Esekièl
24 Na a di fu tin dei fu a di fu tin mun na ini a di fu neigi yari, Yehovah taigi mi: 2 „Manpkin fu libisma, skrifi a dei fu tide,* iya, skrifi precies sortu dei a de. A kownu fu Babilon go feti nanga Yerusalem na a srefi dei disi. 3 Ferteri wan agersitori di abi fu du nanga den sma di e opo densrefi teige mi. Yu musu taki:
’Disi na san a Moro Hei Masra Yehovah taki:
„Poti a patu* na tapu faya èn kanti watra na ini.
4 Poti pispisi meti na ini, iya, ala den bun pisi.
Poti den bowtu nanga den skowru na ini. Furu a patu nanga den moro bun bonyo.
5 Teki a moro bun skapu èn poti udu na ondro a patu.
Bori den pisi meti nanga den bonyo na ini.”’”
6 „A Moro Hei Masra Yehovah taki:
Bigi ogri o miti a foto di kiri furu sma, iya, a foto di de leki wan frustu patu. A frustu fu en no kmoto!
Puru ala den pisi meti na ini wan-fru-wan. No iti lot gi den.
7 Bika a brudu di a foto disi trowe, de na ini a foto ete. A* kanti en na tapu ston-gron.
A no kanti en na doti fu tapu en nanga santi.
8 Mi libi a brudu na tapu a brenki ston-gron
so taki nowan sma ben o man tapu en.
Disi ben o wiki na atibron fu mi èn mi ben o strafu en.’
9 Disi na san a Moro Hei Masra Yehovah taki:
’Bigi ogri o miti a foto di kiri furu sma!
Mi o meki wan bigi ipi udu.
10 Tyari furu udu kon na wán èn leti a faya.
Bori a meti teleki a kon safu, kanti a watra fu en puru èn bori den bonyo teleki den bron.
11 Meki a leigi patu tan na tapu a krofaya fu meki a kon faya.
A kopro fu en musu kon faya so te
taki a doti di de na ini smèlter èn taki a frustu fu en bron gwe.
12 Ala a muiti disi na fu soso èn a e weri skin.
A frustu no man kmoto fu di a furu.
Trowe a heri frustu patu go na ini a faya!’
13 ’Fu di yu tyari yusrefi na wan syen fasi, meki yu no ben krin. Mi pruberi fu krin yu, ma tòg yu no kon krin. Yu no o krin teleki mi puru atibron na yu tapu. 14 Na mi Yehovah taki so. A o psa trutru. Mi o du ala san mi taki. Mi no o sari yu èn a no o hati mi tu. Den o krutu yu gi a fasi fa yu tyari yusrefi èn gi den sani di yu du’, na so a Moro Hei Masra Yehovah taki.”
15 Dan Yehovah taki baka nanga mi. A taigi mi: 16 „Manpkin fu libisma, sondro fu yu ferwakti mi o puru a sma di yu lobi so te na yu sei. Ma yu no musu row,* yu no musu bari krei èn watra no musu lon na yu ai. 17 Geme te yu w’wan de èn no row gi a dedewan. Tai yu ede èn weri susu na yu futu. Yu no musu tapu yu snor* èn yu no musu nyan a brede di tra sma tyari gi yu.”*
18 Ne mi taki nanga den sma na m’manten. A neti dati mi frow dede. A tra m’manten mi du san Gado taigi mi fu du. 19 A pipel ben aksi mi: „Yu no wani ferteri wi san den sani di yu e du abi fu du nanga wi?” 20 Dan mi taigi den: „Yehovah taigi mi: 21 ’Taigi den sma fu Israel: „Disi na san a Moro Hei Masra Yehovah taki: ’Mi o doti mi santapresi, a sani di unu e prodo nanga en, a sani di unu lobi èn di warti so gi unu. Nanga fet’owru sma o kiri un manpkin nanga un umapkin di unu ben libi na baka. 22 Dan unu o abi fu du san mi ben du. Unu no o tapu un snor èn unu no o nyan a brede di tra sma tyari gi unu. 23 Unu o weri a tai-ede fu unu èn unu o weri un susu na un futu. Unu no o row èn unu no o krei. Den sondu fu unu o meki unu dede gwe. Unu o geme te unu w’wan de. 24 Esekièl o de leki wan marki gi unu. Ala san a du, na dati unu o du. Te a ten dati doro, unu alamala o sabi tu taki mi na a Moro Hei Masra Yehovah.’”’”
25 „Manpkin fu libisma, na a dei dati mi o puru a fortresi* fu den, a moi sani di e gi den prisiri, a sani di den lobi, a sani di warti so gi den. Mi o puru den manpkin nanga den umapkin fu den tu. 26 Na a dei dati wan sma di lowe o kon ferteri yu san psa. 27 Na a dei dati yu o opo yu mofo fu taki nanga a sma di lowe. Yu no o tan pî moro. Yu o de leki wan marki gi den èn den sa musu fu sabi taki mi na Yehovah.”