Markus skrifi en

5 Ne den doro abrasei fu a se na ini a kontren fu den Gerasasma. 2 Fa Yesus kmoto na ini a boto, wan man di ben abi wan ogri yeye na en tapu kmoto na mindri den grebi* èn a kon na en. 3 A man ben e libi na mindri den grebi èn nowan sma ben man tai en. Den no ben man tai en srefi nanga wan keti. 4 Omeni leisi den bui en na en futu èn den tai en nanga keti, ma a ben hari den keti koti èn a ben broko den bui na en futu. Nowan sma ben tranga nofo fu hori en. 5 Dei nanga neti a ben e tan bari na den berpe nanga den bergi èn a ben e koti ensrefi nanga ston. 6 Ma di a si Yesus farawe, a lon go na en èn a boigi gi en. 7 Dan a bari bun tranga: „Fu san ede yu kon muilek wi, Yesus, Manpkin fu a Moro Hei Gado? Sweri na Gado taki yu no o pina mi.” 8 A ben taki disi, fu di Yesus ben taigi en: „Kmoto na a man tapu, yu ogri yeye.” 9 Ma Yesus aksi na ogri yeye: „Fa yu nen?” A taigi Yesus: „Mi nen na Bigi Legre, bika wi de nanga furu.” 10 Dan a tan begi Yesus fu no seni den ogri yeye gwe fu a kondre.

11 Now wan bigi ipi agu ben e nyan drape na tapu a bergi. 12 Dati meki den ogri yeye begi en: „Meki wi go na ini den agu.” 13 Dan a meki den go. Ne den ogri yeye kmoto na a man tapu èn den go na ini den agu. Baka dati den agu lon psa a heri lanki fu a bergi èn den fadon go na ini a se. Sowan 2000 agu ben de èn alamala dede na ini a se. 14 Ma den sma di ben e sorgu den agu, lon go ferteri den sma na ini a foto èn na den boitipresi san ben psa. Ne den sma kon luku san psa. 15 Den kon na Yesus èn den si taki a man di ben abi wan bigi legre ogri yeye na en tapu, ben sdon èn a ben weri krosi. A ben de bun na en ferstan. Ne den sma kon frede. 16 Den sma di si a sani disi ferteri den tra sma san psa nanga a man di ben abi den ogri yeye na en tapu èn san psa nanga den agu. 17 Dati meki den begi Yesus fu gwe fu a kontren fu den.

18 Di Yesus ben e go na ini a boto, a man di ben abi ogri yeye na en tapu begi en efu a ben kan go nanga en. 19 Ma a no meki a man kon nanga en. Na presi fu dati a taigi en: „Go na den famiriman fu yu, dan ferteri den ala sani di Yehovah* du gi yu èn fa a ben abi sar’ati nanga yu.” 20 Dan a man gwe èn a bigin ferteri sma na Dekapolis* ala san Yesus du gi en èn ala den sma ben ferwondru.

21 Baka di Yesus drai go baka na abrasei nanga a boto, dan bun furu sma kon na en. A ben de na sekanti. 22 Dan Yairus, wan fu den fesiman fu a snoga, kon drape èn di a si Yesus a trowe ensrefi na Yesus futusei. 23 A begi Yesus furu leisi: „A meisje fu mi siki. A o dede. Grantangi, kon poti yu anu na en tapu, so taki a kan kon betre èn a kan tan na libi.” 24 Ne Yesus go nanga a man. Bun furu sma ben e waka na en baka èn den ben e pusu kon na en tapu.

25 Wan frow ben de drape tu di ben e lasi brudu 12 yari kba. 26 Na uma disi go suku yepi na omeni datra, ma den meki a nyan furu pina. A ben gebroiki ala en moni tu fu suku yepi, ma tòg a no ben kon betre. Na presi fu dati, sani ben kon moro ogri gi en. 27 Di a yere fu den sani di Yesus ben e du, a waka na mindri den sma go na baka Yesus. Ne a fasi en dyakti, 28 bika a ben prakseri: „Efu mi fasi en dyakti nomo, mi o kon betre.” 29 Fa yu si a fasi Yesus dyakti, a brudu stop lon. A ben firi na ini en skin taki a takru siki gwe èn taki a kon betre.

30 Direk Yesus firi taki krakti kmoto na ini en skin. Dati meki a drai luku den sma èn a aksi: „Suma fasi mi dyakti?” 31 Den disipel fu en taigi en: „Masra, omeni sma e pusu kon na yu tapu, ma tòg yu e aksi: ’Suma fasi mi?’” 32 Ma a ben e luku lontu fu si suma fasi en. 33 A frow ben e frede èn a ben e beifi fu di a ben sabi san psa nanga en. Tòg a kon na Yesus èn a saka kindi na en futusei, dan a ferteri en ala sani. 34 Yesus taigi a frow: „Mi umapkin, a bribi fu yu meki yu kon betre. No broko yu ede moro. Yu kon betre now fu a takru siki.”

35 Yesus ben e taki ete di wan tu sma di ben kmoto na a oso fu a fesiman fu a snoga kon drape. Den taki: „A meisje fu yu dede! No ferferi a Leriman moro.” 36 Ma Yesus yere san den taki èn a taigi a fesiman fu a snoga: „No frede, na bribi yu musu bribi nomo.” 37 Ne a meki soso Petrus, Yakobus nanga en brada Yohanes kon nanga en.

38 Di den doro na a oso fu a fesiman fu a snoga, a si taki den sma ben e meki wan lo b’bari èn den ben e bari krei. 39 Di a kon na insei a taigi den: „Fu san ede unu e bari èn e krei so? A pkin no dede, ma a e sribi.” 40 Di den yere disi, den bigin lafu en. Ma Yesus seni den alamala go na dorosei. Baka dati a teki a p’pa nanga a m’ma fu a pkin èn den disipel di ben de nanga en, dan a go na insei pe a pkin ben d’don. 41 Dan a hori na anu fu a pkin èn a taigi en: „Talita kumi.” Disi wani taki: „Meisje, mi e taigi yu: Opo!” 42 Direk a meisje opo èn a bigin waka. (A ben abi 12 yari.) Di en p’pa nanga m’ma si disi, den ben de nanga bigi prisiri. 43 Ma Yesus taigi den wan tu leisi* taki den no ben musu ferteri nowan sma san psa. A taigi den tu fu gi a pkin wan sani fu nyan.