Lukas skrifi en

14 Wan leisi na wan Sabat-dei, a go nyan na a oso fu wan edeman fu den Fariseiman èn den sma ben luku finfini san a ben o du. 2 Ne wan man kon na en fesi di ben abi wan siki* di ben meki en skin sweri. 3 Dati meki Yesus aksi den Fariseiman nanga den sma di ben sabi a Wet bun: „A fiti fu dresi sma na a Sabat-dei?” 4 Ma den no taki noti. Ne a hori a man, a meki a kon betre, dan a seni en gwe. 5 A taigi den sma: „Efu yu manpkin of yu mankaw fadon go na ini wan peti na a Sabat-dei, dan yu no o hari en puru direk?” 6 Den no ben man piki en.

7 Baka dati, a ferteri wan agersitori na den sma di ben kisi wan kari fu kon drape fu di a ben si taki den ben go sdon na den moro bun presi. A taigi den: 8 „Te wan sma kari yu kon na wan trowfesa, dan yu no musu go sdon na a moro bun presi. Kande a sma disi kari wan trawan kon tu di prenspari moro yu, 9 dan a sma di gi yu nanga a trawan wan kari, o kon taigi yu: ’Meki a man disi sdon na a presi disi.’ Yu o kisi syen èn yu o abi fu go sdon na a moro lagi presi. 10 Ma te yu kisi wan kari, go sdon na a moro lagi presi, dan a sma di gi yu a kari o kon taigi yu: ’Mi mati, go sdon na wan moro bun presi.’ Dan yu o kisi grani na fesi ala den tra sma di de drape. 11 Bika den o saka ibri sma di e hei ensrefi èn den o hei ibri sma di e saka ensrefi.”

12 Baka dati, a taigi a sma di ben gi en a kari: „Te yu o aksi sma fu kon nyan na brekten noso na neti, dan no kari yu mati, yu brada, yu famiri, noso den guduman di e libi na ini yu birti. Kande den o gi yu wan kari baka, dan a o de leki den pai yu baka. 13 Ma te yu o hori wan fesa, dan kari den pôtisma kon, den malengrisma, den lansma nanga den brenisma. 14 Dan yu o de koloku, bika den no abi noti fu pai yu baka. Na Gado o pai yu baka te den sma di du san bun o kon na libi baka.”

15 Di wan fu den sma di ben kon drape yere den sani disi, a taigi Yesus: „A sma di o nyan* na ini a Kownukondre fu Gado, de koloku.”

16 Yesus taigi en: „Wan man ben o hori wan bigi fesa* èn a ben kari wan lo sma kon. 17 Di a yuru doro fu nyan, a seni en srafu go taigi den sma di kisi wan kari: ’Un kon, bika ala sani sreka kba.’ 18 Ma ala den sma taki dati den no man kon. A foswan taki: ’Mi bai wan gron èn mi musu go luku en. Mi e begi yu, gi mi pardon, mi no o man kon.’ 19 Wan trawan taki: ’Mi bai tin kaw èn mi o go luku den. Mi e begi yu, gi mi pardon, mi no o man kon.’ 20 Wan trawan taki tu: ’A no langa di mi trow. Dati meki mi no o man kon.’ 21 Ne a srafu kon ferteri en masra den sani disi. Dan a masra fu na oso ati bron srefsrefi èn a taigi a srafu: ’Go es’esi na den bigi strati èn na den pkin pasi fu a foto, dan yu tyari den pôtisma, den malengrisma, den brenisma nanga den lansma kon.’ 22 Di a srafu drai kon baka, a taki: ’Masra, mi du san yu taigi mi, ma presi de ete.’ 23 Dan a masra taigi a srafu: ’Go na den pasi di de dorosei fu a foto èn dwengi den sma fu kon na insei, so taki mi oso kon furu. 24 Bika mi e taigi unu: Nowan fu den sma di kisi wan kari o tesi a n’nyan fu mi.’”

25 Bigi grupu sma ben e waka nanga Yesus. A drai luku den èn a taigi den: 26 „Wan sma di e kon na mi, no musu lobi en p’pa, en m’ma, en frow, en pkin, en brada nanga en sisa, iya, a no musu lobi en eigi libi* srefi, noso a no man de mi disipel. 27 Efu wan sma no e tyari en pinapostu* èn a no e waka na mi baka, dan a no man de wan disipel fu mi. 28 Efu yu wani bow wan toren, dan yu o go sdon fu teri den kostu fosi, tòg? Na so yu o sabi efu yu abi nofo moni fu klari a wroko. 29 Efu yu no teri den kostu, dan kande yu o poti a fundament, ma yu no o man klari a wroko èn ala sma di e tnapu e luku o bigin lafu yu. 30 Den o taki: ’A man disi bigin bow, ma a no ben man klari a wroko.’ 31 Efu wan kownu di abi 10.000 srudati o go feti nanga wan kownu di abi 20.000 srudati, dan a o go taki nanga den raiman fu en fosi fu luku efu a o man wini a tra kownu, tòg? 32 Efu a no o man wini, dan te a tra kownu de fara ete, a o seni boskopuman go begi a tra kownu fu no feti nanga en. 33 Na so a de nanga unu tu: Nowan fu unu kan de wan disipel fu mi efu a no e libi den sani di a abi, na baka.

34 A tru taki sowtu na wan bun sani. Ma efu a sowtu lasi en krakti, dan san o man gi en tesi baka? 35 A no bun srefi fu gebroiki en leki doti noso leki mest. Sma e trowe en gwe. A sma di abi yesi fu arki, meki a arki.”