A brifi fu Yakobus
3 Mi brada, a no un alamala musu tron leriman, bika unu sabi taki Gado o luku a wroko fu wi moro fini te a o krutu wi. 2 Wi alamala e sondu* furu leisi. Efu wan sma no e sondu nanga en mofo, dan en na wan sma di no e meki fowtu* èn a man basi en heri skin. 3 Efu wi wani meki wan asi du san wi wani, dan wi e poti wan t’tei na ini en mofo fu tyari en go pe wi wani. 4 Luku den sipi tu. Aladi den bigi so èn tranga winti e tyari den, tòg na wan pkin pari di fasi na bakasei fu a sipi e tyari en go pe a wani.
5 Na so a de tu nanga a tongo. A de wan pkin pisi fu a skin, ma a e dyaf kfalek. Iya, wan pkin faya nomo kan bron wan bigi busi! 6 A tongo na wan faya tu. A de wan pisi fu wi skin di e du furu ogri èn a e doti a heri skin. Neleki faya, a kan pori wan sma en heri libi. A faya fu en e kmoto fu Gehena.* 7 Libisma man basi ala sortu meti èn den du dati kba. Den basi den busmeti, den fowru, den meti di e kroipi na gron* nanga den meti di e libi na ini watra. 8 Ma nowan libisma man basi a tongo. Nowan sma man dwengi en èn a e du soso ogri. A de leki vergif di man kiri sma. 9 Nanga a tongo wi e prèise wi Papa Yehovah,* ma nanga a srefi tongo disi wi e fluku libisma di meki „leki fa Gado de”. 10 A srefi mofo di e blesi sma e fluku den tu.
Mi brada, a no bun taki sani e psa na a fasi disi. 11 Switi watra nanga bita watra no e kmoto fu a srefi watra-olo tòg? 12 Wan figabon no kan gi olèif èn wan droifibon no kan gi figa. Na so yu no man puru switi watra na ini wan peti di abi sowtu watra.
13 Suma fu unu koni èn abi ferstan? A sma disi e tyari ensrefi na wan bun fasi. Te a sori taki a abi safr’ati, dan a o de krin taki a koni. 14 Ma efu unu abi bita-ati fu di unu e dyarusu èn efu unu wani meki trobi* ala yuru, dan un no musu meki bigi taki un koni. Bika efu unu e du dati, dan na lei unu e lei. 15 Disi a no a koni di e kon fu hemel, ma a de fu a grontapu disi. Na meti nanga ogri yeye e du den sani disi. 16 Bika pe dyarusu nanga trobi de, na drape bruya nanga ala sortu ogri de.
17 Ma na a fosi presi, wan sma di abi a koni fu hemel e libi wan krin libi. Boiti dati, a de wan sma di lobi freide, a no de nomonomo fu du san en srefi wani, a de klarklari fu gi yesi, a lobi fu sori sar’ati èn a lobi du bun. A no lobi a wan sma moro a trawan èn a no e hoigri. 18 Den sma di e du muiti fu libi bun nanga trawan e sai freide èn a froktu fu dati na retidu.