Gi den Romesma
11 Ma disi wani taki dati Gado drai en baka gi en pipel? Kwetkweti! Bika misrefi na wan Israelsma, wan bakapkin fu Abraham èn mi na fu a lo fu Benyamin. 2 Gado no drai en baka gi en pipel di ben de a foswan di a teki. Unu no sabi san Gado Buku e taki fu Elia? Di Elia ben e ferteri Gado fu den ogri di Israel du, 3 a taki: „Yehovah,* den kiri den profeiti fu yu èn den broko den altari fu yu. Mi w’wan tan abra èn now den e suku fu kiri mi.” 4 Ma san Gado taigi en? „Mi abi 7000 man ete di no boigi gi Bâal.” 5 Na so wan tu sma tan abra tu na ini a ten disi. Gado sori den bun-ati di a teki den. 6 Sobun, na bun-ati meki taki Gado teki den, a no den sani di den du. Bika efu dati ben de so, dan a bun-ati di Gado sori no ben o de trutru bun-ati.
7 San wi sa taki dan? Den Israelsma no kisi a sani di den ben e suku fayafaya, ma na den sma di Gado teki kisi en. Den trawan kon tranga-ede. 8 A de soleki fa Gado Buku taki: „Gado meki den kon de leki sma di e sribi dipi. Te na a dei fu tide a gi den ai di no man si èn yesi di no man yere.” 9 David ben taki tu: „Meki den fesa fu den tron wan krafana gi den, wan val, wan sani di e meki den fadon èn wan sani di o meki den kisi strafu. 10 Meki den ai fu den kon dungru, so taki den no man si èn meki a baka fu den kon kron fu ala ten.”
11 Ma disi wani taki dati den stotu den futu fadon taki den no man opo moro? Kwetkweti! Ma fu di den sondu, meki den trakondre sma kan kisi ferlusu now èn dati meki den Dyu kon dyarusu. 12 We, efu a sondu fu den Dyu meki taki grontapu kisi blesi èn efu den trakondre sma kisi blesi fu di den Dyu no de so furu moro leki fosi, dan moro blesi o kon te den alamala de makandra.
13 Now mi o taki nanga unu di no de Dyu. Mi na wan apostel gi den sma di no de Dyu èn mi e si a wroko di Gado gi mi leki wan grani. 14 Kande disi o meki mi eigi pipel kon dyarusu, so taki mi kan ferlusu wan tu fu den. 15 Di Gado no ben wani den Dyu moro, den sma fu grontapu kisi na okasi fu kon bun nanga Gado. Efu dati de so, dan fa a o de te Gado teki den baka? A o de leki den kon na libi baka. 16 Efu a fosi pisi fu a blon santa fu di a gi leki ofrandi na Gado, dan a tra pisi fu a blon santa tu. Efu a rutu fu wan bon santa, dan den taki fu a bon santa tu.
17 Gado broko wan tu taki puru fu na olèifbon, dan a teki yu di de leki wan taki fu wan busi-olèifbon èn a fasi yu na mindri den tra taki fu na olèifbon, so taki yu kan kisi krakti fu a rutu fu a bon tu. 18 No denki taki yu bun moro den taki di broko puru. Ma efu tòg yu denki taki yu bun moro den,* dan no fergiti taki a no yu e tyari a rutu, ma na a rutu e tyari yu. 19 Kande yu o taki: „Gado broko den taki puru fu fasi mi na a bon.” 20 Dati tru! A broko den taki dati puru fu di den no ben e bribi, ma yu tan fu di yu e bribi. Luku bun. Yu no musu abi bigifasi. 21 Bika efu Gado ben man puru den taki di de fu a bon srefi, dan a man puru yu tu. 22 Hori na prakseri taki Gado abi bun-ati, ma a e strafu sma tu. Gado e strafu den wan di fadon gwe. Ma solanga yu e tyari yusrefi na wan fasi di a feni bun, a o sori yu bun-ati. Efu yu no e du dati, dan a o koti yu puru tu. 23 Ma efu den e bribi baka, dan Gado o fasi den na a bon, fu di a man fasi den baka na a bon. 24 Bika efu a koti yu puru fu a busi-olèifbon èn a fasi yu na a olèifbon di sma e kweki, aladi dati no de a gwenti, dan yu kan de seiker taki a man fasi den taki baka na den eigi olèifbon!
25 Brada nanga sisa, mi o ferteri unu a santa kibritori disi, so taki unu no denki taki unu koni: Son Israelsma kon tranga-ede èn disi o tan so teleki a heri grupu fu den trakondre sma di Gado kari, kon na insei. 26 Na so fasi heri Israel o kisi ferlusu. A de soleki fa Gado Buku taki: „A ferlusuman o kmoto na Sion èn a o puru ala den ogri di Yakob du. 27 Disi na a ferbontu di mi meki nanga den, te mi o puru den sondu fu den.” 28 A tru taki den na feanti fu Gado fu di den no wani arki a bun nyunsu èn unu kisi wini fu dati. Ma tòg Gado lobi den èn a kari wan tu fu den, bika na dati a ben pramisi den afo fu den. 29 Bika te Gado e gi sma kado èn te a e kari sma, dan dati no e hati en bakaten. 30 A ben de so taki unu ben trangayesi Gado fosi, ma now a sori unu sar’ati fu di den trangayesi. 31 Sobun, na a trangayesi fu den meki taki Gado sori unu sar’ati, ma now Gado kan sori den sar’ati tu. 32 Gado libi ala sma meki den trangayesi en, so taki a kan sori sar’ati gi ala sma.
33 Iya, den blesi fu Gado furu srefsrefi! Nowan sma man marki a koni nanga a sabi fu en! Wi no man ferstan fa a e krutu sani èn wi no man kon sabi fa den pasi fu en de! 34 Bika Gado buku taki: „Suma kon sabi fa Yehovah* e denki èn suma kan gi en rai?” 35 Noso: „Suma ben gi Gado wan sani taki Gado musu pai en baka?” 36 Bika ala sani kmoto fu en, na en meki den èn na fu di a wani meki den kon de. Na en musu kisi glori fu têgo. Amen.