Psalm
Gi a fesiman fu den pokuman. Wan singi fu David.
19 Den sani na hemel e taki fu a glori fu Gado.
Den e ferteri fu ala den sani di en anu meki.
2 Ibri dei den e ferteri wi wan sani
èn ibri neti den e meki wi kon sabi sani fu en.
3 Den no abi mofo fu taki èn nowan wortu no de fu yere.
Sma no man yere den sten.
4 Ma tòg sma kan yere a boskopu fu den na ala sei fu grontapu.
Te na den moro farawe presi fu grontapu sma kan yere san den abi fu taki.
Na ini hemel Gado seti wan tenti gi a son.
5 A son de leki wan trowmasra di e brenki te a e kmoto na ini en kamra.
A de leki wan tranga man di e prisiri fu lon a pasi di de na en fesi.
6 A e opo kmoto na a wan sei fu hemel
fu saka gwe te na a tra sei.
Nowan sani kan kibri gi a faya fu en.
7 A wet fu Yehovah no abi nowan fowtu. A e gi sma krakti baka.
Den warskow fu Yehovah na sani di yu kan fertrow. Den e meki a sma di no abi ondrofeni kisi koni.
8 Den rai fu Yehovah bun. Den e meki na ati prisiri.
Den wet fu Yehovah bun. Den e meki na ai brenki.
9 Na wan bun sani fu abi bigi lespeki gi Yehovah. Fu ala ten sma o sori a lespeki disi.
Den besroiti fu Yehovah bun. Iya, ala ten a e koti krutu na wan reti fasi.
10 Den diri moro gowtu,
iya, moro leki bun furu soifri gowtu.
Den switi moro oni, iya, moro leki a moro soifri oni.
11 Den de leki warskow gi yu futuboi.
Te a e hori ensrefi na den, dan a e kisi furu blesi.
12 Suma kan si en eigi fowtu?
Gi mi pardon fu den sondu di mi du sondro fu mi sabi.
13 Yepi yu futuboi fu no abi heimemre, so taki a no go du sani di no bun.
No meki heimemre tron mi basi.
Dan sma no o man feni fowtu na mi tapu.
Mi no o du bigi sondu.*
14 Meki den sani di mi e taki nanga mi mofo nanga den sani di mi e prakseri dipi na ini mi ati, de sani di yu feni bun.
Yehovah, yu na mi Stonbergi. Yu na mi Ferlusuman.