Gi den Hebrewsma

4 We, wan pramisi de ete taki wi kan rostu leki Gado. Dati meki wi musu luku bun* taki nowan fu unu lasi a grani disi, 2 bika sma preiki a bun nyunsu gi wi tu, neleki fa sma ben preiki a bun nyunsu gi den afo fu wi. Ma den no feni wini fu san den ben yere, fu di den no ben abi a srefi bribi leki den wan di ben arki a bun nyunsu. 3 Bika wi di e bribi o rostu leki Gado, ma fu den trawan a ben taki: „Mi ati ben bron èn dati meki mi sweri: ’Den no o rostu leki mi.’” Gado ben taki disi, aladi a ben kba nanga a wroko fu en sensi a ten di grontapu seti. 4 Bika wan pisi de na ini Gado Buku di e taki fu a di fu seibi dei: „Na a di fu seibi dei Gado rostu fu ala en wroko.” 5 Na a srefi presi dati, a e taki tu: „Den no o rostu leki mi.”

6 Den fosi sma di ben yere a bun nyunsu no ben rostu leki Gado, fu di den ben trangayesi en. Ma son sma de ete di kan rostu leki en. 7 Dati meki a poti ete wan tra dei, bika baka wan heri pisi ten a taki na ini a psalm fu David: „Tide.” A de soleki fa ben taki na fesi kba: „Efu unu arki en sten tide, dan un no musu meki un ati kon tranga.” 8 Efu Yosua ben tyari den go na wan presi pe den ben kan rostu, dan bakaten Gado no ben o taki fu wan tra dei. 9 Sobun, a pipel fu Gado o feni rostu ete, neleki fa sma ben e rostu na tapu a Sabat-dei, 10 bika a sma di e rostu leki Gado, e rostu tu fu en eigi wroko, neleki fa Gado e rostu fu en eigi wroko.

11 Sobun, meki wi du ala muiti fu kan rostu leki Gado, so taki nowan fu wi kisi a srefi gwenti fu trangayesi en. 12 Bika a wortu fu Gado de na libi èn a abi krakti. A srapu moro iniwan fet’owru di e koti na ala tu sei. A e koti go so dipi, taki a e tyari kon na krin fa wan sma de na insei èn fa a de na dorosei.* A e prati bonyo* nanga bonyofatu fu makandra. A man si krin san wan sma e denki na ini en ati èn san a abi na prakseri fu du. 13 Nowan fu den sani di Gado meki, na sani di a no man si. A e si ala sani krin èn nowan sani kibri gi en. En na a sma di wi musu gi frantwortu.

14 Now wi abi wan granpriester, Yesus, a Manpkin fu Gado. A go na ini hemel èn a bigi moro ala trawan. Dati meki wi musu tan ferteri sma taki wi e bribi na ini en. 15 Bika wi no abi wan granpriester di no man ferstan den swakifasi fu wi. Ma wi abi wan granpriester di no abi sondu èn di kisi tesi na ala fasi neleki wi. 16 Sobun, meki wi kon na fesi a kownusturu fu Gado sondro frede. Dan Gado kan sori unu sar’ati nanga bun-ati èn a kan yepi wi na a yoisti ten.