Yesaya
64 Mi winsi taki yu ben priti hemel opo èn saka kon.
Dan den bergi ben o seki fu yu ede.
2 A ben o de neleki te wan faya e bron grangran
èn neleki te faya e meki watra kuku.
Dan yu feanti ben o sabi yu nen
èn den pipel ben o beifi gi yu!
3 Di yu saka kon, yu du ala sortu kfalek sani di wi no ben ferwakti
èn den bergi seki fu yu ede.
4 Sensi owruten nowan sma ben yere noso poti prakseri na so wan Gado.
Nowan sma ben si so wan Gado leki yu,
di e yepi den sma di e tan wakti en.*
5 Yu e kon yepi den sma di lobi du san reti,
di e tan prakseri yu èn di e du san yu wani.
Yu ati ben bron fu di wi tan du sondu.
Wan heri pisi ten wi du dati.
Dan fa wi kan ferwakti taki yu o ferlusu wi?
6 Wi alamala kon de leki sma di no krin.
Den bun sani di wi e du de leki a duku fu wan uma di abi en munsiki.
Wi alamala o drei leki den w’wiri fu wan bon.
Neleki winti, den sondu fu wi o tyari wi gwe.
7 Nowan sma e kari yu nen,
nowan sma e du muiti fu tan dini yu.
Dati meki yu drai baka gi wi
èn yu meki wi dede gwe* fu di wi sondu.
8 Ma Yehovah, yu na wi P’pa.
Wi na klei èn yu na a sma di e meki wi tron san yu wani.*
Na yu meki wi alamala.
9 Yehovah, no ati bron tumsi.
No hori wi sondu na prakseri fu ala ten.
Grantangi, memre taki wi alamala na yu pipel.
10 Den santa foto fu yu tron sabana.
Sion tron wan sabana
èn Yerusalem tron wan brokopresi.
11 Faya bron
a moi santa oso* fu wi
pe den afo fu wi ben e prèise yu.
Ala den sani di wi ben lobi broko.
12 Yehovah, now di yu si ala den sani disi, yu o tan sondro fu du wan sani?
Yu o tan pî aladi wi e pina so hebi?