Yohanes skrifi en

15 Mi na a trutru droifibon èn mi P’pa na a gronman. 2 A e puru ibri taki fu mi di no e meki froktu èn a e krin ibri taki di e meki froktu, so taki a kan meki moro froktu. 3 Unu krin kba fu di unu arki san mi taigi unu. 4 Efu unu de wán nanga mi ala ten, dan mi o de wán nanga unu ala ten. Neleki fa wan taki srefi no man meki froktu efu a no tan na a droifibon, na so unu no man meki froktu tu, efu unu no tan wán nanga mi. 5 Mi na a droifibon, unu na den taki. Efu wan sma tan wán nanga mi èn mi tan wán nanga en, dan a o meki furu froktu fu di unu no man du noti sondro mi. 6 Efu wan sma no tan wán nanga mi, den o koti a sma disi trowe leki wan taki, dan a o kon drei. Dan sma o piki den taki disi èn den o trowe den go na ini faya fu bron den. 7 Efu unu tan wán nanga mi èn efu unu e du san mi e taki, dan unu kan aksi ala san unu wani èn unu o kisi dati tu. 8 Te unu e tan meki furu froktu èn unu e sori taki unu na mi disipel, dan mi P’pa o kisi glori. 9 Neleki fa a P’pa lobi mi, na so mi lobi unu. Tyari unsrefi na so wan fasi, taki mi tan lobi unu. 10 Efu unu tan du san mi taki, dan mi o tan lobi unu neleki fa mi P’pa tan lobi mi fu di mi e du san a taki.

11 Mi taigi unu den sani disi, so taki unu kan prisiri leki fa mi e prisiri. Iya, unu o prisiri srefsrefi. 12 Mi e gi unu a wet disi: Un musu lobi makandra leki fa mi lobi unu. 13 A moro bigi lobi di wan sma kan sori, na fu gi en libi* gi den mati fu en. 14 Unu na mi mati te unu e du san mi e taigi unu. 15 Mi no e kari unu srafu moro fu di wan srafu no sabi san en masra e du. Ma mi e kari unu mi mati, bika mi taigi unu ala den sani di mi yere fu mi P’pa. 16 A no unu teki mi, ma na mi teki unu so taki unu kan tan meki furu froktu. Den froktu di unu o meki o tan fu ala ten. Dan a P’pa o gi unu ala san unu e aksi en na ini mi nen.

17 Mi e taigi unu den sani disi, so taki unu kan lobi makandra. 18 Efu grontapu e teige unu, dan sabi taki den ben teige mi fosi den ben teige unu. 19 Efu unu ben de leki den grontapusma, dan den ben o lobi unu, bika unu ben o de fu grontapu. Ma fu di unu no de leki den grontapusma èn mi teki unu puru na grontapu, meki den e teige unu. 20 Prakseri den sani di mi ben taigi unu: Wan srafu no bigi moro en masra. Efu den wani du ogri nanga mi, dan den o wani du ogri nanga unu tu. Efu den du san mi taki, dan den o du tu san unu taki. 21 Ma na fu di unu na mi disipel, meki den o du ala den sani disi nanga unu fu di den no sabi a sma di seni mi kon. 22 Efu mi no ben kon taki nanga den, den no ben o abi sondu. Ma now den no kan taki dati den no abi sondu. 23 A sma di e teige mi, e teige mi P’pa tu. 24 Efu mi no ben du den sani di nowan tra sma du ete na den mindri, dan den no ben o abi sondu. Ma now den si san mi du èn tòg den e teige mi nanga mi P’pa. 25 Disi e psa, so taki den sani di skrifi na ini a Wet fu den kan kon tru, bika a skrifi: ’Den ben teige mi aladi mi no du noti.’ 26 Mi o seni a yepiman di kmopo fu a P’pa, gi unu. A yepiman na a santa yeye di e sori san tru èn na a P’pa e gi unu en. Te a santa yeye doro, dan a o de leki wan kotoigi gi mi. 27 Unu srefi musu de leki kotoigi gi mi fu di unu ben de nanga mi sensi di mi bigin nanga a wroko fu mi.