Yob
16 Dan Yob taki:
2 „Den sortu sani disi mi yere furu leisi kba.
Na presi fu trowstu mi, unu de wan hebi gi mi!
3 O ten unu o tapu nanga den soso sani* di unu e taki?
San e meki taki unu e taigi mi den sani disi?
4 Mi srefi ben o man taki leki unu tu.
Efu unu ben de na mi presi,
dan mi ben kan krutu unu tu
èn mi ben kan seki mi ede gi unu.
5 Ma na presi fu dati, mi ben o taigi unu sani fu meki unu firi bun.
Mi ben o taki sani fu trowstu unu.
6 Efu mi e taki, mi e firi pen.
Awinsi mi tan pî, tòg mi e firi pen.
8 Ai Gado, yu grabu mi hori tu èn ala sma si dati.
Ala sma e si fa mi kon mangri. Mi srefi e si dati.
9 Nanga atibron a priti mi pispisi èn a abi bita-ati gi mi.
Na fu mi ede meki a e kaw en tifi.
Mi feanti e piri en ai e luku mi.
10 Den bradi den mofo opo fu swari mi.
Den naki mi na ini mi fesi fu gi mi syen.
Wan lo fu den kon makandra fu du mi ogri.
11 Gado libi mi gi yongu boi.
A trowe mi na ini den anu fu ogriman.
12 Di mi ben de sondro brok’ede, a naki mi broko pispisi.
A grabu mi na mi bakaneki, dan a masi mi.
A sutu den peiri fu en kon na mi tapu.
13 Den man fu en di e sutu nanga bo, lontu mi.
A e boro den niri fu mi èn a no abi nowan sar’ati.
A e kanti mi gari trowe na gron.
14 A wan olo baka a trawan a e naki na ini mi skin.
A e lon kon na mi tapu leki wan tranga fetman.
16 Mi fesi kon redi, fu di mi e tan krei
èn ala mi ondro-ai kon dungru.*
17 Ma mi no du nowan ogri,
èn nanga wan krin ati mi e begi.
18 Ai grontapu, no tapu a brudu fu mi!
Nowan kibripresi musu de gi a b’bari fu mi!
19 Nownow srefi mi kotoigi de na hemel.
A sma di o opo taki gi mi de na loktu.
21 Mi winsi taki wan sma ben kan koti krutu gi mi nanga Gado
neleki fa wan sma e koti krutu gi tu libisma.
22 Bika mi o libi soso wan tu yari ete,
dan mi o waka gwe na tapu a pasi pe sma no man drai kon baka.