A fosi brifi gi den Korentesma

5 Mi yere taki sma de na un mindri di e huru.* Den e du sani di srefi den trakondre sma no e du. Wan man na un mindri e libi nanga* a frow fu en eigi p’pa. 2 Dan unu e meki bigi fu a sani dati? A no sari unu musu sari? A no puru un musu puru a man di du a sani dati, na un mindri? 3 Mi no de nanga unu, ma mi e prakseri unu. A de leki mi de drape nanga unu èn mi krutu a man kba fu san a du. 4 Te unu e kon makandra na ini a nen fu wi Masra Yesus, un musu sabi taki mi e prakseri unu èn taki a krakti fu Masra Yesus de nanga unu. 5 Dati meki un musu libi so wan man gi Satan so taki a sondu libi fu en no o abi krakti tapu trawan na ini a gemeente. Na so a denki fu den sma na ini a gemeente o tan krin na a dei fu Masra.

6 A no bun taki unu e meki bigi fu a sani dati. Unu no sabi taki na pkinso gist* nomo e meki ala a blon sweri? 7 Puru na owru blon di abi gist na ini, so taki unu kan tron nyun blon sondro gist. Fu taki en leti, unu de sondro gist fu di Krestes, a Paska-ofrandi fu wi, dede gi wi. 8 Fu dati ede, te unu e hori a fesa* un no musu du dati nanga owru blon di abi gist èn nanga gist fu sondu nanga ogridu. Ma meki wi gebroiki brede sondro gist, dati wani taki wi musu libi wan krin libi èn wi no musu lei.

9 Mi ben skrifi unu na ini mi brifi taki un no musu bemui* nanga sma di e huru.* 10 Ma disi no wani taki dati un no musu bemui srefsrefi nanga den sma fu grontapu di e huru,* noso nanga gridiman, noso sma di e puru sani na tra sma anu nanga tranga, noso sma di e anbegi falsi gado. Bika efu dati ben musu de so, dan unu ben o abi fu kmoto na grontapu. 11 Ma now mi e skrifi unu taki un no musu bemui* nanga wan sma di e kari ensrefi wan brada, ma di e huru,* di gridi, di e anbegi falsi gado, di e kosi trawan, di e dringi teleki a drungu, noso di e puru sani na tra sma anu nanga tranga. Un no musu nyan srefi nanga so wan sma. 12 Bika fu san ede mi ben o krutu den sma di no de na ini a gemeente? Na unu musu krutu den wan na ini a gemeente, 13 aladi Gado e krutu den sma di no de na ini a gemeente. „Puru na ogriman na un mindri.”