Markus skrifi en

6 Baka dati a gwe fu drape èn a go na ini en eigi kontren. Den disipel fu en ben de nanga en tu. 2 Na Sabat-dei a bigin gi leri na ini a snoga. Furu fu den sma di ben de drape e arki en ben ferwondru èn den aksi: „Pe a man disi kmoto nanga den sani disi? Fu san ede na en kisi a koni disi èn fu san ede na en musu du den bigi wondru disi? 3 A no en na a temreman, a manpkin fu Maria èn a no en na a brada fu Yakobus, Yosef, Yudas nanga Simon? Den sisa fu en e tan dyaso tu tòg?” Dati meki den no ben wani bribi na ini en. 4 Ma Yesus taigi den: „Na ala presi den e lespeki wan profeiti. Ma na ini en eigi kontren, na mindri den famiriman fu en èn na ini en eigi oso sma no e lespeki en.” 5 Dati meki a no ben man du nowan bigi wondru drape. A wan-enkri sani di a ben man du, na taki a ben poti en anu na tapu wan tu siki sma èn taki a meki den kon betre. 6 Ja, a ben ferwondru taki den sma no ben wani bribi na ini en. Baka dati a go na ala den dorpu na ini a birti drape fu gi leri.

7 Dan a kari den 12 apostel kon. A bigin seni den tu na tu fu go preiki èn a gi den makti fu puru ogri yeye na sma tapu. 8 A taigi den tu taki den no ben musu tyari nowan tra sani, boiti wan tiki. Den no ben musu tyari nowan brede, nowan n’nyan-saka èn nowan moni* na ini den monisaka. 9 Den ben musu weri wan susu na den futu, ma den no ben musu weri tu krosi.* 10 A taigi den tu: „Efu wan sma teki unu na ini oso, dan tan drape teleki unu gwe fu a presi dati. 11 Efu wan presi de pe sma no wani teki unu noso den no wani arki unu, dan un musu kmoto drape èn un musu naki a doti puru na un futu. Dati musu de wan bewijs taki den du wan sani di no bun.” 12 Baka dati den go preiki taki sma musu abi berow. 13 Den puru furu ogri yeye na sma tapu, den lobi oli gi furu siki sma èn den ben meki den kon betre.

14 Now Kownu Herodes yere den sani disi, bika sma ben e taki fu Yesus na ala presi. Den ben e taki: „Yohanes a Dopuman kon na libi baka. Dati meki a man du den bigi wondru disi.” 15 Ma tra sma ben taki: „Na Elia.” Trawan baka ben e taki: „Na wan profeiti leki den wan fu fosten.” 16 Ma di Herodes yere disi, a taki: „Na Yohanes. Mi meki sma koti en ede puru, ma a kisi wan opobaka.” 17 Herodes ben seni sma go kisi Yohanes. Den ben tai en èn den ben poti en na straf’oso fu di Herodias, a frow fu Herodes en brada Filipus, ben wani dati. Herodes ben trow nanga Herodias 18 èn na omeni leisi kba Yohanes ben taigi Herodes: „A no bun taki yu teki a frow fu yu brada.” 19 Herodias ben hori Yohanes na ati èn a ben wani kiri en. Ma a no ben man 20 fu di Herodes ben abi lespeki gi Yohanes, bika a ben de wan bun èn santa man. Dati meki a no ben wani meki wan sani psa nanga Yohanes. Te Herodes ben yere san Yohanes ben abi fu taki, a no ben sabi san fu du, ma tòg a ben lobi arki en ibri tron baka.

21 Ma wan dei Herodias kisi na okasi fu du san a ben wani. Herodes ben sreka wan fesa tapu en feryardei. A ben aksi den bigiman fu kondre, den srudati-edeman, nanga den heihei sma fu Galilea fu kon nyan na a fesa. 22 Na umapkin fu Herodias kon na insei èn a dansi. Herodes nanga den sma di ben sdon nanga en na tafra ben lobi fa a ben e dansi. Dati meki a kownu taigi na umapkin: „Aksi mi ala san yu wani, dan mi o gi yu dati.” 23 Herodes ben sweri gi na umapkin: „Ala san yu e aksi mi, mi o gi yu, awinsi na afu fu mi kownukondre.” 24 Dati meki na umapkin go na dorosei èn a aksi en m’ma: „San mi musu aksi?” A m’ma taki: „Aksi en na ede fu Yohanes a Dopuman.” 25 Ne na umapkin lon go na insei na a kownu, dan a taki: „Mi wani taki nownow yu musu gi mi na ede fu Yohanes a Dopuman na tapu wan plata preti.” 26 A kownu ben sari srefsrefi, ma tòg a no ben wani taigi na umapkin taki a no wani, fu di a ben meki wan sweri na fesi den sma di ben sdon drape nanga en na tafra. 27 Dati meki direk a kownu taigi wan fu den waktiman fu en fu tyari na ede fu Yohanes kon gi en. Dan a waktiman gwe èn a koti Yohanes ede puru na ini straf’oso. 28 Baka dati a tyari na ede kon na tapu wan plata preti, a gi na umapkin a preti èn na umapkin tyari disi go na en m’ma. 29 Di den disipel fu Yohanes yere disi, den kon teki a dedeskin fu en èn den poti en na ini wan grebi.

30 Den apostel kon tnapu lontu Yesus, dan den ferteri en ala san den du èn san den ben leri sma. 31 Ne a taigi den: „Kon meki wi w’wan go na wan rustig presi, dan unu kan rostu pkinso.” A ben taki disi fu di furu sma ben tan kon na en èn den disipel no ben abi ten fu nyan srefi. 32 Dati meki den teki boto fu go na wan rustig presi pe den w’wan ben kan de. 33 Ma sma si di den e gwe èn furu sma ben kon sabi dati tu. Nanga futu sma fu ala den foto lon go drape èn den doro fosi den. 34 Di Yesus kmoto na ini a boto, a si bun furu sma. A ben sari den, bika den ben de leki skapu di no abi wan skapuman. Dan a bigin leri den furu sani.

35 Di a ben kon lati kba, den disipel fu en kon na en èn den taki: „A presi fara èn a lati kba. 36 Seni den sma gwe, so taki den kan go na den dorpu na ini a birti èn na den pkin foto fu bai wan sani fu nyan.” 37 A piki den: „Na unu musu gi den wan sani fu nyan.” Ne den taigi en: „Yu wani taki wi musu go bai brede gi so furu sma? Wi o abi 200 solfru moni* fanowdu fu man du dati. 38 A taigi den: „Omeni brede unu abi? Un go luku.” Baka di den go luku, den taki: „Feifi brede nanga tu fisi.” 39 Dan a taigi ala den sma fu go sdon na ini grupu na tapu a grun grasi. 40 Na so den sma go sdon na ini grupu fu 100 sma èn na ini grupu fu 50 sma. 41 Dan a teki den feifi brede nanga den tu fisi, a luku go na hemel èn a taki Gado tangi. Baka dati a broko den brede èn a gi den disipel fu prati gi den sma. A prati den tu fisi èn a gi ala den sma. 42 Na so ala den sma nyan den bere furu. 43 Baka dati den furu 12 baskita nanga den pisi brede di ben tan abra. Fisi ben tan abra tu. 44 Feifi dusun man nyan fu den brede dati.

45 Direk baka dati a taigi den disipel fu en fu teki a boto go na abrasei, na a sei fu Betsaida. Dan en ben o tan na baka fu seni den sma gwe. 46 Baka di a taki den odi, a go na wan bergi fu begi. 47 Di neti fadon a boto ben de na mindrisei fu a se, ma en w’wan ben de na syoro. 48 A si taki a ben hebi gi den disipel fu tyari a boto, fu di a winti ben wai bun tranga kon na den tapu. Dati meki na musdei* a waka na tapu a se fu kon na den, ma a ben du neleki a ben o waka psa den. 49 Di den si taki a e waka na tapu a se, den taki: „San na a sani dati?” Ne den bari. 50 Den alamala frede di den si en. Ma direk a taigi den: „Na mi, no frede.” 51 Dan a kren go na ini a boto èn a winti saka. Den no ben man bribi san den si. 52 Den no ben ferstan ete san a wondru fu den brede ben wani taki. A ben tranga gi den fu ferstan.

53 Di den abra a se, den doro na a kondre Geneisaret èn den libi a boto drape na a syoro. 54 Ma di den kmoto na ini a boto, sma si taki na en. 55 Sma fu a heri kontren drape lon kon èn den tyari siki sma kon na tapu bedi na a presi pe den ben yere taki a de. 56 Na ala dorpu noso foto noso boitipresi pe a ben go, sma ben e tyari siki sma kon na den w’woyo èn den ben e begi en efu den ben kan fasi den franya fu en dyakti nomo. Ala sma di ben fasi den franya ben kon betre.