Esekièl
30 Baka dati Yehovah taigi mi: 2 „Manpikin fu libisma, taki profeititori. Yu musu taki: ’Disi na san a Moro Hei Masra Yehovah taki: „Un pipel, un musu bari krei èn un musu taki: ’A dei e kon!’ 3 Bika a dei de krosibei, iya, a dei fu Yehovah de krosibei. Dungru wolku o de fu si na a dei dati. A o de wan ten pe den pipel o kisi krutu. 4 Sma o kon feti nanga Egepte. Den sma fu Etiopia o firi hebi pen te sma o fadon dede na ini Egepte èn te den feanti o tyari ala den gudu fu den Egeptesma gowe èn te den o broko den fondamenti fu den. 5 Sma o kiri den sma fu Etiopia, Put, Lud, Kub, ala den sma fu den tra kondre, nanga den sma fu Israel di de na ini wan frubontu. Iya, sma o kiri den alamala nanga feti-owru, makandra nanga Egeptesma.”’
6 Disi na san Yehovah taki: ’Den sma di ben yepi Egepte o fadon tu. Egepte o lasi den sani di ben meki taki a tranga èn di ben meki taki a abi heimemre.’
’Nanga feti-owru den feanti o kiri den sma fu Egepte di e tan na ini a heri kontren fu Mikdol te go miti Sewene’, na so a Moro Hei Masra Yehovah taki. 7 ’Mi o meki Egepte tron wan presi di broko neleki den tra brokopresi. Den foto fu en o kon de leki den tra foto pe nowan sma e tan. 8 Te mi bron Egepte èn te mi kiri ala den yepiman fu en, dan den o sabi taki mi na Yehovah. 9 Na a dei dati den boskopuman o gowe nanga den sipi, fu frede Etiopia di e frutrow tumusi tapu ensrefi. Te rampu miti Egepte, dan Etiopia o firi hebi pen. A ten dati o kon nomonomo.’
10 Disi na san a Moro Hei Masra Yehovah taki: ’Mi o meki Kownu Nebukadresar fu Babilon kiri a pipel fu Egepte. 11 Mi o tyari en nanga en pipel kon, iya, den ogri-ati sma fu tra kondre, meki den pori a kondre. Den o hari den feti-owru fu feti nanga den Egeptesma èn den o furu a kondre nanga sma di den kiri. 12 Mi o drei den kriki fu Nijl-liba. Mi o seri a kondre gi ogri sma èn sma di unu no sabi o meki a heri kondre tron wan brokopresi. Na mi, Yehovah, taki disi.’
13 A Moro Hei Masra Yehovah taki: ’Mi o pori den fisti gado fu den èn mi o meki taki nowan soso gado no de moro na ini Nof. Nowan Egeptesma o de edeman na ini a kondre moro. Mi o meki ala sma na ini Egepte frede. 14 Mi o meki Patros tron wan brokopresi, mi o bron a foto Sowan èn mi o strafu a foto No. 15 Mi o puru atibron na tapu Sin, a fortresi fu Egepte. Mi o kiri den sma fu a foto No. 16 Mi o bron Egepte. Den sma fu Sin o abi hebi pen. Sma o naki olo na ini den skotu fu No èn den o teki en abra. Na deiten, feanti o kon feti nanga a foto Nof! 17 Nanga feti-owru sma o kiri den yonkuman fu den foto On nanga Pi-Beset. Sma o tyari den sma fu den foto go na ini katibo. 18 Na deiten a o dungru na ini Tekafnekes te mi o broko den tyatyari fu Egepte. A heimemre di Tekafnekes ben abi èn den sani di ben meki taki a tranga, no o de moro. Ma wolku o tapu Tekafnekes èn sma o tyari den sma na ini den pikin foto krosibei fu en, go na ini katibo. 19 Mi o strafu den sma na ini Egepte. Den sa musu fu sabi taki mi na Yehovah.’”
20 Na a di fu seibi dei fu a fosi mun na ini a di fu erfu yari, Yehovah taigi mi: 21 „Manpikin fu libisma, mi o broko na anu fu Farao, a kownu fu Egepte. Sma no o tai en anu gi en nanga wan krosi fu meki a kon betre èn a no o kon tranga baka fu hori wan feti-owru.”
22 „Dan a Moro Hei Masra Yehovah taki: ’Mi o strafu Farao, a kownu fu Egepte. Mi o broko den anu fu en. Iya, mi o broko a tranga anu èn a wan di broko kaba, dan mi o meki a feti-owru fadon komoto na ini en anu. 23 Mi o panya den Egeptesma go na den mindri den pipel èn mi o yagi den go na tra kondre. 24 Mi o meki na anu fu a kownu fu Babilon kon tranga èn mi o gi en mi feti-owru. Mi o broko den anu fu Farao èn leki wan sma di kisi hebi mankeri a o geme furu na fesi a kownu. 25 Mi o meki den anu fu a kownu fu Babilon kon tranga èn den anu fu Farao o fadon. Den sa musu fu sabi taki mi na Yehovah te mi gi a kownu fu Babilon mi feti-owru èn te a o langa en fu go feti nanga Egepte. 26 Mi o panya den Egeptesma go na mindri den pipel èn mi o yagi den go na tra kondre. Den sa musu fu sabi taki mi na Yehovah.’”