A di fu tu brifi gi den Korentesma
6 Leki sma di e wroko makandra nanga en, wi e begi unu: Unu no musu meki a bun-ati di Gado sori unu de fu soso. 2 Bika a e taki: „Na wan ten di mi feni bun mi yere yu èn na wan dei fu ferlusu mi yepi yu.” Luku, disi na a spesrutu ten di mi feni bun. Luku, disi na a dei fu ferlusu.
3 Wi no e du nowan sani fu hati sma. Na so sma no o taki takru fu a wroko di wi e du gi Masra. 4 Ma na ala fasi wi e sori taki wi na dinari fu Gado te wi e hordoro aladi furu tesi e miti wi, te wi de na ini banawtu, te wi de na nowtu, te wi e kisi problema, 5 te wi e kisi fonfon, te wi de na straf’oso, te dyugudyugu de, te wi musu wroko tranga, te wi no man sribi na neti èn te wi no abi n’nyan. 6 Wi e sori taki wi na dinari fu Gado te wi e libi wan krin libi, te wi abi sabi, te wi abi pasensi, te wi abi switifasi, te wi abi santa yeye, te wi lobi sma sondro fu hoigri, 7 te wi e taki sani di tru èn te wi kisi krakti fu Gado. Wi e sori disi tu te wi e du san reti, bika dati de neleki wi e hori fetsani na ini wi ret’anu* èn na ini wi kruktu-anu.* 8 Wi e sori taki wi na dinari fu Gado te wi e kisi grani nanga syen èn te sma e taki takru sani nanga bun sani fu wi. Sma e si wi leki bedrigiman aladi wi e taki san tru ala ten. 9 Den e si wi leki sma di den no sabi, ma Gado sabi wi heri bun. Den feni taki wi musu dede, ma tòg wi de na libi ete. Wi kisi fonfon, ma tòg wi no dede. 10 A gersi leki wi e sari, ma tòg wi e prisiri ala ten. A gersi leki wi na pôtisma, ma tòg wi e meki furu sma kon gudu. A gersi leki wi na sma di no abi noti, ma tòg wi abi ala sani.
11 Un Korentesma, wi taki krin nanga unu èn wi opo wi ati gi unu. 12 Wi no e meki noti tapu wi fu sori lobi gi unu, ma unu no e sori taki unu lobi wi. 13 Fu dati ede mi e taki nanga unu neleki unu na mi pkin. Unu srefi musu opo un ati moro gi wi.
14 No kon de wán nanga sma di no de na bribi.* Bika san retidu abi fu du nanga kruktudu? Noso san leti abi fu du nanga dungru? 15 San Krestes abi fu du nanga Belial?* Noso san wan sma di de na bribi* abi fu du nanga wan sma di no de na bribi? 16 San a tempel fu Gado abi fu du nanga falsi gado? Bika wi na wan tempel fu wan libilibi Gado, soleki fa Gado ben taki: „Mi o tan na den mindri èn mi o waka na den mindri. Mi o de a Gado fu den èn den o de a pipel fu mi.” 17 „’Fu dati ede, kmoto na den mindri èn prati nanga den’, na so Yehovah* taki. ’No fasi den sani moro di no krin’”, „’dan mi o teki unu.’” 18 „’Mi o de un p’pa èn unu o de mi manpkin nanga mi umapkin’, na so Yehovah* na Almaktiwan taki.”