Wan Openbaring gi Yohanes

11 Dan a gi mi wan warimbo-tiki* di ben gersi wan markitiki èn a taki: „Opo go marki a santa presi na ini a tempel fu Gado. Marki na altari tu nanga den sma di e anbegi Gado na ini a santa presi. 2 Ma yu no musu marki a dyari di de lontu a santa presi fu a tempel. Yu musu libi en, bika mi gi den trakondre sma a pisi dati. Nanga den futu den o masi a santa foto 42 mun langa. 3 Mi o meki den tu kotoigi fu mi taki profeititori 1260 dei langa. Den o weri krosi di e sori taki den e sari.” 4 Den tu kotoigi na den tu olèifbon nanga den tu kandratiki. Den e tnapu na fesi a Masra fu grontapu.

5 Efu wan sma wani du den ogri, dan faya o kmopo na ini den mofo èn a o bron den feanti fu den. Na so den o kiri ala sma di wani du den ogri. 6 Den tu kotoigi abi a makti fu tapu hemel, so taki alen no fadon na ini a pisi ten te den e taki profeititori. Den abi a makti tu fu meki watra tron brudu èn fu tyari ibri sortu rampu kon na grontapu, awinsi omeni leisi den wani du dati.

7 Te den kba preiki gi sma, dan na ogri meti o opo kmoto na ini a dipi peti di no abi gron èn a o kon feti nanga den. A o wini den èn a o kiri den. 8 Den dedeskin fu den o d’don na tapu a bradi strati fu a bigi foto. Na agersi fasi a foto disi de leki Sodom nanga Egepte. Na drape sma ben spikri a Masra fu den na wan postu tu. 9 Dri nanga afu dei langa, sma fu ala pipel, lo, tongo nanga kondre o si den dedeskin èn den no o wani meki sma poti den dedeskin na ini wan grebi. 10 Den sma di e libi na grontapu o breiti èn den o meki prisiri fu di den tu kotoigi dede. Den o seni kado gi makandra, bika den tu profeiti disi ben pina den sma di e libi na grontapu.

11 Baka den dri nanga afu dei, Gado gi den tu kotoigi libikrakti.* Ne den opo tnapu. Den sma di si den, ben kon frede srefsrefi. 12 Dan den kotoigi yere wan tranga sten na ini hemel di ben taigi den: „Opo kon dyaso.” Ne den opo go na hemel na ini wan wolku èn den feanti fu den si den.* 13 Na a srefi yuru dati wan bigi gronseki ben de èn a di fu tin pisi fu a foto broko fadon. A gronseki kiri 7000 sma. Ne den tra sma kon frede èn den gi a Gado fu hemel glori.

14 A di fu tu ogri psa kba. Luku! A di fu dri ogri e kon es’esi.

15 Dan a di fu seibi engel bro a trompet fu en. Ne tranga sten ben de fu yere na ini hemel. Den taki: „A Kownukondre fu grontapu kon tron a Kownukondre fu wi Masra èn fu a Krestes fu en. A o tiri leki kownu fu ala ten, iya, fu têgo.”

16 Den 24 owruman* di ben sdon na fesi Gado na tapu den kownusturu fu den, saka kindi boigi go na gron èn den anbegi Gado. 17 Den taki: „Wi e taki yu tangi, Yehovah* Gado, na Almaktiwan, a sma di de now èn di ben de kba. Bika yu teki a bigi makti fu yu èn yu bigin tiri leki kownu. 18 Ma den kondre kisi bigi atibron èn yu srefi kisi bigi atibron. A ten doro fu krutu den dedesma. A ten doro fu pai den srafu fu yu di de profeiti, den santawan nanga den wan di e frede yu nen, den mofinasma nanga den heihei sma. A ten doro fu pori den wan di e pori grontapu.”

19 Baka dati den opo a santa presi fu a tempel fu Gado di de na ini hemel èn a santa kisi fu en ferbontu ben de fu si na ini a santa presi fu en tempel. Ne bliksem koti na hemel, sten ben de fu yere, dondru bari, wan gronseki ben de èn pispisi ijs fadon kon na grontapu leki wan bigi alen.