Esekièl

2 Ne a taigi mi: „Manpikin fu libisma, opo tanapu na tapu yu futu, bika mi wani taki nanga yu.” 2 Di a bigin taki nanga mi, en yeye kon na mi tapu. A meki mi opo tanapu na tapu mi futu, so taki mi ben kan arki en.

3 A taigi mi: „Manpikin fu libisma, mi e seni yu go na den Israelsma, wan pipel di opo densrefi teige mi. Neleki den afo fu den, den no hori den wèt fu mi èn den no e du dati te now ete. 4 Den na sma di no abi syen èn den tranga-ede. Mi o seni yu go na den èn na so yu musu bigin taki nanga den: ’Disi na san a Moro Hei Masra Yehovah taki.’ 5 Den na wan pipel di e opo densrefi teige mi. Awinsi den arki, noso den no arki, den o sabi taki wan profeiti ben de na den mindri.

6 Ma yu, manpikin fu libisma, no frede den èn no frede den sani di den o taki. Den na tranga-ede sma èn den de leki sani di e dyuku yu. Yu e tan na mindri kruktutere. Ma yu no musu frede den sani di den o taki èn no beifi te yu si den fesi fu den. Den na sma di e opo densrefi teige mi. 7 Awinsi den arki, noso den no arki, toku yu musu taigi den san mi taigi yu fu taki. Den na sma di e opo densrefi teige mi.

8 Manpikin fu libisma, arki san mi e taigi yu. No opo yusrefi teige mi neleki den sma disi di e opo densrefi teige mi. Opo yu mofo èn nyan a sani di mi o gi yu.”

9 Ne mi si wan sma e langa en anu kon na mi èn a ben abi wan bukulolo na ini en anu. 10 Pikinso-pikinso a opo a bukulolo na mi fesi. Na fesisei èn na bakasei fu a bukulolo sari singi nanga tra tori ben skrifi di ben meki sma geme èn krei.