Hosea
9 „Israel, yu no musu prisiri.
No prisiri leki den tra pipel.
Na a hurulibi fu yu meki yu drai baka gi yu Gado.
Yu lobi den sani di sma e gi yu fu a huru di yu e huru na ala den gron pe sma e masi aleisi.
2 Yu no o feni n’nyan na a gron pe sma e masi aleisi. Yu no o feni win tu na a presi pe sma e meki win.
Yu o sari fu di yu no abi nyun win moro.
3 A pipel no o tan na ini a kondre fu Yehovah.
Ma Efrayim o drai go baka na Egepte.
Na ini Asiria den o nyan sani di no krin.
4 Den no o kanti win leki ofrandi gi Yehovah moro.
A no o breiti nanga den srakti-ofrandi fu den.
Den ofrandi o de leki a n’nyan di sma e nyan te den e row.
Ala den sma di o nyan en, no o de krin.
A n’nyan dati na gi den srefi.
Den no o tyari en go na ini na oso fu Yehovah.
6 A pipel o abi fu lowe gwe libi a kondre fu di sma o pori a kondre.
Na Egepte sma o tyari den kon makandra èn na Memfis sma o beri den.
Krasi-w’wiri o gro na tapu den diri solfru sani fu den
èn makabusi o gro na ini den tenti fu den.
7 Wan ten o kon te Gado o strafu den
èn wan ten o kon te a o pai den fu den ogri di den e du.
Den sma fu Israel o sabi te a ten dati doro.
A profeiti fu den o gersi wan donman èn a man di e taki dati a e tyari boskopu fu Gado, o gersi wan lawman.
Bika yu e du soso ogri èn furu sma abi bita-ati gi yu.”
8 A waktiman fu Efrayim ben de nanga mi Gado.
Ma now den profeiti fu en de leki wan val di e fanga fowru.
Soso bita-ati de na ini na oso fu a Gado fu a profeiti.
9 A pipel sungu go dipi na ini den ogri di den du, neleki den sma di ben e libi na Gibeya fosi.
Gado o memre den ogri di den e du èn a o strafu den gi den sondu di den e du.
10 „Di mi feni Israel, a ben de leki droifi na ini a sabana.
Mi ben e si den afo fu unu leki den fosi figa fu wan figabon.
Ma den go na a Bâal fu Peor
èn den gi densrefi abra na a gado dati di no warti noti.
Den doti densrefi leki a fisti sani di den lobi.
11 A glori fu Efrayim frei gwe leki wan fowru.
Dati meki nowan uma e meki pkin, nowan uma de nanga bere èn nowan uma man teki bere.
12 Ma srefi efu den e kweki pkin,
mi o kiri den alamala teleki nowan sma no de moro.
Iya, bigi ogri o miti den te mi drai baka gi den!
13 Di Efrayim ben de leki wan bon di prani na ini wan weigron, mi ben feni taki a gersi Tirus.
Ma now Efrayim o tyari den manpkin fu en go meki sma kiri den.”
14 Yehovah, grantangi, gi den san den musu kisi.
Sorgu taki den uma lasi bere èn taki den no man gi den pkin fu den bobi.*
15 „Na Gilgal den ben e du ala den ogri fu den. Dati meki mi kon abi bita-ati gi den drape.
Mi o yagi den gwe fu mi oso fu di den e du soso ogri.
Mi no o lobi den moro.
Ala den granman fu den tranga-ede.
16 Den o koti Efrayim trowe leki wan bon.
A rutu fu en o kon drei èn a no o meki froktu.
Srefi efu a kisi pkin, mi o kiri den pkin dati di a lobi so te.”
17 Mi Gado o drai baka gi a pipel disi,
bika den no arki en.
Den o tron loweman na mindri den tra pipel.