Psalm
Gi a fesiman fu den pokuman. Wan singi fu David.
41 Koloku fu a sma di e yepi den mofinawan.
Yehovah o ferlusu en te problema miti en.
2 Yehovah o kibri en èn a o hori en na libi.
Sma na grontapu o taki dati a de wan koloku sma.
Noiti yu o gi en abra na den feanti fu en.
3 Yehovah o yepi en te a e d’don siki na tapu en bedi.
A o sorgu en te a de na tapu en sikibedi.
4 Mi taki: „Yehovah, mi e begi yu, du bun gi mi.
Meki mi firi bun baka, bika mi sondu teige yu.”
5 Den feanti fu mi e taki ogri fu mi. Den e taki:
„O ten a o dede, so taki sma fergiti en?”
6 Te wan fu den feanti fu mi e kon luku mi, a no e taki nanga wan krin ati.
A e luku sortu ogri fu mi a kan go taki.
Dan te a e go na dorosei, a e ferteri ala sma.
7 Ala den sma di e teige mi e taki mi tori.
Den e luku fa den kan du mi ogri. Den e taki:
8 „Wan bigi ogri miti en.
Fa a d’don drape, a no o opo moro.”
9 Srefi a bun mati fu mi di mi ben e fertrow,
iya, a sma di ben e nyan mi n’nyan, e suku fu du mi ogri.*
10 Yehovah, mi e begi yu, du bun gi mi èn meki mi opo,
so taki mi kan pai den baka.
11 No meki den feanti fu mi bari fu prisiri taki den wini mi.
Na so mi o sabi taki yu feni mi bun.
12 Fu di mi du san yu taki, meki yu horbaka gi mi.
Yu o prisiri nanga mi fu ala ten.
13 Prèise Yehovah, a Gado fu Israel.
Prèise en fu têgo.
Amen, iya, amen.