Markus skrifi en

9 A taigi den tu: „Unu kan bribi mi: Sonwan fu unu di e tnapu dyaso no o dede fosi den si a Kownukondre fu Gado bigin tiri.” 2 Siksi dei baka dati, Yesus tyari Petrus, Yakobus nanga Yohanes go na tapu wan hei bergi èn nowan tra sma ben de nanga den. Dan leti na den fesi Yesus kenki. 3 Den krosi fu en bigin brenki èn den ben weti moro leki fa iniwan sma na grontapu ben kan meki wan krosi kon weti. 4 Ne den si Elia nanga Moses tu èn den man disi ben e taki nanga Yesus. 5 Dan Petrus taigi Yesus: „Leriman, a bun taki wi dya. Kow meki dri tenti, wán gi yu, wán gi Moses nanga wán gi Elia.” 6 Petrus ben taki disi, fu di a no ben sabi san a ben musu taki. En nanga den trawan ben frede srefsrefi. 7 Ne wan wolku kon èn a tapu den. Dan wan sten ben de fu yere na ini a wolku. A ben taki: „Disi na mi Manpkin, a wan di mi lobi. Un arki en.” 8 Ma di den luku lontu den si taki nowan tra sma ben de moro nanga den, boiti Yesus.

9 Di den ben e saka kmoto fu a bergi, a taigi den krin taki den no ben musu ferteri nowan sma san den si, solanga a Manpkin fu libisma no kon na libi baka. 10 Dati meki den hori a tori gi densrefi, ma den ben taki nanga makandra san na opobaka disi ben wani taki. 11 Dan den aksi en: „Fu san ede den leriman fu a Wet e taki dati Elia musu kon fosi?” 12 A taigi den: „A tru taki Elia musu kon fosi èn taki a o meki ala sani kon bun baka. Ma dan fu san ede Gado Buku e taki dati a Manpkin fu libisma musu nyan furu pina èn taki sma o wiswasi en? 13 Ma mi e taigi unu: Te yu luku en bun, dan Elia kon kba èn den du nanga en san den wani, soleki fa Gado Buku ben taki fu en.”

14 Di den waka go miti den tra disipel, dan den si bun furu sma e tnapu lontu den disipel èn den leriman fu a Wet ben e hartaki nanga den. 15 Ma di den sma si Yesus, den ferwondru* èn den lon go na en fu gi en odi. 16 Dan a aksi den: „Fu san ede unu e hartaki nanga den?” 17 Ne wan fu den sma piki en: „Leriman, mi tyari a boi fu mi kon na yu, bika a abi wan yeye na en tapu di meki taki a no man taki. 18 Awinsi pe a boi de, solanga na ogri yeye kon na en tapu, a e trowe en na gron, dan en mofo e puru skuma, a e kaw tifi èn a e kon swaki. Mi aksi den disipel fu yu fu yagi a yeye puru na a boi tapu, ma den no ben man.” 19 Dan a piki den sma: „Un sma di no abi bribi, o langa mi musu tan nanga unu ete? O langa mi musu ferdrage unu ete? Tyari en kon gi mi.” 20 Dati meki den tyari en kon gi en. Ma fa a yeye si Yesus, a meki a boi kisi stoipi. Baka di a boi fadon, a ben e lolo na gron èn en mofo ben e puru skuma. 21 Dan Yesus aksi a p’pa: „O langa kba a sani disi e psa nanga en?” A p’pa taki: „Sensi di a pkin. 22 Ibri leisi a yeye e trowe en go na ini faya èn na ini watra fu kiri en. Ma efu yu man du wan sani, dan abi sar’ati nanga wi èn yepi wi.” 23 Yesus taigi en: „Fu san ede yu e taki: ’Efu yu man’? Gi wan sma di abi bribi ala sani man.” 24 Direk a p’pa fu a boi bari: „Mi abi bribi! Yepi mi efu mi e mankeri bribi!”

25 Di Yesus si taki furu sma ben e lon kon na den, a pir’ai gi na ogri yeye èn a taigi en: „Yu ogri yeye di e meki sma babaw èn dofu, mi e taigi yu: Kmoto na a boi tapu èn no go na en tapu moro!” 26 A yeye bari bun tranga èn a meki a boi kisi stoipi omeni leisi. Baka dati a kmoto na a boi tapu èn a ben gersi leki a boi dede. Dati meki wan lo fu den sma taki: „A dede!” 27 Ma Yesus hori a boi na en anu meki a opo, dan a boi opo tnapu. 28 Baka dati Yesus nanga den disipel fu en go na ini wan oso. Di nowan tra sma ben de nanga den, den aksi en: „Fu san ede wi no ben man puru na ogri yeye na a boi tapu?” 29 A taigi den: „Na begi w’wan kan puru den sortu yeye disi.”

30 Den gwe fu drape èn den waka psa na ini Galilea, ma a no ben wani meki nowan sma sabi. 31 A ben gi den disipel fu en leri èn a taigi den: „Wan sma o gi a Manpkin fu libisma abra na den feanti fu en èn den o kiri en. Ma awinsi den kiri en, baka dri dei a o kon na libi baka.” 32 Den no ben ferstan san a ben e taki, ma den ben frede fu aksi en.

33 Baka dati den doro na Kaperna-um. Di a ben de na ini na oso, a aksi den: „Fu san unu ben e meki trobi di un ben de na pasi?” 34 Den tan tiri, bika di den ben de na pasi, den ben e meki trobi suma fu den na a moro bigiwan. 35 Ne a go sdon, dan a kari den 12 apostel kon èn a taigi den: „Efu wan sma wani de a foswan, dan a musu de a lastiwan fu ala sma èn a musu dini ala sma.” 36 Dan a teki wan yongu pkin, a meki a pkin kon tnapu na den mindri, a hori a pkin na en skowru èn a taigi den: 37 „Efu wan sma e teki den sortu yongu pkin disi na ini mi nen, dan a sma dati e teki mi tu. A sma di e teki mi, no e teki mi w’wan, ma a e teki a sma tu di seni mi kon.”

38 Yohanes taigi en: „Leriman, wi si wan man di ben gebroiki yu nen fu yagi ogri yeye puru na sma tapu. Wi pruberi fu tapu en, bika a no ben waka nanga wi.” 39 Ma Yesus taki: „Un no musu pruberi fu tapu en, bika efu wan sma e du wan bigi wondru na ini mi nen, dan a no o de gaw fu taki takru fu mi. 40 Bika a sma di no de teige wi, e horbaka gi wi. 41 Efu wan sma e gi unu wan kan watra fu dringi fu di unu na disipel fu Krestes, dan unu kan bribi mi taki a sma dati o kisi en pai seiker. 42 Ma efu wan sma e meki taki wan fu den pkinwan disi di e bribi na ini mi fadon, dan a moro bun taki den anga wan bun bigi miriston na en neki èn tyari en go trowe na se.

43 Efu yu anu e meki yu sondu, dan koti en puru. A moro bun te yu e kisi a libi leki wan malengri sma, leki te den trowe yu nanga ala tu anu go na ini Gehena,* a faya di nowan sma man kiri. 44* —— 45 Efu yu futu e meki yu sondu, dan koti en puru. A moro bun taki yu e kisi a libi leki wan sma di lan, leki te den trowe yu nanga ala tu futu go na ini Gehena.* 46* —— 47 Efu yu ai e meki yu sondu, dan trowe en gwe. A moro bun taki yu e go na ini a Kownukondre fu Gado nanga wán ai nomo, leki te den trowe yu nanga ala tu ai go na ini Gehena* 48 pe woron no e dede èn pe sma no man kiri a faya.

49 Gado o kanti faya na tapu ala sma,* neleki fa wan sma e kanti sowtu na tapu n’nyan. 50 Sowtu na wan kfalek bun sani. Ma efu sowtu no abi tesi moro, dan san unu o du fu meki a kisi tesi baka? Un musu abi sowtu na ini un libi èn tan libi bun nanga makandra.”