Gi den Romesma

8 Fu dati ede, Gado no o krutu den sma di de wán nanga Krestes Yesus. 2 Bika a wet fu a yeye* meki unu kon fri fu a wet fu sondu nanga dede. A yeye disi e gi libi na den sma di de wán nanga Krestes Yesus. 3 A Wet no ben man ferlusu sma fu di libisma abi sondu. Ma Gado du san a Wet no ben man du. A seni en eigi Manpkin kon leki wan libisma fu puru sondu. Na so a krutu a sondu di de na ini libisma skin. 4 Disi e meki taki wi man du den sani di Gado feni bun soleki fa skrifi na ini a Wet. Sobun, wi no e meki a sondu skin basi wi moro, ma wi e meki a yeye fu Gado tiri wi. 5 Bika den sma di e du san a skin wani, e prakseri soso den sani di abi fu du nanga a skin. Ma den sma di e du san a yeye wani, e prakseri soso den sani di abi fu du nanga a yeye. 6 Te wan sma e tan prakseri den sani di a skin wani, dan a bakapisi fu dati na dede. Ma te wan sma e tan prakseri den sani di abi fu du nanga a yeye, dan a bakapisi fu dati na libi nanga freide. 7 Te wan sma e tan prakseri den sani di a skin wani, dan en na wan feanti fu Gado, fu di a skin no e gi yesi na a wet fu Gado. Fu taki en leti, a no man gi yesi na a wet. 8 Fu dati ede, den sma di e du san a skin wani no man meki Gado prisiri.

9 Efu a yeye fu Gado e tan na ini unu trutru, dan unu no o du san a skin wani, ma unu o du san a yeye wani. Ma efu wan sma no abi a denki* fu Krestes, dan a sma disi no de fu Krestes. 10 A skin fu unu e dede fu di a abi sondu. Ma efu unu de wán nanga Krestes, dan a yeye e gi unu libi fu di Gado e si unu leki ret’ati sma. 11 A yeye fu Gado meki Yesus kon na libi baka. Efu a yeye dati e tan na ini unu, dan Gado, di wiki Krestes Yesus baka, o meki a skin fu unu di e dede gwe kon na libi baka tu fu di en yeye de na ini unu.

12 Sobun brada, wi no musu meki wi skin basi wi èn wi no musu du san a skin wani. 13 Bika efu unu e libi soleki fa a skin wani, dan unu o dede seiker. Ma efu unu e meki a yeye yepi unu fu no du nowan sani moro di a skin wani, dan unu o libi. 14 Bika ala den sma di a yeye fu Gado e tiri, na manpkin fu Gado trutru. 15 A yeye fu Gado no meki wi tron srafu èn a no e meki wi frede baka. Ma a yeye meki taki Gado teki unu leki en manpkin èn a e meki wi bari: „Abba,* Papa!” 16 A yeye fu Gado srefi e sori wi krin taki wi na pkin fu Gado. 17 Fu dati ede, efu wi na pkin fu Gado, dan wi o kisi wan gudu fu en tu. Ja, wi o kisi a srefi gudu di Krestes kisi. Ma dan wi musu nyan pina neleki en, so taki wi kan kisi glori tu neleki en.

18 Dati meki mi denki taki a pina di wi e nyan now, na noti te mi e prakseri a glori di wi o kisi. 19 Bika ala den sani di Gado meki e wakti fayafaya teleki a glori fu den manpkin fu Gado de fu si. 20 Bika den sani di Gado meki kon abi wan libi di no abi waarde. A no fu di densrefi wani, ma na fu di Gado gi pasi taki den kon de so. Ma tòg howpu de 21 taki den sani di Gado meki o kon fri fu wan skin di e dede gwe. Na so den o kon fri leki pkin fu Gado. Disi na wan kfalek moi sani. 22 Bika wi sabi taki ala den sani di Gado meki e tan geme èn den alamala abi pen te now ete. 23 Boiti dati, wi kisi a santa yeye di de a fosi pisi fu a pai di wi o kisi. Ma wi srefi e geme tu na ini wi ati aladi wi e wakti fayafaya teleki Gado o teki wi leki en manpkin èn teleki a o gebroiki a lusu-paiman fu fri wi fu a skin fu wi. 24 Di Gado ferlusu wi fu sondu, wi kisi a howpu disi. Ma efu wan sma e si a sani di a e howpu fu kisi, dan a no abi fu howpu tapu a sani dati moro. Bika fa wan sma kan howpu tapu wan sani di a man si? 25 Ma efu wi e howpu fu kisi wan sani di wi no kisi ete, dan wi o tan wakti a sani dati fayafaya, aladi wi e hordoro.

26 A yeye e yepi wi tu te wi swaki. Son leisi a de fanowdu fu begi, ma wi no sabi fu san wi musu begi. Na den ten dati a yeye srefi e taki gi wi te wi e geme èn te wi no sabi san fu taki. 27 Gado e ondrosuku wi ati èn a sabi san a santa yeye e aksi gi den santawan. Bika a yeye e aksi sani di Gado feni bun èn disi na fu yepi den santawan.

28 Gado e sorgu taki ala sani di a e du waka na wan orga fasi, so taki den sma di lobi en èn den wan di a kari fu du a wani fu en, kan feni bun. 29 A seti sani na fesi so taki den foswan di a ben abi na prakseri fu teki leki en pkin, ben o kon de leki en Manpkin. Na so a Manpkin ben o de a fosi pkin na mindri furu brada. 30 Na den sma di a ben abi na prakseri, na den a kari. Den sma di a kari, na sma di a e si leki ret’ati sma. Te fu kba, den sma di a e si leki ret’ati sma, na den sma di a gi glori tu.

31 We, san wi o taki fu den sani disi dan? Efu Gado de nanga wi, dan suma o man du wi wan sani? 32 En eigi Manpkin srefi a no kibri, ma a libi en meki a dede gi wi alamala. We, dan en nanga en Manpkin no o gi wi ala tra sani tu fu sori wi bun-ati? 33 Suma o man tyari den sma di Gado teki leki en pkin go na fesi krutu? Na Gado taki dati den na ret’ati sma. 34 Suma o krutu den? Nowan sma, bika Krestes Yesus dede èn Gado meki a kon na libi baka. Na en de na a ret’anusei fu Gado èn na en e taki gi wi.

35 Suma o man prati wi fu a lobi fu Krestes? Problema, pina, ferfolgu, angri, sososkin, ogri noso fet’owru o man du dati? 36 A de soleki fa Gado Buku taki: „Na fu yu ede meki ala ten baka sma kiri wi. Den e teki wi leki skapu di den e tyari go srakti.” 37 Ma awinsi ala den sani disi e psa nanga wi, tòg a sma di lobi wi o meki wi wini ala den sani disi. 38 Bika mi de seiker taki noti no o man prati wi fu a lobi fu Gado. Dede no o man du dati èn libi no o man du dati. Nowan engel, nowan tirimakti, nowan sani fu a ten disi noso fu a ten di e kon, nowan krakti, 39 nowan sani di hei, nowan sani di dipi èn nowan enkri tra sani di Gado meki o man prati wi fu a lobi fu Gado di wi Masra Krestes Yesus abi tu.