Odo
4 Yehovah e gebroiki ala sani fu meki a wani fu en kon tru
èn a o sorgu srefi taki den ogrisma kisi pori.
5 Yehovah e teige ala sma di abi heimemre.
Yu kan de seiker taki den no o man wai pasi gi a strafu di den o kisi.
6 Te sma e sori bun-ati* èn te den e tai hori na trawan, dan dati e tapu sondu.
Bigi lespeki gi Yehovah e yepi wan sma fu no du ogri.
7 Te Yehovah breiti nanga a fasi fa wan sma e tyari ensrefi,
dan a e meki taki srefi den feanti fu a sma dati libi bun nanga en.
8 A moro betre fu abi pkinso sani nomo èn fu du san reti,
leki fu kisi furu sani na wan kruka fasi.
9 Wan libisma kan prakseri na ini en ati sortu pasi a o teki,
ma na Yehovah e sori en fa a musu waka.
10 Den besroiti fu wan kownu musu kruderi nanga a wani fu Gado.
A no musu koti krutu na wan kruka fasi.
11 Na Yehovah abi den soifri wegi.
Na en e taki o hebi den wegiston na ini a saka musu de.
12 Efu wan kownu e tiri na wan reti fasi, dan a kownukondre fu en o tan.
So wan kownu no lobi en srefsrefi te sma e du ogri.
13 Wan kownu e prisiri nanga sma di e taki sani leki fa den de.
A lobi den sma di e taki san tru.
14 Na atibron fu wan kownu de leki wan boskopuman di e tyari dede kon,
ma wan konisma man kowru* na atibron fu en.
15 Efu wan kownu feni wan sma bun, dan a sma dati o abi wan bun libi.
A bun-ati fu en de leki wan wolku di e tyari alen kon na a yoisti ten.*
16 A moro betre fu kisi koni leki fu kisi gowtu!
A moro betre fu kisi ferstan leki fu kisi solfru.
17 Krin-ati sma e wai pasi gi ogri.
A sma di e luku bun sortu pasi a e waka e kibri en libi.
18 Bigifasi e kon fosi wan sma fadon
èn heimemre fosi wan sma stotu en futu.
19 A moro betre fu abi sakafasi èn fu de nanga den safr’ati sma,
leki fu prati gudu nanga den sma di e hei densrefi.
20 A sma di man si a dipi fu wan tori o feni bun
èn a sma di e fertrow tapu Yehovah o de koloku.
21 Efu wan sma koni, dan trawan o taki dati a abi ferstan
èn efu wan sma e taki switi nanga trawan,* dan den o arki en.
22 Te wan sma abi koni, dan dati e hori en na libi,
ma na a don fu den donsma e tron wan strafu gi den.
23 Na ati fu wan konisma e meki a taki nanga koni
èn a fasi fa a e taki e meki sma arki en.
24 Switi wortu na wan onigodo.
Den e meki sma firi bun èn den e dresi sma bonyo.
25 Wan sma kan denki taki a de na tapu a bun pasi,
ma a pasi dati o tyari en go dede.
27 Wan wiswasi man e diki ogri sani kon na tapu.
Den sani di a e taki nanga en mofo de leki wan bigi faya.
28 Wan sma di lobi dyugudyugu* e sutu faya gi trawan fu meki trobi
èn wan sma di e taki ogr’ati lei e pori bun mati.
29 Wan man di lobi du ogri e kori en mati
èn a e meki a waka wan pasi di no bun.
30 A e pingi en ai fu kori trawan.
A e kwinsi en mofo tapu te a e du ogri.
31 Weti w’wiri na wan kroon di e moi na ede fu den wan di e waka a reti pasi.
32 A sma di ati no e bron esi betre moro wan tranga man
èn a sma di man hori ensrefi betre moro a wan di e teki wan foto abra.