Lukas skrifi en

8 Syatu baka dati, a bigin go na ala den foto nanga den dorpu fu preiki a bun nyunsu fu Gado Kownukondre. Den 12 apostel ben de nanga en. 2 Boiti dati yu ben abi wan tu uma di a ben dresi èn di a ben puru ogri yeye na den tapu. Wan fu den uma dati na Maria di sma sabi tu leki Magdalena. A ben puru seibi ogri yeye na en tapu. 3 Yu ben abi Yohana tu, a frow fu Kusa di ben de a fesiman fu Herodes oso, nanga Susana èn furu tra uma di ben gebroiki den sani fu den fu sorgu Yesus nanga den disipel fu en.

4 Sma ben kmopo na ini ala den foto fu kon arki Yesus. Di wan bigi grupu sma kon makandra, a ferteri den wan agersitori: 5 „Wan saiman ben go sai siri. Di a ben e sai, wan tu siri fadon na seipasi èn sma waka tapu den siri. Ne den fowru di e frei na loktu nyan den. 6 Tra siri fadon na tapu ston-gron èn baka di den bigin gro den kon drei fu di den no ben kisi watra. 7 Trawan fadon na mindri den makabon èn den makabon di ben e gro makandra nanga den siri, kiri den. 8 Tra siri fadon tapu bun doti èn baka di den bigin gro, den meki 100 tron so furu froktu.” Di a ferteri den sani disi, a taki: „A sma di abi yesi fu arki, meki a arki.”

9 Ma den disipel aksi en san na agersitori disi ben wani taki. 10 A piki den: „Na unu kisi a grani fu kon ferstan den santa kibritori fu Gado Kownukondre, ma gi den tra sma na gewoon wan agersitori. Dati meki den e luku, ma den e luku fu soso èn den e yere, ma den no e ferstan san a wani taki. 11 Disi na san na agersitori wani taki: A siri na a wortu fu Gado. 12 A siri di de na seipasi, na den sma di yere, ma Didibri e kon èn a e puru a wortu na ini den ati. Dati meki den no e bribi èn den no o kisi ferlusu. 13 A siri di fadon na tapu ston-gron, na den sma di e teki a wortu nanga prisiri te den yere en, ma den no abi rutu. Den e bribi wan pisi ten nomo, ma te tesi kon den e gwe libi a bribi. 14 A siri di fadon na mindri den makabon, na den sma di yere, ma brok’ede, gudu nanga den prisiri fu a libi e meki den lasi pasi. Den sani disi e kiri a siri èn a no man gro. 15 A siri di fadon na tapu a bun doti, na den sma di abi wan krin èn bun ati. Te den yere a wortu, dan den e meki a wortu teki rutu na ini den ati èn den e meki froktu fu di den e hordoro.

16 Nowan sma e leti wan lampu, dan a e tapu en nanga wan prapi. A no e poti en ondro wan bedi tu, ma a e poti en tapu wan hei presi, so taki den sma di e kon na insei kan si a leti. 17 Bika ala sani di kibri, o kon na krin èn ala sani di ai no man si, sma o kon sabi èn den o kon de fu si. 18 Fu dati ede, luku bun fa unu e arki, bika a sma di abi, o kisi moro. Ma a sma di no abi, o lasi srefi a sani di a denki taki a abi.”

19 Yesus en m’ma nanga den brada fu en ben kon na en, ma den no ben man kon krosbei na en fu di someni sma ben de drape. 20 Dati meki sma kon taigi en: „Yu m’ma nanga den brada fu yu tnapu na dorosei, den wani si yu.” 21 Dan a piki den: „Na den sma di e yere a wortu fu Gado èn di e du san a taki, na mi m’ma nanga mi brada.”

22 Wan dei, Yesus nanga den disipel fu en go na ini wan boto èn a taigi den: „Kow abra go na a tra sei fu a se.” Ne den hari gwe nanga boto. 23 Ma di den ben de na pasi, a fadon na sribi. Ne wan bun tranga winti wai kon na tapu a se, watra bigin furu a boto èn den ben o sungu. 24 Dan den wiki Yesus èn den taki: „Leriman, Leriman, wi o dede!” Di a wiki, a bari a winti nanga den bigi skwala. Na so a winti nanga den bigi skwala saka èn ala sani kon rustig. 25 Ne a taigi den: „Pe a bribi fu unu de?” Ma den ben frede èn den ben ferwondru. Den taigi makandra: „Suma na a man disi? Srefi a winti nanga a watra e du san a taki.”

26 Dan den go na syoro na ini a kontren fu den Gerasasma na abrasei fu Galilea. 27 Ma di Yesus kmopo na ini a boto fu go na syoro, wan man fu a foto waka kon miti en. A man disi ben abi ogri yeye na en tapu. Wan heri pisi ten kba a man disi no ben weri krosi èn a no ben tan na ini wan oso, ma a ben e tan na mindri den grebi.* 28 Di a si Yesus, a bari tranga, a saka kindi leti na Yesus fesi èn nanga wan tranga sten a taki: „Yesus, Manpkin fu a Moro Hei Gado, fu san ede yu kon muilek wi? Mi e begi yu, no pina mi.” 29 (A ben taki disi fu di Yesus ben taigi na ogri yeye fu kmoto na a man tapu. Na omeni leisi kba na ogri yeye disi ben e kon na en tapu.* Someni leisi sma ben tai en nanga keti èn nanga bui èn den ben e hori wakti gi en, ma a ben hari den bui koti. Na ogri yeye ben tyari en go na presi pe nowan sma ben de.) 30 Yesus aksi en: „Fa yu nen?” A man taki: „Bigi Legre.” A taki disi fu di furu ogri yeye ben de na en tapu. 31 Den ogri yeye tan begi Yesus fu no seni den go na ini a dipi peti. 32 Dati meki den aksi en fu gi den primisi fu go na ini wan bigi ipi agu di ben e nyan drape na tapu a bergi. Dan a gi den primisi fu du dati. 33 Baka dati den ogri yeye kmoto na a man tapu, dan den go na ini den agu. Ne den agu lon go na a lanki fu a bergi, dan den fadon go na ini a se èn den dede na watra. 34 Den sma di ben e luku den agu si san psa. Ne den lon go ferteri a tori na ini a foto èn na den boitipresi.

35 Dan den sma kon luku san psa. Den kon na Yesus èn den si a man di ben abi ogri yeye na en tapu fosi. A ben e sdon na Yesus futusei, a ben weri krosi èn a ben de bun na en ferstan. Ne den kon frede. 36 Den sma di si a sani, ferteri den trawan fa a man di ben abi ogri yeye na en tapu, kon bun baka. 37 Dati meki furu fu den sma fu a kontren fu den Gerasasma aksi Yesus fu gwe fu drape, bika den ben kon frede srefsrefi. Baka dati a go na ini a boto fu gwe. 38 A man di ben abi ogri yeye na en tapu fosi, tan begi en efu a ben kan go nanga en. Ma a seni a man gwe èn a taki: 39 „Go na yu oso baka èn tan ferteri sma san Gado du gi yu.” Ne a man gwe èn na ini a heri foto a ferteri san Yesus ben du gi en.

40 Di Yesus drai kon baka, den sma prisiri srefsrefi èn den gi en wan switikon, fu di den alamala ben e ferwakti en. 41 Ma wan man di ben nen Yairus kon na en. A man disi ben de wan fesiman fu a snoga. A fadon na Yesus futu, dan a begi Yesus fu kon na en oso, 42 bika a wan-enkri* meisje fu en ben de fu dede. A meisje ben abi sowan 12 yari.

Di Yesus ben de na pasi fu go drape, den sma na en lontu ben pusu kon na en tapu. 43 Wan frow ben de drape tu di ben e lasi brudu 12 yari kba èn a no ben man feni nowan sma di ben man dresi en. 44 A waka kon na baka Yesus, a fasi den franya fu Yesus dyakti èn direk a no ben e lasi brudu moro. 45 Dati meki Yesus taki: „Suma fasi mi?” Di den alamala taki dati a no den, dan Petrus taki: „Leriman, den sma e tnapu na yu lontu èn den e pusu kon na yu tapu.” 46 Ma Yesus taki: „Wan sma fasi mi, bika mi firi taki krakti kmoto na ini mi.” 47 Di a frow ferstan taki Yesus ben sabi san psa nanga en, dan beifbeifi a kon na Yesus èn a saka kindi na Yesus futu. Na fesi ala sma a ferteri fu san ede a fasi Yesus èn fa a kon betre direk. 48 A taigi na uma: „Mi umapkin, a bribi fu yu meki yu kon betre. Meki sani waka bun gi yu.”

49 Yesus ben e taki ete, di wan sma fu Yairus oso kon taigi Yairus: „A meisje fu yu dede! No ferferi a Leriman moro.” 50 Di Yesus yere disi, a piki en: „No frede, na bribi yu musu bribi nomo, dan yu meisje o feni yepi.” 51 Di Yesus doro na a oso, dan a meki soso Petrus, Yohanes, Yakobus, nanga a p’pa nanga a m’ma fu a meisje go na insei nanga en. 52 Ala sma ben e krei èn den ben e sari trutru fu di a meisje dede. Dati meki a taki: „Un no krei moro, bika a no dede, ma a e sribi.” 53 Di den yere disi, den bigin lafu en, bika den ben sabi taki a dede. 54 Ma a hori a pkin na en anu, dan a taki: „Meisje, opo!” 55 Dan a meisje kon na libi* baka èn direk a opo. Baka dati Yesus taigi den sma fu gi a meisje wan sani fu nyan. 56 En p’pa nanga m’ma ben prisiri srefsrefi, ma a ben taigi den fu no ferteri nowan sma san psa.