A di fu tu brifi gi den Korentesma

7 Fu dati ede lobi brada nanga sisa, fu di Gado pramisi wi den sani disi, dan meki wi krin wisrefi fu ibri sani di kan doti wi skin nanga wi denki èn meki a lespeki di wi abi gi Gado meki taki wi kon santa dorodoro.

2 Opo un ati gi wi. Wi no du nowan sma ogri, wi no pori nowan sma libi èn wi no bedrigi nowan sma fu kisi wini gi wisrefi. 3 Mi no e taki disi fu krutu unu. Bika mi ben taki kba taki unu de na ini wi ati awinsi wi de na libi noso awinsi wi o dede. 4 Mi man taki fri nanga unu. Mi e ferteri ala sma fa mi breiti nanga unu. Mi feni furu trowstu èn mi e prisiri srefsrefi aladi furu pina e miti wi.

5 Fu taki en leti, di wi doro na Masedonia, a ben hebi gi wi fu di sma ben e pina wi na ala sortu fasi. Ja, sma ben e gens wi èn wi ben e broko wi ede nanga den gemeente. 6 Ma Gado di e trowstu den sma di e firi brokosaka, trowstu wi tu di Titus doro na wi. 7 Wi no kisi trowstu soso fu di a de dya, ma wi kisi trowstu tu fu di ensrefi ben kisi dek’ati fu a fasi fa unu tyari ensrefi. A ferteri wi fa unu e angri fu si mi, fa unu e sari èn fa unu e broko un ede trutru* nanga mi. A sani dati gi mi moro prisiri.

8 Fu dati ede, awinsi a brifi fu mi meki unu sari, tòg a no e hati mi taki mi skrifi en. (Mi si taki a brifi dati meki unu sari, ma a ben de fu wan syatu pisi ten nomo.) Ma srefi efu a ben hati mi na a bigin, 9 tòg mi breiti now. Mi no breiti nomo taki unu e sari, ma taki a sari fu unu meki taki unu kisi berow. Unu ben e sari na wan fasi di Gado feni bun. Dati meki den sani di wi taigi unu no tyari takru bakapisi kon gi unu. 10 Bika ala ten a e tyari wini kon te wan sma e sari na a fasi di Gado feni bun. So wan sma o kisi berow èn disi o tyari ferlusu kon gi en. Ma a fasi fa grontapusma e sari, e tyari dede kon. 11 Luku omeni muiti unu du fu di unu sari na wan fasi di Gado feni bun: Unu meki unsrefi kon krin, unu ati bron fu na ogri di psa, unu e lespeki Gado, unu ben angri fu lusu a problema èn unu ben de fayafaya fu du dati. Iya, unu poti sani kon reti baka! Unu du ala sani na a yoisti fasi fu lusu a problema disi. 12 Di mi skrifi unu, mi no du dati gi a sma di ben du na ogri noso gi a sma di a trawan du ogri nanga en. Ma mi skrifi unu, so taki unu kan sori na fesi Gado omeni muiti unu du fu gi yesi na san wi taki. 13 Na dati meki wi kisi trowstu.

Ma boiti trowstu, wi kisi moro prisiri fu di Titus ben breiti di un alamala gi en dek’ati. 14 Di mi ferteri en fa mi breiti nanga unu, unu no meki mi fesi fadon. Neleki fa ala den sani di wi taigi unu de tru, na so den sani di wi ferteri Titus fu unu de tru. A no fu soso wi ben ferteri en taki wi breiti nanga unu. 15 Boiti dati, a kon lobi unu moro di a prakseri fa un alamala du san wi taigi unu, fa unu gi en wan switikon èn fa unu sori bigi lespeki gi en. 16 Mi breiti taki mi kan fertrow unu na ini ala sani.*