Yesaya
28 A o kba gi a moi kroon* fu den drunguman fu Efrayim!*
Den drunguman e si a foto fu den leki wan moi bromki tapu na ede fu a lagipresi di abi fatu gron.
Ma a moi bromki o kon flaw.
2 Luku! Yehovah o seni wan tranga sma kon di abi furu krakti.
Nanga bigi krakti a o trowe a kroon kon na gron.
A o de leki te dondru e bari bun tranga èn pispisi ijs e fadon kmoto fu hemel.
A o de leki wan bigi winti di e pori ala sani èn leki wan bun hebi sibibusi di e kon nanga dondru èn di e wasi ala sani gwe.
4 A moi bromki di kon flaw
tapu na ede fu a lagipresi di abi fatu gron,
o tron leki wan figa di e gro fosi a waran ten fu a yari doro.
Te wan sma si en, a o piki en èn a o nyan en direk.
5 Na a ten dati Yehovah di e tiri den legre o tron leki wan moi kroon èn leki wan moi krans gi den sma di tan abra fu en pipel. 6 A o meki den krutuman krutu sani na wan reti fasi* èn a o gi krakti na den sma di e feti nanga den feanti na a portu.
7 Srefi den priester nanga den profeiti lasi pasi fu win ede
èn sopi e meki den slingerslinger.
Den lasi pasi fu sopi ede.
Win bruya den.
Den e waka leki drunguman fu di den dringi sopi.
Den fisyun di den e si e kori den.
Den no e teki koni besroiti.
8 Den tafra fu den lai braak.
Nowan presi de sondro braak.
9 Den e taki: „Luku suma wani leri sma sani!
Luku suma wani kon ferteri trawan a boskopu di den yere!
Wi na pkin-nengre di no e dringi bobimerki moro?
Wi na pkin-nengre di den puru na bobi no so langa psa?
10 Bika ala yuru wi e yere: ’Disi na san a wet e taki, dati na san a wet e taki. Disi na san a wet e taki, dati na san a wet e taki.
Na disi un musu du, na dati un musu du. Na disi un musu du, na dati un musu du.
Pkinso fu disi, pkinso fu dati.’”
11 Fu dati ede, Gado o gebroiki wan tra pipel fu taki nanga a pipel disi. A pipel dati e taki wan tra tongo èn a gersi leki den e gagu. 12 Wan leisi a ben taigi a pipel disi: „Disi na wan presi pe unu kan rostu. Meki a sma di weri, rostu pkinso. Disi na a presi pe unu kan teki blo.” Ma den no ben wani yere. 13 Gi den, a o gersi leki Yehovah o taigi den:
„Disi na san a wet e taki, dati na san a wet e taki. Disi na san a wet e taki, dati na san a wet e taki.
Na disi un musu du, na dati un musu du. Na disi un musu du, na dati un musu du.
Pkinso fu disi, pkinso fu dati.”
Ma den no o arki. Fu dati ede, te den e waka
den o naki futu èn den o fadon go na baka.
Sma o broko den, den o kisi den nanga wan nèt èn den o fanga den.
Awinsi a bigi frudu psa,
a no o kon na wi,
bika wi meki leitori tron wi kibripresi
èn wi go kibri na sani di no tru.”
16 Dati meki a Moro Hei Masra Yehovah taki:
„Mi e poti wan ston leki fundament na ini Sion.
A kisi tesi èn a de a moro prenspari ukuston fu wan steifi fundament.
A sma di e bribi na ini en, no o bruya noiti.
Pispisi ijs fu hemel o pori a lei di unu ben teki leki kibripresi
èn fruduwatra o sungu ala den presi pe unu go kibri.
Te a bigi frudu kon,
a o masi unu.
19 Ibri leisi te a frudu kon
a o wasi unu gwe.
A o kon a wan m’manten baka a trawan,
na deiten èn na neti.
Na frede w’wan o meki den ferstan san den yere.”*
20 A bedi syatu tumsi fu wan sma d’don langalanga na en tapu.
A pisi krosi di wan sma e gebroiki fu tapu ensrefi na neti, smara tumsi fu a domru ensrefi na ini.
21 Bika Yehovah o opo du wan sani neleki fa a ben du dati na Perasim-bergi
èn na a lagipresi krosbei fu Gibeon.
A o du san a musu du èn a sani di a o du o de wan freimde sani.
A o du en wroko èn a wroko di a o du no o de wan aladei sani.
22 Fu dati ede un no musu meki spotu nanga a sani disi,
noso den banti di tai na un lontu o kwinsi unu moro nanga moro.
Bika mi yere fu a Moro Hei Masra Yehovah di e tiri den legre,
taki a besroiti fu pori a heri kondre.*
23 Un arki èn yere san mi abi fu taki.
Un poti prakseri na den sani di mi e taigi unu.
24 Na heri dei wan sma e plugu a gron fu sai siri?
Na heri dei a e wroko fu lusu a gron noso drai a doti?
25 Te a sreka a gron,
a e panyapanya a blaka dyira na a gron, ma a e sai a gewoon dyira* na ini a doti.
A abi wan presi pe a e sai tarwe, pe a e sai gierst èn pe a e sai groto.*
Boiti dati, a e sai spelt* na a lanki fu en gron.
27 Sma no e masi blaka dyira nanga a planga di den e gebroiki fu masi aleisi.
Den no e lolo wan wagi na tapu gewoon dyira fu puru den siri na den taki.
Na presi fu dati den e gebroiki wan fini tiki fu naki den siri fu blaka dyira puru
èn den e gebroiki wan bigi tiki gi gewoon dyira.
28 Te sma e puru aleisi na den tiki, dan den no e masi en kon fini ete, a no so?
Na lolo den e lolo na asiwagi na en tapu nomo
fu puru na aleisi na den tiki,
ma den no e masi en kon fini ete.