A fosi brifi gi Timoteyus
4 Ma a yeye fu Gado e taki krin taki son sma o gwe libi a bribi na ini a ten di e kon, fu di den o arki boskopu di gersi leki den kmoto fu Gado* èn den o poti prakseri na den leri fu ogri yeye. 2 Sma o gwe libi a bribi tu, fu di den arki den lei fu hoigriman. A konsensi fu den hoigriman disi dede neleki na wan faya isri bron en. 3 Den e tapu sma fu trow èn den e taigi sma taki den no mag nyan son sani. Ma na Gado meki den sani dati so taki den sma di abi bribi èn di sabi a tru leri finfini, kan nyan den èn gi en tangi. 4 Ja, ala sani di Gado meki na bun sani èn wi kan nyan ala sani solanga wi e taki Gado tangi fu dati, 5 bika na a wortu fu Gado nanga begi e meki taki den sani disi santa.
6 Te yu gi den brada den rai disi, dan yu o de wan bun dinari fu Krestes Yesus, di kon sabi den wortu fu a bribi. Yu o sori taki yu e hori yusrefi finfini na den bun leri di yu kisi. 7 Ma no arki leitori di e gi Gado pornen, leki den wan di owru uma gwenti ferteri. Na presi fu dati yu musu oefen yusrefi fu dini Gado fayafaya. 8 Te wi e oefen a skin, dan dati bun gi wan tu sani nomo. Ma te wi e dini Gado fayafaya, dan dati bun gi ala sani, bika dati o meki wi kisi blesi now èn na ini a ten di e kon. 9 A sani di taki dya tru èn yu kan bribi en. 10 Na fu dati ede wi e du bun furu muiti èn wi e wroko tranga, bika wi poti wi howpu tapu wan libilibi Gado, di de wan Ferlusuman fu ala sortu sma, spesrutu fu den sma di e tai hori na en.
11 Tan gi sma den rai disi èn tan leri sma den. 12 No meki nowan sma wiswasi yu fu di yu yongu. Ma nanga a fasi fa yu e taki, nanga a fasi fa yu e tyari yusrefi, nanga a lobi fu yu, nanga a bribi fu yu èn nanga a krin libi fu yu, yu musu tron wan eksempre gi den sma di e tai hori na Gado. 13 Tan meki muiti fu leisi gi a gemeente, fu gi den dek’ati èn fu gi leri teleki mi kon. 14 No wiswasi san Gado gi yu na a ten di den owruman ben poti den anu na yu tapu. Disi psa soleki fa den profeititori ben taki fu yu. 15 Prakseri den sani disi bun.* Du den nanga yu heri ati, so taki ala sma kan si taki yu e go na fesi. 16 Tan poti prakseri na yusrefi èn na den sani di yu e leri sma. Tan du den sani disi, bika te yu du disi yu o ferlusu yusrefi nanga den sma di e arki yu.