A fosi brifi gi den Korentesma

15 Brada nanga sisa, now mi e memre unu na a bun nyunsu di mi ben ferteri unu. Unu ben arki a bun nyunsu disi èn unu tan bribi na ini en tu. 2 Unu o kisi ferlusu efu unu e tan bribi a bun nyunsu di mi ferteri unu, noso a o de leki unu tron bribiman fu soso.

3 Bika wan fu den fosi sani di mi ferteri unu, na san misrefi kon sabi tu, taki Krestes dede gi den sondu fu wi soleki fa Gado Buku taki. 4 Den beri en èn Gado meki a opo baka na a di fu dri dei, soleki fa Gado Buku taki. 5 A sori ensrefi na Seifas* èn baka dati na den 12 apostel. 6 Baka dati a sori ensrefi na moro leki 500 brada na a srefi ten. Furu fu den brada disi de na libi ete, ma sonwan fu den dede. 7 Dan a sori ensrefi na Yakobus èn baka dati na ala den apostel. 8 Ma leki lastiwan fu un alamala a sori ensrefi na mi, leki wan pkin di gebore tumsi fruku.

9 Bika mi na a moro pkinwan fu den apostel èn mi no warti fu den kari mi wan apostel, bika mi ben de nomonomo fu du ogri nanga a gemeente fu Gado. 10 Ma na fu di Gado sori mi bun-ati, meki mi na wan apostel now. A bun-ati di a sori mi no ben de fu soso, bika mi wroko moro tranga leki ala den trawan. A no nanga mi eigi krakti mi du dati, ma nanga a bun-ati fu Gado di de nanga mi. 11 Ma a no abi trobi efu na mi preiki gi unu noso efu na den tra apostel du dati. Wi alamala e preiki a srefi boskopu èn na dati unu ben bribi.

12 We, efu wi e preiki taki Krestes opo baka, dan fa sonwan fu unu kan taki dati den dedesma no o opo baka? 13 Efu a tru taki den dedesma no o opo baka, dan Krestes no opo baka tu. 14 Ma efu Krestes no opo baka, dan a no de fu taki dati na fu soso wi e preiki èn na fu soso wi e bribi. 15 Dan wi na falsi kotoigi fu Gado tu, fu di wi e lei gi Gado taki a meki Krestes opo baka. Bika efu a de so trutru taki den dedesma no o opo baka, dan Gado no meki Krestes opo baka. 16 Efu den dedesma no o opo baka, dan Krestes no opo baka tu. 17 Boiti dati, efu Krestes no opo baka, dan na fu soso unu e bribi. Unu no kisi pardon fu un sondu. 18 Efu dati de so, dan den wan di dede leki disipel fu Krestes lasi gwe tu. 19 Efu na ini a libi disi w’wan wi howpu tapu Krestes, dan a situwâsi fu wi ogri moro di fu ala tra sma.

20 Ma Gado meki Krestes opo baka trutru. Fu den wan di dede, en na a foswan di opo baka. 21 Fu di na wan libisma tyari dede kon, dan na wan libisma o meki taki dedesma opo baka tu. 22 Neleki fa Adam meki taki ala sma e dede, na so Krestes meki taki ala sma o kon na libi baka tu. 23 Ma ibri sma o opo baka te en ten doro. Krestes opo baka leki foswan èn bakaten den wan di de fu Krestes o opo baka te a kon baka.* 24 Baka dati, na a kba, a o gi a Kownukondre abra na en Gado èn P’pa. Ma fosi dati psa a o tyari wan kba kon na ala regering, na ala makti èn na ala krakti. 25 A musu tiri leki Kownu teleki Gado poti ala den feanti fu en na ondro en futu. 26 Dede na a lasti feanti di a o puru na pasi. 27 Bika Gado „poti ala sani na en ondro”. Ma te a e taki dati ’ala sani de na en ondro’, dan dati no wani taki dati Gado srefi de na ondro Krestes. Bika Gado na a sma di poti ala sani na ondro Krestes. 28 Ma te ala sani de na ondro a Manpkin kba, dan a o saka ensrefi na ondro Gado di ben poti ala sani na en ondro. Na so Gado kan de ala sani gi ala sma.

29 Bika sortu wini den sma di e dopu fu tron dedesma o kisi?* Efu a de so trutru taki dedesma no o kisi libi baka, dan san o psa nanga den sma di e dopu fu dede te fu kba? Fu san ede den e dopu a dopu disi? 30 Fu san ede ogri kan miti wi ala yuru?* 31 Ala dei mi kan lasi mi libi. Un kan bribi a sani disi, neleki fa unu kan bribi mi te mi e taki dati mi e prisiri srefsrefi nanga unu fu di unu de wán nanga wi Masra Yesus Krestes. 32 Efu mi feti nanga ogri meti na Efeise neleki tra sma,* dan sortu bun dati tyari kon gi mi? Efu den dedesma no o opo baka, dan „meki wi nyan èn dringi, bika tamara wi o dede”. 33 No meki sma kori unu. Takru mati e pori bun gwenti.* 34 Un musu kisi unsrefi èn du san reti. Un no musu tan du sondu, bika sonwan fu unu no sabi Gado. Mi e taki disi fu meki unu firi syen.

35 Ma tòg wan sma kan aksi: „Fa den dedesma o opo baka? Nanga sortu skin den o kon?” 36 Yu donman! Te yu e sai wan siri, dan a no o kon na libi efu a no dede fosi, tòg ? 37 Te yu e sai, yu no e sai a bon di o gro, ma yu e sai wán siri nomo, ja, a kan de iniwan siri. 38 Ma Gado e meki a siri gro kon tron a bon di a wani. A e meki ibri siri gro kon tron a bon di a musu tron. 39 A no ala skin de a srefi. Libisma abi den eigi skin, skapu nanga kaw abi den eigi skin, fowru abi den eigi skin èn fisi abi den eigi skin. 40 Yu abi libisani na hemel di abi den eigi skin èn yu abi libisani na grontapu di abi den eigi skin, ma a moi fu den libisani di de na hemel de tra fasi leki a moi fu den libisani na grontapu. 41 A son abi en eigi moi, a mun abi en eigi moi èn den stari abi den eigi moi. Fu taki en leti, ibri stari moi na en eigi fasi.

42 Na so a de tu nanga den dedewan di o opo baka. A skin fu den de leki wan siri di sai èn di e pori. Ma a skin di e opo baka no man pori. 43 A skin sai nanga syen, ma a e opo baka nanga glori. A sai leki wan skin di swaki, ma a e opo baka leki wan skin di abi krakti. 44 A sai leki wan libisma skin, ma a e opo baka leki wan yeye skin. Efu wan libisma skin de, dan wan yeye skin de tu. 45 Gado Buku taki tu: „A fosi man, Adam, tron wan libisma.”* A lasti Adam tron wan yeye di e gi libi. 46 Ma a no a yeye skin ben de fosi. Na a libisma skin ben de fosi èn baka dati a yeye skin kon de. 47 A fosi libisma na fu grontapu èn a meki fu doti. A di fu tu libisma na fu hemel. 48 Den sma fu a grontapu disi de leki a sma di meki fu doti. Den sma di o go na hemel de leki a sma di de fu hemel. 49 Wi de leki a sma di meki fu doti. Sobun, wi o de tu leki a sma di de fu hemel.

50 Ma brada, mi e taigi unu taki skin nanga brudu no man go na ini a Kownukondre fu Gado èn wan skin di man pori no man kisi wan sani di no man pori. 51 Luku, mi e ferteri unu wan santa kibritori: A no ala fu wi o dede, ma wi alamala o kenki 52 na ini wan momenti, fosi yu pingi yu ai, te a lasti trompet o bari. Bika a trompet o bari èn den dedesma o opo baka. Den o kisi wan skin di no man pori, dan wi o kenki. 53 Bika a skin di man pori musu tron wan skin di no man pori èn a skin di man dede musu tron wan skin di no man dede. 54 Ma te a skin di man pori tron wan skin di no man pori èn a skin di man dede tron wan skin di no man dede, dan a sani di skrifi na ini Gado Buku o kon tru: „A swari dede fu têgo.” 55 „Dede, yu no o wini moro! Dede, pe yu maka de?” 56 A maka di e meki sma dede, na sondu èn a Wet e gi sondu krakti. 57 Ma tangi fu Gado, bika a meki wi wini nanga yepi fu wi Masra Yesus Krestes!

58 Fu dati ede mi lobi brada, tnapu kánkan, no degedege èn ala ten abi furu fu du na ini a wroko fu Masra, fu di unu sabi taki a wroko di unu e du gi Masra no de fu soso.