Esekièl
26 Na a fosi dei fu a mun na ini a di fu 11 yari, Yehovah taigi mi: 2 „Manpkin fu libisma, Tirus taki fu Yerusalem: ’Ai! A foto pe ala den pipel ben lobi fu go, broko! Sani o waka bun gi mi. Now di a foto disi kisi pori, mi o kon gudu.’ 3 Dati meki a Moro Hei Masra Yehovah taki: ’Tirus, mi o strafu yu èn mi o tyari furu kondre kon feti nanga yu, neleki fa a se e tyari furu skwala kon. 4 Den o broko den skotu nanga den toren fu Tirus. Mi o krabu a doti fu en puru èn mi o meki a tron wan bigi ston pe noti no de na tapu. 5 A o tron wan presi pe sma e drei fisinèt na mindri fu a se.’
’Na mi taki dati,’ na so a Moro Hei Masra Yehovah taki, ’èn den pipel o fufuru den sani fu en tyari gwe. 6 Nanga fet’owru den o kiri den sma na ini den pkin foto* fu en di de na a syoro. Sma sa musu fu sabi taki mi na Yehovah.’
7 Disi na san a Moro Hei Masra Yehovah taki: ’Mi o meki Kownu Nebukadnesar* fu Babilon kon feti nanga Tirus. Nebukadnesar na kownu fu den kownu. A o kmoto na noordsei nanga asi, fetwagi, srudati di e rèi asi èn nanga wan bigi legre.* 8 A o broko den pkin foto fu yu di de na a syoro. A o bow wan skotu lontu yu èn a o meki wan dan. A o kon nanga bigi schild fu feti nanga yu. 9 Nanga bigi fetwagi* a o broko den skotu fu yu èn nanga aksi* a o naki den toren fu yu broko. 10 A o kon nanga so furu asi taki a heri presi o tapu nanga stof. Te a o psa kon na ini den portu fu yu, dan a b’bari fu den srudati nanga den wiel fu den fetwagi o seki den skotu fu yu. A o de neleki te sma e hari go na ini wan foto di abi broko skotu. 11 Den asi fu en o trapu ala den strati fu yu broko. A o kiri yu pipel nanga fet’owru. Den tranga pilari fu yu o fadon na gron. 12 Den gudu fu yu nanga den sani di yu e seri, den o fufuru tyari gwe. Den o broko den skotu nanga den moi oso fu yu. Den o trowe den ston, den udusani nanga ala a doti go na ini a watra.’
13 ’Mi o tyari wan kba kon na den singi fu yu èn a b’bari fu den harpu fu yu no o de fu yere moro. 14 Mi o meki yu tron wan bigi ston pe noti no de na tapu. Yu o tron wan presi pe sma e drei fisinèt. Noiti moro sma o bow yu baka, bika na mi, Yehovah, taki so.’ Na dati a Moro Hei Masra Yehovah taki.
15 Disi na san a Moro Hei Masra Yehovah taigi Tirus: ’Te yu o fadon, te den sma di de fu dede o geme èn te den o kiri den sma na ini a kondre fu yu, dan den èilanti o seki. 16 Den granman* fu se o saka kmoto fu den kownusturu èn den o puru den dyakti nanga den moi borduur krosi fu den. Den o beifi. Den o sdon na gron èn doronomo den o beifi. Den o luku yu nanga opo mofo. 17 Den o singi wan sari singi gi yu èn den o taigi yu:
„Yu ben de so wan pôpi foto. Sma ben e kon na yu nanga sipi fu kon libi drape.
Yu nanga den sma di e libi na ini yu ben abi furu makti na tapu se.
Unu ben meki ala sma na grontapu kon frede. Ma now yu kisi pori!
18 Den èilanti o beifi te yu o kisi pori.
Den èilanti di de na ini a se o bruya te den si taki yu no de moro.”’
19 Disi na san a Moro Hei Masra Yehovah taki: ’Mi o meki a foto fu yu tron wan brokopresi neleki den foto pe nowan sma e tan na ini. Mi o tyari frudu kon na yu tapu èn mi o sungu yu nanga furu watra. 20 Neleki den trawan mi o meki yu saka go na ini grebi-olo, pe den sma fu owruten de kba. Mi o meki yu tan na ini a moro lagi presi makandra nanga den tra presi di ben kisi pori langa ten psa èn makandra nanga ala tra sma di de na ini grebi-olo kba. Dan sma no o tan na ini yu moro. Ma mi o gi grani na* a kondre fu den sma di de na libi.
21 Sondro fu yu ferwakti dati, mi o meki rampu kon na yu tapu. Yu no o de moro. Sma o suku yu, ma den no o feni yu noiti moro’, na so a Moro Hei Masra Yehovah taki.”