Lukas skrifi en
15 Ala den sma di ben e teki belasting gi lanti nanga den tra sma di ben e libi wan sondu libi, ben tnapu lontu Yesus fu yere san a ben e taki. 2 Den Fariseiman nanga den leriman fu a Wet ben e krutukrutu. Den taki: „A man disi e bemui nanga sma di e libi wan sondu libi èn a e nyan nanga den.” 3 Ne Yesus ferteri den na agersitori disi: 4 „Suma fu unu di abi 100 skapu èn di lasi wán fu den, no o libi den tra 99 skapu na a sabana fu go suku a lasi skapu teleki a feni en? 5 Te a feni a skapu, a e poti en na tapu en skowru èn a e prisiri. 6 Te a kon na oso, a e kari den mati nanga den birtisma fu en kon, dan a e taigi den: ’Un prisiri nanga mi, bika mi feni a skapu fu mi di ben lasi.’ 7 Mi e taigi unu taki moro prisiri o de na hemel te wán sondari abi berow, leki te 99 ret’ati sma no abi fu sori berow.
8 Efu wan frow di abi tin solfru moni* lasi wán fu den solfru moni, dan san a o du? A o leti wan lampu èn a o sibi en oso fu suku finfini teleki a feni en, tòg? 9 Te a feni en, a e kari den mati nanga den birtisma fu en kon, dan a e taki: ’Un prisiri nanga mi, bika mi feni a solfru moni* di mi ben lasi.’ 10 Mi e taigi unu, na a srefi fasi den engel fu Gado e prisiri te wán sondari abi berow.”
11 Baka dati a taki: „Wan man ben abi tu boi. 12 A yonguwan taigi en p’pa: ’Mi p’pa, gi mi a pisi fu a gudu di mi musu kisi.’ Ne a p’pa prati a gudu fu en gi den boi. 13 Baka wan tu dei, a yonguwan teki ala en sani, dan a go na wan fara kondre èn drape a fermorsu en gudu, fu di a ben libi wan yayolibi. 14 Di a fermorsu ala sani, wan hebi angriten kon na ini a heri kondre dati èn a ben e pina. 15 A go wroko srefi gi wan sma fu a kondre dati. A sma seni en fu go luku agu na ini den gron fu en. 16 Angri ben kiri en so te, taki a ben lostu a n’nyan fu den agu srefi, ma nowan sma ben gi en wan sani.
17 Di a kisi ensrefi, a taki: ’Den wrokoman fu mi p’pa abi nofo brede fu nyan, dan mi e dede dyaso fu angri! 18 Mi o go na mi p’pa, dan mi o taigi en: „Mi p’pa, mi sondu teige hemel èn teige yu. 19 Mi no warti moro fu yu kari mi yu manpkin. Meki mi tron wan fu den wrokoman fu yu.”’ 20 Dati meki a opo go na en p’pa. A ben de fara fu oso ete di en p’pa si en. Ne a p’pa firi sari, a lon go brasa* en boi èn a bosi en. 21 Dan a manpkin taigi en: ’Mi p’pa, mi sondu teige hemel èn teige yu. Mi no warti moro fu yu kari mi yu manpkin.’ 22 Ma a p’pa taigi den srafu fu en: ’Es’esi, go teki wan langa krosi, a moro bunwan, dan un weri dati gi en. Poti wan linga na en finga èn wan susu na en futu. 23 Tyari a fatu yongu mankaw kon, dan un srakti en. Kow nyan èn meki prisiri, 24 bika mi boi ben dede, ma a kon na libi baka. A ben lasi, ma mi feni en baka.’ Ne den bigin meki prisiri.
25 Na a ten dati a bigi boi fu en ben de na ini a gron. Di a ben e kon na oso, a yere poku e prei èn sma e dansi. 26 Ne a kari wan fu den futuboi kon èn a aksi en san e psa. 27 A futuboi taigi en: ’Yu brada drai kon baka èn a de gosontu. Dati meki yu p’pa e prisiri èn a srakti a fatu yongu mankaw.’ 28 Ne a moro bigi boi ati bron èn a no ben wani go na insei. Dan en p’pa kon na dorosei èn a begi en fu kon na insei. 29 A taigi en p’pa: ’Someni yari kba mi wroko gi yu leki wan srafu èn noiti mi trangayesi yu. Ma noiti ete yu gi mi wan pkin krabita fu mi nanga den mati fu mi kan meki prisiri. 30 Ma a boi fu yu disi fermorsu* den gudu fu yu nanga huru-uma. Dan now di a kon baka yu e lon go srakti a fatu yongu mankaw gi en.’ 31 Ne a p’pa taigi en: ’Mi boi, ala ten yu ben de nanga mi èn ala sani fu mi na fu yu. 32 Ma wi musu breiti èn prisiri, bika yu brada ben dede, ma a kon na libi baka. A ben lasi, ma wi feni en baka.’”