Yeremia

52 Sedekia ben abi 21 yari di a tron kownu. A tiri na Yerusalem 11 yari langa. En m’ma ben de Hamutal, na umapkin fu Yeremia di ben de wan man fu a foto Libna. 2 Neleki fa Yoyakim ben du, na so Sedekia du tu. A tan du sani di Yehovah no feni bun. 3 Na fu di Yehovah ati bron, meki den sani disi psa nanga den sma fu Yerusalem nanga Yuda teleki a puru den na en fesi krinkrin. Sedekia ben opo ensrefi teige a kownu fu Babilon. 4 Na a di fu tin dei fu a di fu tin mun na ini a di fu neigi yari di Kownu Sedekia ben e tiri, Kownu Nebukadnesar* fu Babilon kon nanga en heri legre fu feti nanga Yerusalem. Den lontu a foto, dan den bow wan skotu lontu en. 5 A legre tan drape teleki a di fu 11 yari di Sedekia ben e tiri leki kownu.

6 Na a di fu neigi dei fu a di fu fo mun, na angriten na ini a foto ben hebi srefsrefi. N’nyan no ben de moro gi a pipel fu a kondre. 7 Te fu kba den Kaldeyasma broko wan pisi fu a skotu fu a foto. A neti dati ala den srudati lowe kmoto na ini a foto. Den waka na a portu na mindri den tu skotu di ben de na a dyari fu Kownu. Disten den Kaldeyasma ben lontu a heri foto. Den srudati lowe go na a sei fu Araba-lagipresi. 8 Ma a legre fu den Kaldeyasma hari go na baka Kownu Sedekia teleki den kisi en na Yerikow-sabana. Ne ala den srudati fu Sedekia lon gwe libi en. 9 Baka dati den grabu Kownu Sedekia. Den tyari en go na a kownu fu Babilon di ben de na Ribla na ini a kontren fu Hamat, so taki a ben kan krutu Sedekia. 10 A kownu fu Babilon kiri den manpkin fu Sedekia leti na en fesi èn a kiri ala den granman fu Yuda drape na ini Ribla. 11 Baka dati a kownu fu Babilon meki Sedekia kon breni, a tai en nanga kopro keti, dan a tyari en go na Babilon. A poti en na dungr’oso èn na drape a tan teleki a dede.

12 Na a di fu tin dei fu a di fu feifi mun na ini a di fu 19 yari di Kownu Nebukadnesar* ben e tiri Babilon, Nebusaradan kon na Yerusalem. Nebusaradan ben de na edeman fu den waktiman èn wan futuboi fu a kownu fu Babilon. 13 Dan Nebusaradan bron na oso fu Yehovah. A bron na oso* fu Kownu nanga ala den tra oso di ben de na ini Yerusalem. A bron ala den oso fu den prenspari man fu a foto tu. 14 Dan ala den srudati fu a legre fu den Kaldeyasma di ben de nanga na edeman fu den waktiman, broko den skotu lontu Yerusalem puru.

15 Nebusaradan, na edeman fu den waktiman, ben teki wan tu fu den mofina sma, den sma di ben tan abra na ini a foto, ala den sma di ben teki a sei fu a kownu fu Babilon nanga den bun wrokoman di ben tan abra na ini a foto, dan a tyari den gwe. 16 Ma Nebusaradan, na edeman fu den waktiman, ben libi wan tu fu den moro pôti sma na baka fu sorgu den droifidyari èn fu wroko gron leki srafu.

17 Den Kaldeyasma ben broko den kopro pilari di ben de na ini na oso fu Yehovah. Den broko den wagi nanga a bigi kopro beki na ini na oso fu Yehovah. Ala den sani disi den broko pispisi, dan den teki ala den pisi kopro dati tyari go na Babilon. 18 Boiti dati, den teki den baki fu poti asisi na ini, den skopu, den sani fu kiri a faya fu den lampu, den komki, den kan nanga ala tra kopro wrokosani di sma ben e gebroiki na ini a tempel. 19 Na edeman fu den waktiman teki den beki, den pan fu poti krofaya na ini, den komki, den baki fu poti asisi na ini, den kandratiki èn den kan nanga den komki di ben meki fu soifri gowtu nanga solfru. 20 A kopro di Kownu Salomo ben gebroiki fu meki den tu pilari, a bigi kopro beki, den 12 kopro mankaw pe a beki ben de na tapu nanga den wagi di ben de na ini na oso fu Yehovah ben furu so te, taki sma no ben man taki omeni a kopro fu ala den sani disi ben e wegi.

21 Ibriwan fu den pilari ben hei aiti meter nanga wán centimeter.* Nanga wan t’tei fu 5 meter nanga 34 centimeter* yu ben kan lontu ibriwan fu den pilari. A kopro fu den pilari ben deki sowan seibi centimeter* èn noti no ben de na ini den pilari. 22 Den pilari-ede ben de fu kopro tu. Na ede fu a wan pilari ben hei 2 meter nanga 23 centimeter.* A heri net nanga ala den granaki-apra* di ben fasi lontu a pilari-ede, ben de fu kopro tu. A di fu tu pilari ben de a srefi. Den granaki-apra ben de a srefi tu. 23 Lontu wan pilari-ede 96 granaki-apra ben de.* Na a heri net 100 granaki-apra ben de.

24 Baka dati na edeman fu den waktiman, teki Seraya di ben de na edeman fu den priester, a teki Sefanya di ben de a priester di ben e yepi na edeman fu den priester èn a teki den dri man di ben e hori wakti na den doro fu a tempel. 25 Disi na den sma di a teki na ini a foto: Wan heihei man di ben de wan edeman fu den srudati, seibi raiman fu Kownu di ben de na ini a foto ete nanga a sekretarsi fu a legre-edeman. A sekretarsi disi ben e kari sma fu tron srudati. Boiti dati Nebusaradan teki 60 man fu a pipel di ben de na ini a foto ete. 26 Ne Nebusaradan, na edeman fu den waktiman, tyari ala den sma disi go na a foto Ribla pe a kownu fu Babilon ben de. 27 Dan a kownu fu Babilon kiri ala den man disi na Ribla na ini a kontren fu Hamat. Na so den sma fu Yuda ben abi fu gwe libi a kondre fu den nanga tranga.

28 Disi na den sma di Kownu Nebukadnesar* tyari gwe: Na ini a di fu seibi yari di a ben e tiri, a tyari 3023 Dyu gwe.

29 Na ini a di fu 18 yari di Kownu Nebukadnesar* ben e tiri, a tyari 832 sma fu Yerusalem gwe.

30 Na ini a di fu 23 yari di Kownu Nebukadnesar* ben e tiri, Nebusaradan, na edeman fu den waktiman, tyari 745 Dyu gwe.

Ala nanga ala, den tyari 4600 sma gwe nanga tranga.

31 Na ini a yari di Efil-Merodak tron kownu fu Babilon, a puru Kownu Yoyakin fu Yuda na straf’oso.* Dati ben de na a di fu 25 dei fu a di fu 12 mun na ini a di fu 37 yari baka di den ben tyari Kownu Yoyakin fu Yuda gwe nanga tranga. 32 A Kownu sori switifasi gi Yoyakin èn a poti en moro hei leki den tra kownu di den ben tyari kon na Babilon tu. 33 Yoyakin no ben abi fu weri strafman-krosi moro èn te na a kba fu en libi, a ben mag nyan makandra nanga a kownu fu Babilon. 34 A kownu fu Babilon ben sorgu taki Yoyakin kisi a n’nyan di a ben abi fanowdu ibri dei, en heri libi langa teleki a dede.