Markus skrifi en

4 Baka dati, a bigin gi leri baka na sekanti èn bun furu sma ben kon na en. Dati meki a go sdon na ini wan boto èn den pusu a boto pkinso go na mindrisei, ma ala den sma ben de na a syoro. 2 Ne a bigin ferteri agersitori fu leri den furu sani. A taigi den: 3 „Un arki! Wan saiman ben go sai siri. 4 Di a ben e sai, wan tu siri fadon na seipasi èn den fowru kon nyan den. 5 Tra siri fadon na tapu ston-gron pe furu doti no ben de èn den bigin gro es’esi, fu di den no ben de dipi na ini a gron. 6 Ma di son opo, a bron den pransun èn fu di den no ben abi rutu, meki den kon drei èn den dede. 7 Tra siri fadon na mindri den makabon. Di den makabon gro kon, den kiri den. Dati meki den no ben gi froktu. 8 Ma tra siri fadon na tapu bun doti. Di den gro kon moro bigi, den bigin gi froktu. A wan gi 30 tron so furu froktu, a trawan 60 tron so furu èn ete wan trawan 100 tron so furu.” 9 Baka dati Yesus taki: „A sma di abi yesi fu arki, meki a arki.”

10 Di a ben de en w’wan, den 12 apostel nanga den tra disipel kon na en èn den bigin aksi en san den agersitori wani taki. 11 A taigi den: „Na unu kisi a grani fu kon ferstan a santa kibritori fu Gado Kownukondre. Ma gi den tra sma ala den sani disi na agersitori nomo. 12 Dati meki den e luku, ma den no e si. Den e yere, ma den no e ferstan san a wani taki. Noiti den o drai kon baka fu kisi pardon fu sondu.” 13 A taigi den tu: „Efu unu no e ferstan na agersitori disi, dan fa unu o ferstan ala den tra agersitori?

14 A saiman e sai a wortu. 15 A siri di e fadon na sei pasi na den sma di yere a wortu. Ma baka te den yere a wortu, dan direk Satan e kon èn a e puru a wortu di ben sai na ini den ati. 16 Yu abi sma tu di de leki den siri di sai na tapu ston-gron. Fa yu si den yere a wortu, den e teki en nanga prisiri. 17 Ma a wortu no e teki rutu na ini den ati. Fu dati ede den e tan wan pisi ten nomo. Te problema kon noso te sma e du ogri nanga den fu a wortu ede, dan fosi yu denki den lasi bribi. 18 Trawan sai na mindri den makabon. Den na den sma di yere a wortu, 19 ma fu di den e broko den ede nanga a libi* èn fu di den e feti baka grontapu gudu nanga ala sortu tra sani, meki dati e kiri a wortu èn a no man meki froktu. 20 Den siri di sai na tapu bun doti, na den sma di e arki a wortu èn di e teki en nanga prisiri. Dan den e gi 30 tron so furu froktu, 60 tron so furu nanga 100 tron so furu.”

21 Baka dati a taigi den: „Nowan sma e poti wan lampu na ondro wan baskita noso na ondro wan bedi. Ma a e poti a lampu na tapu wan hei presi, a no so? 22 Bika iniwan sani di kibri o kon na krin èn ala sani di ai no man si o kon de fu si. 23 A sma di abi yesi fu arki, meki a arki.”

24 A taigi den tu: „Arki bun san mi e taigi unu. O moro unu e arki, o moro unu o ferstan sani. Efu unu e arki bun, dan unu o ferstan bun furu sani. 25 Bika a sma di abi kba, o kisi moro. Ma a sma di no abi, srefi san a abi den o puru na en anu.”

26 Ne a taki moro fara: „A Kownukondre fu Gado de neleki te wan man e sai siri na ini en gron. 27 Te neti a man e sribi èn na deiten a e opo. A siri e gro teleki a kon bigi, ma a man no sabi fa dati e psa. 28 A gron e gi n’nyan safsafri. Fosi, a pransun e opo kon, dan a e gi n’nyan èn te fu kba a n’nyan e kon lepi. 29 Ma te a n’nyan lepi kba, dan a man e koti en, bika a kotiten doro kba.”

30 Yesus taki tu: „Nanga san wi kan agersi a Kownukondre fu Gado, noso nanga sortu agersitori wi kan tyari kon na krin san na a Kownukondre? 31 A de leki wan mosterd-siri di sma e sai. A siri disi na a moro pkin siri na grontapu. 32 Ma te a sai kba, a e bigin gro èn a e bigi moro ala den tra gruntubon. A bon e kisi bigi taki èn den fowru di e frei na loktu man tan na ini a skaduw fu en.”

33 Na so Yesus gebroiki furu fu den agersitori disi fu ferteri den sma a wortu, solanga den ben man ferstan en. 34 Iya, a no ben taki nanga den sondro fu gi wan agersitori. Ma te en nanga den disipel fu en ben de den w’wan, dan a ben e taigi den san den agersitori wani taki.

35 A srefi dei dati, di neti doro, a taigi den: „Kow abra go na a tra sei fu a se.” 36 Fu dati ede den seni den sma gwe èn den tyari Yesus gwe nanga a boto pe a ben sdon na ini kba. Tra boto ben e gwe tu nanga den. 37 Ne wan bun tranga winti bigin wai. Den skwala ben e naki kon na ini a boto èn a boto ben kon furu nanga watra. 38 Ma Yesus ben d’don e sribi nanga en ede na tapu wan kunsu na bakasei fu a boto. Dati meki den wiki en èn den aksi en: „Leriman, yu no e si taki wi o dede?” 39 Di a yere dati, a opo, dan a bari a winti èn a taigi a se: „Tapu! Tan tiri!” Dan a winti saka èn ala sani kon rustig. 40 Baka dati a taigi den: „Fu san ede unu e frede so? Te now ete unu no abi bribi?” 41 Ma den ben frede srefsrefi èn den taigi makandra: „Suma na a man disi? Srefi a winti nanga a se e du san a e taki.”