Krutuman

19 Na a ten dati nowan kownu ben de na ini Israel. Wan Leifisma ben e tan wan pisi ten na wan farawe presi na Efrayim-bergikontren. Baka wan pisi ten a teki wan uma fu libi nanga en. Na uma ben de fu Betlehem na ini a kontren fu Yuda. 2 Ne na uma bigin huru. Te fu kaba na uma gowe libi a man èn a go na a oso fu en papa na Betlehem na ini Yuda, dan a tan drape fo mun langa. 3 Dati meki a masra fu na uma teki en futuboi nanga tu manburiki, dan a go suku na uma. Di a man miti na uma, a taki nanga en na wan switi fasi, fu di a ben wani taki a ben musu drai kon baka na oso. Dan na uma meki a man kon na ini en papa oso. Di a papa fu a yongu uma si a man, dan wantewante a waka go miti en, fu di a ben breiti srefisrefi. 4 Dati meki a papa fu a yongu uma suku wan fasi fu hori a man drape. Te fu kaba a man tan nanga en dri dei langa. Den ben e nyan èn dringi èn a man tan sribi drape.

5 Na a di fu fo dei, di den opo fruku mamanten soleki fa den ben gwenti, a man bigin seti sani fu gowe. Ma a papa fu a yongu uma taigi en: „Nyan wan pisi brede fu kisi krakti. Baka dati unu kan gowe.” 6 Sobun, den ala tu go sidon nyan èn dringi. Dan a papa fu a yongu uma taigi a man: „Mi e begi yu fu tan dyaso tideneti, dan wi o meki prisiri.” 7 Di a man ben wani gowe, a papa fu na uma begi en nomonomo fu tan. Dati meki a tan drape a neti dati tu.

8 Na a di fu feifi dei, di a man opo fruku mamanten, a papa fu a yongu uma taki: „Mi e begi yu, nyan wan sani fu kisi krakti.” Sobun, den draidrai teleki latilati bakadina. Den ala tu ben e nyan. 9 Dan a man opo fu gowe, makandra nanga en wefi èn a futuboi fu en, ma a papa fu a yongu uma taigi en: „Luku, dyonsro neti o fadon. Mi e begi unu fu tan dya tideneti. Son e dongo kaba. Tan dyaso tideneti, dan wi o meki prisiri. Tamara mamanten unu kan opo fruku fu waka un pasi go na oso.” 10 Ma a man no ben wani tan sribi drape. A opo, dan a gowe. A waka teleki a doro abrasei fu Yeibus, dati na Yerusalem. A ben de nanga den tu manburiki fu en di ben abi sadri na den tapu, nanga en wefi, èn nanga en futuboi.

11 Di den ben de krosibei fu Yeibus, a ben e bigin dungru kaba. Fu dati ede a futuboi taigi en basi: „Mi masra, meki wi koti go dyaso na a foto fu den Yeibus-sma fu sribi drape tideneti.” 12 Ma a basi fu en taigi en: „Wi no o koti go na wan foto pe trakondre sma e libi. Den sma dati a no Israelsma. Meki wi pasa go na a sei fu Gibeya.” 13 A taigi en futuboi tu: „Meki wi go na wan fu den presi na dati sei, dan wi o sribi na Gibeya, noso na Rama.” 14 Sobun, den waka go moro fara. Son ben e dongo kaba di den doro krosibei fu Gibeya na ini a kontren fu a lo fu Benyamin.

15 Dati meki den koti go na Gibeya fu sribi drape. Den go na ini a foto, dan den go sidon na a pren fu a foto. Ma nowan sma no ben aksi den fu kon sribi na den oso. 16 Te fu kaba, na mofoneti, den si wan owru papa e komoto na a gron pe a ben go wroko. Na owru papa ben de fu Efrayim-bergikontren, ma a ben e libi na Gibeya fu wan pisi ten. Den sma na ini a foto ben de fu a lo fu Benyamin. 17 Di na owru papa si a man di ben e sidon na a pren fu a foto, a frustan taki a man ben komoto fu wan tra presi. Dati meki a aksi a man: „Pe yu e go? Fu pe yu komoto?” 18 A man piki en: „Wi komoto fu Betlehem na ini a kontren fu Yuda èn wi e go na wan farawe presi na Efrayim-bergikontren. Na fu drape mi komoto, ma mi ben go na Betlehem na ini Yuda. Now mi e drai go baka na mi oso, ma nowan sma dyaso teki mi na ini en oso. 19 Mi masra, mi abi drei grasi nanga nyanyan gi den manburiki fu wi. Mi abi brede nanga win tu gi misrefi, gi na uma disi èn gi a futuboi di de nanga mi. Wi no e mankeri noti.” 20 Ma na owru papa taki: „Mi e bari yu wan switikon!* Efu yu e mankeri wan sani, dan mi o sorgu fu dati. Ma yu no musu tan sribi dyaso na a pren.” 21 Baka dati na owru papa tyari a man go na en oso èn a gi den manburiki nyanyan. Ne den sma go wasi den futu èn den bigin nyan èn dringi.

22 Di den ben e meki prisiri, dan wan tu wisiwasi man fu a foto lontu na oso. Den bigin pusu a doro, aladi den ben e taigi na owru papa di ben abi na oso: „Tyari a man di de na ini yu oso kon na doro, meki wi didon nanga en.” 23 Ne a man di ben abi na oso, go na dorosei èn a taigi den: „Nôno, mi brada. Mi e begi unu, no du ogri nanga a man disi, bika na ini mi oso a kon tan. Un no musu du a syen sani disi. 24 Mi e begi unu, teki mi umapikin di no sribi nanga wan man ete èn teki na uma fu a man tu. Mi o tyari den kon na dorosei, dan unu kan didon nanga den èn du nanga den san unu wani. Ma un no musu du a syen sani disi nanga a man.”

25 Ma den man no ben wani arki na owru papa. Dati meki a man teki en wefi, dan a tyari en go na dorosei. Ne den man didon nanga na uma èn heri neti den pina en teleki dei broko. Musudei mamanten den seni en gowe. 26 Di na uma drai kon baka na mamanten, dan a fadon na a mofodoro fu na oso fu na owru papa pe en masra ben de. A tan didon drape teleki dei kon krin. 27 Moro lati a mamanten dati, en masra opo fu gowe. Di a opo a doro fu na oso fu go na dorosei, a si taki en uma ben fadon na a mofodoro. En anu ben de na a doromofo ete! 28 A taigi na uma: „Opo, meki wi gowe.” Ma na uma no ben e piki a man. Ne a man teki en poti na tapu a buriki, dan a go na en oso.

29 Di a doro na en oso, a teki wan bigi nefi fu srakti meti, dan a koti en wefi na ini twarfu pisi. Baka dati a seni wan pisi go na ala sei fu Israel. 30 Ala sma di si a sani, taki: „Sensi a dei di den Israelsma komoto na Egepte te na a dei fu tide, noiti ete wan sma du so wan sani èn noiti ete wi si so wan sani. Prakseri bun san unu o du, dan un teki wan bosroiti.”