A fosi brifi gi den Korentesma
11 Teki na eksempre fu mi, neleki fa mi e teki na eksempre fu Krestes.
2 Mi e prèise unu fu di unu e prakseri mi ala ten èn unu e tan du sani soleki fa mi leri unu. 3 Ma mi wani fu unu sabi taki Krestes na a ede fu ibri man. A man na a ede fu na uma èn Gado na a ede fu Krestes. 4 Ibri man di abi wan sani na tapu en ede te a e begi noso te a e taki profeititori e tyari syen kon gi en ede.* 5 Ma ibri uma di no tapu en ede te a e begi noso te a e taki profeititori e tyari syen kon gi en ede,* bika a de a srefi leki te a ben o de wan uma di piri en ede. 6 Efu wan uma no e tapu en ede, dan meki a koti en w’wiri puru tu. Ma efu a de wan syen sani taki wan uma e koti en w’wiri puru noso taki a e piri en ede, dan meki a tapu en ede.
7 Wan man no musu tapu en ede, bika a de leki fa Gado de èn a e gi Gado glori. Ma na uma e gi a man glori. 8 Bika a man no kmopo fu na uma, ma na uma kmopo fu a man. 9 Boiti dati, Gado no meki a man gi na uma, ma a meki na uma gi a man. 10 Dati meki na uma musu tapu en ede fu sori taki a e saka ensrefi na ondro a man èn den engel o si disi.
11 Boiti dati, na ini a gemeente fu Masra, na uma abi a man fanowdu èn a man abi na uma fanowdu. 12 Bika soleki fa na uma kmopo fu a man, na so a de tu taki a man kmopo fu na uma. Ma ala sani kmopo fu Gado. 13 San unu e denki: A fiti te wan uma e begi Gado sondro fu tapu en ede? 14 Te unu e luku a fasi fa libisma meki, unu no e si taki a de wan syen gi wan man te a abi langa w’wiri? 15 Ma wan uma e kisi grani te a abi langa w’wiri, a no so? Bika a kisi ede-w’wiri so taki a no abi fu tapu en ede. 16 Ma efu wan sma e krutukrutu taki a sani disi musu de tra fasi, dan a musu sabi taki wi no gwenti tra fasi èn den gemeente fu Gado no gwenti tra fasi tu.
17 Ma a no fu prèise unu meki mi e taigi unu den sani disi, bika den konmakandra fu unu no e tyari wini kon gi unu, ma den abi soso takru bakapisi gi unu. 18 Mi yere taki te unu e kon makandra na ini wan gemeente, dan pratifasi de na un mindri èn na a wan sei mi e bribi a tori. 19 Bika sma na un mindri o kon nanga falsi leri. Dan a o kon na krin suma fu unu Gado feni bun.
20 Te unu e kon makandra fu nyan na Avondmaal fu Masra, dan unu no e du disi na wan lespeki fasi. 21 Bika fosi unu nyan na Avondmaal, unu e nyan un eigi n’nyan. Dati meki sonwan fu unu de nanga angri èn trawan drungu. 22 Unu no abi oso pe unu kan nyan èn dringi? Noso na lespeki unu no abi gi a gemeente fu Gado? Na syen unu wani gi den sma di no abi noti? San mi sa taigi unu? Mi musu prèise unu? Mi no e prèise unu gi a sani disi.
23 Bika na san Masra leri mi, mi e leri unu tu: Na a neti di den gi Masra Yesus abra na den feanti fu en, a teki wan brede 24 èn baka di a taki Gado tangi, a broko a brede èn a taki: „Disi wani taki mi skin di mi o gi leki ofrandi fu unu ede. Tan du disi fu memre mi.” 25 Na a srefi sani a du tu nanga a kan, baka di den nyan na Avondmaal. A taki: „A kan disi wani taki a nyun ferbontu di o seti te mi brudu o kanti trowe. Un musu tan du disi èn ibri leisi te unu e dringi fu a kan, un musu memre mi.” 26 Bika ibri leisi te unu e nyan a brede disi èn e dringi fu a kan disi, unu e meki sma sabi fu a dede fu Masra, teleki a doro.
27 Fu dati ede, te wan sma e nyan a brede noso e dringi fu a kan fu Masra aladi a no warti fu du dati, dan a sma dati du wan ogri fu di a no sori lespeki gi a skin èn gi a brudu fu Masra. 28 Wan sma musu ondrosuku ensrefi bun fu si efu a warti, dan fosi a kan nyan a brede èn dringi fu a kan. 29 Bika a sma di e nyan èn e dringi sondro fu ferstan san a skin wani taki, o meki taki ensrefi kisi krutu. 30 Dati meki furu fu unu swaki èn siki, èn furu fu unu dede.* 31 Ma efu wi ben o ondrosuku wisrefi, dan wi no ben o kisi krutu. 32 Ma te wi e kisi krutu, dan na Yehovah* e pir’ai gi wi, so taki wi no o kisi strafu makandra nanga grontapu. 33 Fu dati ede, mi brada, te unu e kon makandra fu nyan a n’nyan disi, dan un musu wakti makandra. 34 Efu angri e kiri wan sma, dan meki a nyan na oso, so taki unu no e kon makandra fu kisi krutu. Den tra sani mi o seti te mi doro drape.