Gi den Hebrewsma

13 Tan lobi makandra leki brada nanga sisa. 2 No fergiti fu du bun gi sma,* bika na fu di son sma du dati, meki sondro fu den sabi den kari engel kon na ini den oso. 3 Tan prakseri den sma di de na straf’oso,* neleki unu de na straf’oso makandra nanga den. Tan prakseri den sma tu di trawan e pina, bika unu srefi na libisma.* 4 Un alamala musu si a trowlibi leki wan lespeki sani. Un no musu doti a trowlibi fu unu, bika Gado o krutu sma di e huru* nanga sma di e waka gi den trowpatna. 5 No meki a fasi fa unu e libi sori taki unu lobi moni. Ma un musu de tevrede nanga den sani di unu abi now, bika Gado taki: „Mi no o libi yu kwetkweti èn noiti mi o gwe libi yu.” 6 Dati meki wi kan abi dek’ati èn wi kan taki: „Yehovah* na mi yepiman. Mi no o frede. San libisma kan du mi?”

7 Tan prakseri den sma di e teki fesi na un mindri èn di ferteri unu a wortu fu Gado. Poti prakseri na a fasi fa a libi fu den e waka, so taki unu kan teki wan eksempre na a bribi fu den.

8 Esde, tide èn fu ala ten Yesus Krestes na a srefi.

9 No meki sma drai un ede nanga ala sortu leri di unu no sabi. A moro betre fu kisi krakti fu den bun di Gado e du gi wi, leki fu meki n’nyan* gi wi krakti, fu di den sani dati no e tyari wini kon gi den sma di e prakseri dati w’wan.

10 Den sma di e du santa wroko na a tenti no abi a reti fu nyan den sani di de na tapu na altari di wi abi. 11 Bika baka te a granpriester tyari a brudu fu meti go na ini a santa presi leki wan sondu-ofrandi, dan den e tyari den skin fu den meti dati go bron na dorosei fu a kampu. 12 Dati meki Yesus ben pina na dorosei fu a portu fu a foto tu, so taki a ben kan meki a pipel kon santa nanga en eigi brudu. 13 Sobun, meki wi go na en na dorosei fu a kampu èn meki wi tyari a syen di a ben tyari. 14 Wi sabi taki wi no abi wan foto dyaso di e tan fu ala ten, ma wi e angri fu si a foto di musu kon ete. 15 Meki wi prèise Gado ala ten nanga yepi fu Yesus. Na a fasi disi wi e tyari wan ofrandi gi Gado nanga wi mofo,* te wi e ferteri ala sma fu a nen fu en. 16 Boiti dati, un no musu fergiti fu du bun èn fu prati san unu abi nanga trawan, bika Gado e prisiri nanga den sortu ofrandi dati.

17 Arki den wan di e teki fesi na un mindri èn saka unsrefi na den ondro, bika na den e luku unu leki sma di o abi fu gi Gado frantwortu fu san den e du. Dan den o sorgu unu nanga prisiri èn no nanga geme, bika disi no ben o bun gi unu.

18 Tan begi gi wi, bika wi sabi taki wi abi wan krin* konsensi, fu di wi wani du ala sani nanga wan krin ati. 19 Ma mi e aksi unu grantangi fu tan begi gi mi so taki mi kan drai kon baka na unu moro esi.

20 A Gado fu freide meki wi Masra Yesus, kon na libi baka. En na wi bigi skapuman èn a abi a brudu fu wan têgo ferbontu na en. We, meki a Gado disi 21 gi unu ala bun sani, so taki unu kan du a wani fu en. A meki Yesus Krestes yepi wi fu du ala san a feni bun. Na Gado musu kisi glori fu têgo, ja, fu ala ten. Amen.

22 Now mi e begi unu, brada nanga sisa, arki nanga pasensi te unu e yere den sani di mi skrifi fu gi unu dek’ati, fu di mi skrifi unu wan syatu brifi. 23 Mi wani fu unu sabi taki wi brada Timoteyus kmoto na straf’oso kba. Efu a kon dya esi, dan mi nanga en o kon luku unu.

24 Taki ala den wan di e teki fesi na un mindri odi gi mi èn owktu ala den tra santawan. Den wan di de na Italiakondre e seni taki unu odi.

25 Meki Gado sori un alamala bun-ati.