Lukas skrifi en

13 Na a ten dati wan tu sma di ben de drape ferteri Yesus taki Pilatus ben kiri den Galileasma di ben e tyari ofrandi. 2 Dati meki Yesus piki den: „Unu denki taki den sani disi psa nanga den sma disi fu di den ben ogri moro den tra Galileasma? 3 No, dati no de so. Mi e taigi unu taki efu unu no abi berow, un alamala o dede leki den. 4 Èn prakseri den 18 sma di dede di a toren fu Silowam fadon na den tapu. Unu denki taki den ben du moro bigi ogri leki ala den tra sma di e libi na ini Yerusalem? 5 No tòg? Ma mi e taigi unu taki efu unu no abi berow, un alamala o dede tu.”

6 Baka dati a ferteri den na agersitori disi: „Wan man ben prani wan figabon na ini en droifidyari. Ma di a kon suku froktu na a bon, a no feni nowan. 7 Ne a taigi a sma di ben e wroko na ini a droifidyari: ’Dri yari kba mi e kon suku froktu na a figabon disi, ma mi no feni nowan. Koti en trowe! Na somaar a de ini a dyari dya!’ 8 A man piki en: ’Mi Masra, libi a bon a yari disi ete, dan mi o diki wan olo lontu en èn mi o poti mest gi en. 9 Efu a gi froktu na ini a ten di e kon, dan dati bun. Ma efu a no gi froktu, dan yu kan koti en trowe.’”

10 Wan leisi Yesus ben e gi leri na ini wan fu den snoga na a Sabat-dei. 11 Wan uma ben de drape di ben abi wan ogri yeye na en tapu. Na 18 yari kba na ogri yeye ben meki na uma siki. En skin ben kron so te, taki a no ben man tnapu let’opo. 12 Di Yesus si na uma, a taki: „Frow, yu kon betre fu a siki fu yu.” 13 Dan a poti en anu na tapu na uma, dan direk na uma tnapu let’opo èn a gi Gado glori. 14 Ma a fesiman fu a snoga ben mandi srefsrefi fu di Yesus ben dresi wan sma na a Sabat-dei. Dati meki a fesiman taigi den sma: „Unu abi siksi dei fu wroko. Na den dei dati un musu kon efu unu wani kon betre, ma no kon na a Sabat-dei.” 15 Ma Masra piki en: „Hoigriman, unu e lusu a mankaw nanga a buriki fu unu fu go dringi watra na a Sabat-dei, tòg? 16 A no fiti dan taki na uma disi di de wan bakapkin fu Abraham èn di Satan ben tai 18 yari langa, kon fri fu a sani disi na a Sabat-dei?” 17 Di a taki den sani disi, dan ala den feanti fu en firi syen. Ma den tra sma ben prisiri di den si ala den kfalek moi sani di Yesus du.

18 A taki tu: „Leki san a Kownukondre fu Gado de èn nanga san mi kan agersi en? 19 A de leki wan mosterd-siri di wan man prani na ini en dyari. A siri gro teleki a tron wan bon èn den fowru di e frei na loktu meki nesi na tapu den taki fu a bon.”

20 Ne a aksi den ete wan leisi: „Nanga san mi kan agersi a Kownukondre fu Gado? 21 A de leki a gist di wan uma moksi nanga wán bigi baki* blon, dan ala a blon kon sweri.”

22 Di Yesus ben de na pasi fu go na Yerusalem, a go na ala den foto nanga dorpu fu gi sma leri. 23 Ne wan man aksi en: „Masra, na wan tu sma nomo o kisi ferlusu?” Yesus taigi den sma: 24 „Du ala muiti fu psa na ini a smara doro, bika mi e taigi unu taki furu sma o pruberi fu go na insei, ma den no o man go. 25 Te a masra fu na oso opo go sroto a doro, dan unu o tnapu na dorosei, unu o naki na tapu a doro èn unu o taki: ’Masra, opo a doro gi wi.’ Ma a o piki unu: ’Mi no sabi fu pe unu kmoto.’ 26 Dan unu o taki: ’Wi ben nyan èn dringi nanga yu èn yu ben gi leri na den bigi pasi fu wi.’ 27 Ma a o taigi unu: ’Mi no sabi fu pe unu kmoto. Unu kmoto na mi tapu, un ogriman!’ 28 Unu o krei èn kaw tapu un tifi te unu o si Abraham, Isak, Yakob nanga ala den profeiti na ini a Kownukondre fu Gado, ma unu o de na dorosei. 29 Sma o kon fu owstusei, west-sei, noordsei nanga zuidsei èn den o sdon na a tafra na ini a Kownukondre fu Gado. 30 Wan tu fu den lastiwan o tron den foswan èn wan tu fu den foswan o tron den lastiwan.”

31 Na a srefi ten dati, wan tu Fariseiman kon èn den taigi en: „Gwe fu dya, bika Herodes wani kiri yu.” 32 Dan Yesus taigi den sma: „Go taigi a bedrigiman* dati: ’Tide nanga tamara mi o puru ogri yeye na sma tapu, mi o meki sma kon betre èn na a di fu dri dei mi o kba nanga mi wroko.’ 33 Ma tide, tamara nanga tratamara mi musu go moro fara, bika a no fiti fu kiri wan profeiti dorosei fu Yerusalem. 34 Yerusalem, Yerusalem, di kiri den profeiti èn di ston den sma kiri di Gado seni kon na yu. Omeni leisi mi ben wani tyari den pkin fu yu kon na wán neleki fa wan mamafowru e tyari den pkin fu en kon na wán na ondro en frei, ma yu no ben wani! 35 Gado o gwe libi a tempel disi. Mi e taigi unu taki unu no o si mi moro teleki unu o taki: ’Blesi fu a sma di e kon na ini Yehovah* nen.’”