Psalm
Gi a fesiman fu den pokuman. Wan psalm fu den bakapkin fu Korak. Wan Maskil.*
44 Gado, nanga wi yesi wi yere fu yu.
Den afo fu wi ferteri wi
san yu du na ini a ten fu den,
iya, san yu du langa ten psa.
2 Yu yagi den tra pipel
èn yu meki den afo fu wi tan na ini a kondre fu den pipel dati.
Yu strafu den sma di ben de na ini a kondre èn yu yagi den gwe.
3 A no nanga den eigi fet’owru den afo fu wi teki a kondre abra.
A no fu di densrefi ben tranga so, meki den kon fri,
ma na fu di yu abi bigi makti, fu di yu tranga èn fu di yu e du bun.
Yu du disi, fu di yu lobi den.
5 Na yu o gi wi krakti fu wini den feanti fu wi.
Na ini yu nen wi o trapu den wan di e opo densrefi teige wi.
6 Mi no e fertrow tapu a bo fu mi
èn mi fet’owru no o meki mi wini a feti.
7 Na yu kibri wi gi wi feanti.
Yu meki den sma di e teige wi, kisi syen.
8 Heri dei wi o gi Gado glori
èn wi o prèise en nen fu têgo. (Sela)
9 Ma now yu gwe libi wi èn yu gi wi syen.
Yu no e hari go feti makandra nanga den legre fu wi.
10 Ibri leisi yu e meki wi lon gi den feanti fu wi.
Den sma di e teige wi e teki san den wani.
11 Yu gi wi abra na den feanti fu wi. Den kiri wi leki skapu.
Yu panya wi go na ala sei fu grontapu.
12 Yu seri yu pipel gi wan lawlaw moni.
Yu no meki nowan winst srefi.
13 Yu meki wi tron sma di trawan e spotu.
Ala sma na wi lontu e lafu wi èn den e wiswasi wi.
14 Yu meki den sma fu den tra kondre koti odo gi wi.
Den sma fu den tra kondre e seki den ede.
15 Heri dei mi e firi syen.
Soso syen e kisi mi.
16 Na mi feanti e taki sani fu wiswasi mi èn den e kosi mi,
fu di den wani puru atibron na mi tapu.
17 Awinsi ala den sani disi psa nanga wi, tòg wi no fergiti yu
èn wi no broko a ferbontu fu yu.
18 Wi no drai baka gi yu
èn wi futu no kmoto na a pasi fu yu.
19 Ma yu meki wi lasi a strei na a presi pe den sabanadagu e tan.
Yu meki wi sari so te, taki a ben de neleki bigi dungru tapu wi.
20 Efu wi no e kari a nen fu wi Gado moro
noso efu wi e opo wi anu go na loktu fu begi wan tra gado,
21 dan na Gado srefi o kon sabi disi,
bika a sabi ala sani di de na ini wi ati.
22 Na fu yu ede meki ala ten baka sma e kiri wi.
Den e teki wi leki skapu di den e tyari go srakti.
23 Grantangi Yehovah, opo. Fu san ede yu e sribi ete?
Mi e begi yu, wiki! No gwe libi wi fu têgo.
24 Fu san ede yu e tapu yu fesi gi wi?
Fu san ede yu fergiti taki wi e pina èn taki sma e gens wi?
25 Sma meki wi fadon go na gron.
Iya, wi fadon langalanga na gron.
26 Mi e begi yu, kon yepi wi!
Ferlusu wi, fu di yu na wan Gado di e sori sar’ati.*