Brifi gi den Kolosesma

2 Mi wani taki unu sabi sortu bigi strei mi e strei gi a bun fu unu, gi a bun fu den wan di de na Laodisea èn gi a bun fu ala den sma di noiti no si mi.* 2 Na so den kan kisi trowstu èn lobi kan bondru den kon na wán. Na a fasi disi den o kisi furu gudu. Dati wani taki dati den o ferstan sani krin, den no o tweifri èn den o kon sabi soifri san na a santa kibritori fu Gado. A kibritori disi na Krestes. 3 Ala koni nanga sabi di warti srefsrefi kibri na ini en. 4 Mi e taki disi so taki nowan sma kan kori unu nanga moi wortu. 5 A tru taki mi no de drape nanga unu, ma mi e prakseri unu. Mi e prisiri fu si taki unu orga bun èn taki unu e bribi tranga na ini Krestes.

6 Sobun, now di unu e bribi na ini Masra Yesus Krestes, tan tyari unsrefi leki fa en ben e tyari ensrefi. 7 Neleki fa rutu e meki wan bon tnapu steifi na ini a gron, na so un musu tnapu steifi èn bribi na ini Yesus, soleki fa wi ben leri unu. Boiti dati un musu taki Gado tangi ala ten.

8 Sorgu taki nowan sma kisi unu* nanga a koni fu grontapu èn taki den no bedrigi unu nanga fowtu denki. Den sani disi no abi noti fu du nanga den leri fu Krestes, ma nanga den gwenti fu libisma èn nanga a denki fu grontapu, 9 bika ala den fasi fu Gado de fu si na ini Krestes, iya, nowan e mankeri. 10 Sobun, na en e sorgu taki unu no e mankeri noti. En na a sma di de na ede fu ala tirimakti èn fu ala den tra makti. 11 Fu di unu na bakaman fu en, meki unu besnèi.* A no libisma besnèi unu, ma unu besnèi di unu puru den sondu fasi fu a skin, bika dati na a fasi fa futuboi fu Krestes musu besnèi. 12 Di unu dopu, dan Gado beri unu makandra nanga Krestes. Fu di unu na bakaman fu en, meki Gado gi unu libi baka makandra nanga en, bika unu bribi den sani di Gado du nanga a krakti fu en. Na Gado gi en libi baka.

13 Boiti dati, aladi unu ben de leki dedesma fu di unu ben abi fowtu èn fu di unu no ben besnèi, tòg Gado meki unu kisi libi baka makandra nanga Yesus. Gado ben de klarklari fu gi wi pardon fu ala den sondu fu wi. 14 A figi ala sani puru di ben skrifi na ini a Wet di ben krutu wi. Gado spikri a Wet na a pinapostu* èn na so a puru en na pasi. 15 Nanga a pinapostu disi* a wini den tirimakti nanga ala den tra makti èn a meki den tron strafman fu en. Dan a meki den waka psa na fesi ala sma fu gi den syen èn fu sori taki a wini den.

16 Sobun, no meki nowan sma krutu unu fu san unu e nyan noso e dringi. Iya, no meki den krutu unu fu di unu no e hori wan fesadei, a Nyunmun-fesa noso wan Sabat-dei. 17 Bika den sani dati ben sori san ben musu kon ete èn dati na Krestes. 18 No meki nowan sma di lobi fu du leki a abi sakafasi èn di lobi anbegi den engel, tapu unu fu kisi a pai fu unu. Den sortu sma disi e meki bigi fu san den si.* Fu di den e denki leki fa libisma e denki, meki den e meki bigi aladi den no abi a reti fu du dati. 19 Den sortu sma disi no e tai hori na a ede. Den no e tai hori na a sma di e meki a heri skin kisi san a abi fanowdu èn di e meki taki den skrufu nanga den t’tei fu a skin e hori ala pisi fu a skin na makandra. A e meki a heri skin gro fu di Gado e gi en krakti fu gro.

20 Efu unu dede makandra nanga Krestes fu di unu no abi noti moro fu du nanga a denki fu grontapu, dan fu san ede unu e du neleki unu de wan pisi fu grontapu ete? Fu san ede unu e hori den wet fu en di e taki: 21 „No teki. No tesi. No fasi”? 22 Te yu luku en bun, dan ala den wet disi no o de moro, bika den abi fu du nanga sani di sma e gebroiki teleki den kba. Boiti dati, disi na wet nanga leri di kmoto fu libisma. 23 A gersi leki na wan koni sani fu hori den wet disi, ma den no e yepi sma fu feti nanga den lostu fu a skin. Disi e kon fu di libisma srefi e besroiti fa den wani anbegi Gado. Den e du leki den abi sakafasi èn den e pina densrefi.