Esekièl

18 Yehovah taki baka nanga mi. A taigi mi: 2 „Unu e koti wan odo na ini Israel. Unu e taki: ’Den p’pa e nyan swa droifi, ma na den tifi fu den boi fu den e kon swa.’ San na odo disi wani taki?

3 A Moro Hei Masra Yehovah taki: ’Neleki fa a de seiker taki mi de na libi, na so a de seiker taki unu no o taki a sani disi moro na ini Israel. 4 Luku, a libi fu ala sani na fu mi! A libi fu a p’pa na fu mi èn a libi fu a pkin na fu mi. A sma* di e sondu, na en o dede.

5 Kow taki dati wan man na wan ret’ati sma èn taki a e du san bun. 6 A no e nyan den ofrandi di sma e tyari gi falsi gado na tapu den bergi, a no e anbegi den fisti gado* fu den Israelsma èn a no e d’don nanga a frow fu wan tra man. Noiti a d’don nanga wan uma di abi en munsiki. 7 Noiti a man disi e du ogri nanga trawan. Te wan sma gi en wan sani leki panti, a e gi a sma en sani baka. Noiti a e fufuru sma sani. Te angri e kiri wan sma, dan a e gi en n’nyan èn te wan sma de nanga sososkin, a e tapu en nanga wan krosi. 8 A no e aksi sma rente èn a no e meki moni na sma tapu. A no e du kruka sani. Te a e koti krutu na mindri tu sma, dan a e du dati na wan reti fasi. 9 Efu a man disi e hori den wet fu mi èn efu a e du san mi taki fu di a wani du sani nanga wan krin ati, dan en na wan ret’ati sma. A man disi o tan na libi seiker’, na so a Moro Hei Masra Yehovah taki.

10 ’Ma kow taki dati a man disi abi wan boi di e fufuru, di e kiri sma* noso di e du iniwan fu den tra ogri disi 11 (aladi a p’pa srefi no du nowan fu den sani disi): A e nyan den ofrandi di sma e tyari gi falsi gado na tapu den bergi èn a e d’don nanga a frow fu wan tra man, 12 a e du ogri nanga den mofinawan èn nanga den pôtiwan, a e fufuru sma sani, te wan sma gi en wan sani leki panti a no e gi a sma en sani baka, a e anbegi fisti gado èn a e du groskin sani, 13 a e meki moni na sma tapu èn a e meki sma pai rente. Fu di a boi e du ala den ogri disi, meki a o dede seiker. A no o tan na libi. A o pai gi en eigi sondu.

14 Ma kow taki dati wan p’pa abi wan boi di si ala den sondu di en p’pa du, ma a boi no e du nowan fu den ogri dati. 15 A boi no e nyan den ofrandi di sma e tyari gi falsi gado na tapu den bergi, a no e anbegi den fisti gado fu den Israelsma èn a no e d’don nanga a frow fu wan tra man. 16 A no e du ogri nanga nowan sma. A no e teki sma sani leki panti. A no e fufuru sma sani. Te angri e kiri wan sma, a e gi a sma n’nyan èn te wan sma de nanga sososkin, a e tapu en nanga wan krosi. 17 A no e pina den pôtiwan. A no e meki moni na sma tapu èn a no e meki sma pai rente. A e du san mi taki èn a e hori den wet fu mi. So wan boi no o dede gi den sondu fu en p’pa. Iya, a o tan na libi seiker. 18 Ma fu di en p’pa bedrigi trawan, a fufuru sma sani èn a du ogri nanga mi pipel, meki a o dede gi den sondu fu en.

19 Ma dan unu o aksi mi: „Fu san ede a boi no abi fu pai gi den sondu fu en p’pa?” We, na fu di a boi du san bun, a tyari ensrefi na wan reti fasi èn a hori ala den wet fu mi. A boi disi o tan na libi seiker. 20 A sma di e sondu, na en o dede. Wan boi no o tyari den takru bakapisi fu den ogri di en p’pa du èn wan p’pa no o tyari den takru bakapisi fu den ogri di en boi du. A sma di du bun o kisi wini fu dati. Ma a sma di du ogri o kisi strafu fu na ogri di a du.

21 Efu wan ogrisma tapu nanga den ogri di a ben e du, efu a e hori den wet fu mi, efu a e du bun èn efu a e tyari ensrefi na wan reti fasi, dan a o tan na libi seiker. A no o dede. 22 Mi no o strafu en gi* den ogri di a du. A o tan na libi fu di a tyari ensrefi na wan reti fasi.’

23 A Moro Hei Masra Yehovah taki: ’Unu denki taki mi e prisiri te wan ogrisma dede? Unu no sabi taki mi e prisiri te wan ogrisma tapu nanga den ogri di a e du, so taki a kan tan na libi?’

24 ’Ma te wan ret’ati sma tapu fu du san reti èn a e bigin du ogri èn a e du ala den groskin sani di ogrisma e du, dan unu denki taki a o tan na libi? Mi no o memre nowan fu den bun sani di a ben du. Na fu di a trangayesi mi èn fu di a sondu, meki a o dede.

25 Ma dan unu o taki: „Yehovah no e du sani na wan reti fasi.” Un Israelsma, grantangi, arki mi. Na mi no e du sani na wan reti fasi? Na unu no e du sani na wan reti fasi.

26 Te wan ret’ati sma tapu fu du san reti èn a e du ogri, dan a o dede fu den sani di a du. Iya, a o dede bika a ben du ogri.

27 Te wan ogrisma tapu nanga na ogri di a ben e du, èn a e bigin du san bun èn a e tyari ensrefi na wan reti fasi, dan a o kibri en eigi libi. 28 Te a kon ferstan taki a ben e du ogri èn a e tapu fu du den, dan a o tan na libi seiker. A no o dede.

29 Ma dan den Israelsma o taki: „Yehovah no e du sani na wan reti fasi.” Un Israelsma, na mi no e du sani na wan reti fasi? Na unu no e du sani na wan reti fasi.’

30 ’Un Israelsma, na fu dati ede mi o krutu ibriwan fu unu gi den sani di unu e du’, na so a Moro Hei Masra Yehovah taki. ’Un tapu nanga ala den ogri di unu e du, iya, un tapu nanga den. Noso den sani disi o meki taki unu kisi strafu. 31 Tapu nanga ala den ogri di unu ben e du èn du muiti fu kon abi* wan nyun ati èn kenki a fasi fa unu e denki. Un Israelsma, fu san ede un musu dede?’

32 ’Mi no e prisiri kwetkweti te wan sma dede’, na so a Moro Hei Masra Yehovah taki. ’Sobun, tapu nanga den ogri di unu e du, so taki unu kan tan na libi.’”