A fosi brifi fu Petrus
5 Mi srefi na wan owruman. Mi si fa Krestes pina èn mi o kisi a glori tu di o de fu si. Dati meki mi wani aksi den owruman na un mindri fu du a sani disi:* 2 Luku den skapu fu Gado di a gi unu fu sorgu. Tyari a frantwortu di unu kisi leki owruman.* No du dati leki na dwengi sma dwengi unu, ma du en nanga prisiri. No du en fu di unu wani kisi wini, ma du en fu di unu wani yepi trawan trutru. 3 Un no musu prei basi gi den sma di Gado gi unu fu luku,* ma un musu de wan eksempre gi den skapu. 4 Te a moro bigi skapuman sori ensrefi, dan unu o kisi wan moi krans di no o pori noiti.
5 Un yongu man, saka unsrefi ondro den owru man.* Ma un alamala musu abi sakafasi* te unu de nanga makandra, bika Gado no lobi den sma di abi heimemre, ma a e sori bun-ati gi den sma di abi sakafasi.
6 Sobun, saka yusrefi ondro a moro makti Gado,* dan a o hei yu te fu kba. 7 Trowe ala yu hebi* na en tapu, bika a e broko en ede nanga yu. 8 Ala ten yu musu de na ai èn yu musu de nanga krin ferstan. Didibri, a feanti fu yu, e waka lontu leki wan lew di e bari fu di a e suku fu nyan wan sma. 9 Ma kakafutu gi en èn abi wan tranga bribi fu di yu sabi taki na heri grontapu ala den brada fu yu e pina na a srefi fasi. 10 Ma Gado e sori bun-ati na ala fasi èn a kari unu fu kisi a glori fu en fu têgo fu di unu de wán nanga Krestes. Baka te unu pina wan syatu pisi ten, dan en srefi o gi unu leri, so taki unu kan du un wroko bun. A o meki unu kon tranga, a o tranga a bribi fu unu èn a o meki unu tnapu steifi. 11 Na en abi makti fu têgo. Amen.
12 Silfanus* yepi mi fu skrifi a syatu brifi disi gi unu. A de wan brada di e dini Gado nanga en heri ati. Mi seni a brifi disi fu gi unu dek’ati èn fu sori unu krin taki Gado sori unu bun-ati trutru. Sobun, tan bribi na ini a sani disi. 13 A wan* di de na Babilon èn di Gado kari tu neleki unu, e seni taki unu odi. Markus, di de leki wan manpkin gi mi, e taki unu odi tu. 14 Taki makandra odi nanga wan bosi.*
Meki sani waka bun nanga un alamala di de wán nanga Krestes.