A fosi brifi gi Timoteyus
3 Den wortu disi tru:
Efu wan man e suku fu tron wan sma di e teki fesi na ini a gemeente, dan a e suku fu du wan tumusi bun wroko. 2 Fu dati ede wan man di e teki fesi musu de wan sma di trawan no man feni fowtu na en tapu. A musu de a masra fu wán wefi nomo. A no musu du sani pasa marki. A musu de nanga krin frustan. En libi musu orga bun. A musu lobi fu teki trawan na ini oso. A musu sabi fa fu gi leri. 3 A no musu de wan sopiman, noso wan sma di lobi du ogri nanga trawan, ma a musu fiti ensrefi makriki na trawan. A no musu de wan sma di lobi meki trobi noso wan sma di lobi moni. 4 A musu de wan man di e tiri en osofamiri na wan bun fasi èn di abi pikin di e gi yesi èn di e tyari densrefi na wan bun fasi. 5 (Bika efu wan sma no sabi fa fu tiri en eigi osofamiri, dan fa a o man sorgu a gemeente fu Gado?) 6 A no musu de wan sma di de nyun na ini a bribi, noso a kan kisi bigimemre èn Gado kan strafu en soleki fa a strafu Didibri. 7 Boiti dati, a musu abi wan bun nen na sma na dorosei fu a Kresten gemeente, so taki a no kisi porinen èn a fadon na ini a trapu fu Didibri.
8 Dinari ini a diniwroko musu de seryusu tu. Den no musu hoigri. Den no musu lobi dringi tumusi furu win. Den no musu gridi fu feni wini na wan fasi di no fiti. 9 Nanga wan krin konsensi den musu tan horibaka gi a Kresten bribi di de wan santa kibritori fu Gado.
10 Sosrefi, luku fosi efu den man disi bun nofo fu du a wroko. Efu nowan fowtu de fu feni na den tapu, dan meki den tron dinari.
11 Umasma musu de seryusu tu. Den no musu fruteri ogri-ati lei fu trawan. Den no musu du sani pasa marki. Na ala fasi den musu sori taki den e gi yesi na Gado.
12 Dinari ini a diniwroko musu de masra fu wán wefi nomo. Den musu tiri den pikin nanga na osofamiri fu den na wan bun fasi, 13 bika den man di e du a wroko fu den na wan bun fasi, e meki taki den kisi wan bun nen na trawan èn den man taki fri fu a bribi di abi fu du nanga Krestes Yesus.
14 Mi e skrifi yu den sani disi, aladi mi e howpu taki mi kan kon na yu heri esi. 15 Ma efu mi no man kon esi, dan yu sabi fa fu tyari yusrefi na ini na osofamiri fu Gado, di de a gemeente fu a libi Gado, wan pilari èn wan stonfutu fu a tru anbegi. 16 Iya, a santa kibritori di abi fu du nanga a dini di wi musu dini Gado fayafaya, bigi fu tru: ’A ben sori ensrefi leki wan libisma. Di a tron wan yeye, Gado fruklari taki a feni en bun. A ben sori ensrefi na engel. Sma ben preiki fu en gi den trakondre sma. Sma na grontapu ben poti bribi na en èn a ben opo go na hemel nanga glori.’