Yob

 4 Nanga suma yu e taki?

Pe yu kmoto nanga den denki disi?*

 5 Den dedewan di no man du noti, e beifi.

Den lagi moro a se nanga ala sani di e libi na ini.

 6 Gado* man si ala sani di de na ini Grebi.*

A presi pe sani e pori,* no tapu gi en.

 7 A bradi a noordsei fu hemel na wan presi pe noti no de*

èn a anga grontapu na noti.

 8 A domru watra na ini den wolku fu en.

Ma awinsi fa den wolku kon hebi, tòg den no e priti opo.

 9 A e bradi den wolku na tapu en kownusturu,

so taki sma no man si dati.

10 A hari wan strepi* na mindri hemel nanga se.

A prati leti nanga dungru.

11 Den pilari fu hemel e seki

èn den e beifi te a e opo en sten.

12 Nanga en krakti a seki a se

èn nanga en koni a naki a bigi meti na ini se* panya.

13 Nanga en blo* a e figi hemel kon krin

èn nanga en anu a boro a sneki di yu no man kisi makelek.*

14 Disi na soso wan tu sani di a man du.

Na pkinso nomo wi yere fu en!