meki a no krin. 8 Ma nyanyan no sa tyari wi kon moro krosibei fu Gado. Efu wi no e nyan, wi no e lasi noti, èn efu wi e nyan, wi no e wini noti tu. 9 Ma luku bun taki a reti disi di yu abi fu du san yu wani, no e tron wan sani di e meki den swakiwan fadon. 10 Bika efu wan sma e si taki yu di abi sabi, e sidon nyan na ini a tempel fu wan falsi gado, a no sa de so dan taki a konsensi fu a sma dati di swaki o gi en deki-ati fu nyan sani di sma tyari leki ofrandi gi falsi gado? 11 Dan a sabi fu yu o meki taki a swaki sma disi di de yu brada gi suma Krestes dede, fadon. 12 Sobun, efu unu e sondu teige un brada na a fasi dati èn efu unu e gi den deki-ati fu du sani di e trobi a swaki konsensi fu den, dan unu e sondu teige Krestes. 13 Fu dati ede, efu san mi e nyan e meki mi brada fadon, dan noiti moro mi sa nyan meti, so taki mi no sa meki mi brada fadon.