Deuteronomium

34 Baka dati Moses waka fu Moab-lagipresi go na Neibo-bergi, na a ede fu Pisga-bergi di de na ini a birti fu Yerikow. Dan Yehovah sori en a heri kondre. A sori en a kontren fu Gilead te go miti Dan, 2 a heri kontren fu Naftali, a kontren fu Efrayim nanga Manase, èn a heri kontren fu Yuda te na a Bigi Se na west-sei. 3 Boiti dati, a sori en Negeb-sabana, a kontren fu Yordan-liba, a lagipresi na Yerikow, èn a heri kontren fu Palmbon-foto te na Sowar.

4 Yehovah taigi Moses: „Na fu a kondre disi mi ben e taki di mi meki wan sweri nanga Abraham, Isak, nanga Yakob. Mi ben taigi den: ’Mi sa gi den bakapikin fu yu a kondre disi.’ Mi meki yu si a kondre nanga yu eigi ai, ma yu no o abra go na ini.”

5 Baka dati Moses, a futuboi fu Yehovah, dede drape na ini a kondre Moab, soleki fa Yehovah ben taki. 6 Dan a beri en na Moab-lagipresi na fesi Bet-Peor. Te na a dei fu tide, nowan sma sabi pe en grebi de. 7 Di Moses dede a ben abi wán hondro nanga tutenti yari. A ben e si bun ete èn a ben tranga ete. 8 Ne den Israelsma krei dritenti dei gi Moses, aladi den ben de na Moab-lagipresi. Baka a pisi ten dati, den no krei moro. Den ben kaba row gi Moses.

9 Moses ben poti en anu na tapu Yosua èn na so a yeye fu Gado ben kon na Yosua tapu. Na so Yosua, a manpikin fu Nun, kon koni èn heri Israel bigin arki en. Den du ala sani soleki fa Yehovah ben taigi Moses. 10 Ma noiti so wan profeiti leki Moses ben de na ini Israel. Yehovah ben sabi en heri bun. 11 Yehovah ben seni en fu du bigi sani nanga wondru na ini a kondre Egepte na fesi Kownu, den futuboi fu en, nanga ala den tra sma na ini a kondre. 12 Nanga furu krakti Moses ben du ala sortu kefalek sani na fesi ala den Israelsma.