Mateyus skrifi en

6 Te unu e du bun, un musu luku bun taki unu no e du en fu sma si. Bika te unu e du dati, unu no o kisi pai fu un P’pa di de na hemel. 2 Fu dati ede, te unu e du pôtisma wan bun, dan no panya a tori na ala sei leki fa den hoigriman e du na ini den snoga èn tapu strati fu sma prèise den. Mi e taigi unu: Den kisi den pai kba. 3 Ma te yu e du pôtisma wan bun, dan no meki yu kruktu-anu sabi san yu ret’anu e du. 4 Sma no abi fu sabi taki yu du pôtisma wan bun. Yu P’pa di yu no man si, ma di e si ala sani, o pai yu baka.

5 Te unu e begi, un no musu de leki den hoigriman. Bika den lobi tnapu e begi na ini den snoga èn na tapu den uku fu den bigi strati, so taki sma kan si den. Mi e taigi unu: Den kisi den pai kba. 6 Ma te yu wani begi, go na ini yu kamra, tapu yu doro, dan yu begi yu P’pa di sma no man si. Yu P’pa di yu no man si, ma di e si ala sani, o pai yu baka. 7 Te yu e begi, no taki den srefi sani ibri leisi baka leki fa den trakondre sma e du, bika den e prakseri taki Gado o arki den efu den e taki furu sani. 8 Sobun, no de leki den, bika Gado un P’pa sabi san unu abi fanowdu, srefi fosi unu aksi en.

9 Fu dati ede un musu begi so:

’Wi Papa na hemel, meki yu nen kon santa.* 10 Meki yu Kownukondre kon. Meki yu wani psa na grontapu soleki fa a e psa na hemel. 11 Gi wi a brede di wi abi fanowdu gi a dei disi. 12 Gi wi pardon fu den sondu* fu wi, leki fa wi e gi tra sma pardon di du wan sondu teige wi. 13 Yepi wi fu no sondu te tesi miti wi, ma ferlusu wi fu na ogriwan.’

14 Efu unu e gi sma pardon fu den sondu fu den, dan un P’pa na hemel o gi unu pardon tu. 15 Ma efu unu no e gi sma pardon fu den sondu fu den, dan un P’pa no o gi unu pardon fu den sondu fu unu.

16 Te unu e faste,* dan no poti wan sari fesi moro, leki fa den hoigriman e du, bika den e masi den fesi* so taki sma kan si taki den e faste. Mi e taigi unu: Den kisi den pai kba. 17 Ma te yu e faste, dan lobi oli gi yu ede èn wasi yu fesi, 18 so taki sma no abi fu si taki yu e faste. Na soso yu P’pa di sma no man si, musu sabi dati. Dan yu P’pa di yu no man si, ma di e si ala sani, o pai yu baka.

19 No kibri gudu moro na grontapu pe woron nanga frustu kan pori en èn pe fufurman kan kon fufuru en. 20 Ma kibri yu gudu na ini hemel pe woron nanga frustu no man pori en èn pe fufurman no man go fufuru en. 21 Bika pe yu gudu de, na drape yu ati o de tu.

22 A lampu fu a skin na a ai. Fu dati ede, efu yu ai e luku wán sani nomo,* dan yu heri skin o brenki.* 23 Ma efu yu ai e luku omeni tra sani,* dan yu heri skin o dungru. Efu a leti na ini yu kon dungru, dan a no spotu dungru o de ini yu!

24 Nowan sma kan de wan srafu fu tu basi. Bika a o teige a wan basi èn lobi a trawan, noso a o horbaka gi a wan èn wiswasi a trawan. Unu no kan dini Gado èn dini Gudu na a srefi ten.

25 Mi e taigi unu: No broko un ede moro nanga un libi,* nanga san unu o nyan noso san unu o dringi noso san unu o weri na un skin. A libi prenspari moro leki n’nyan èn a skin prenspari moro leki krosi, a no so? 26 Luku den fowru di e frei na loktu bun. Den no e sai siri, den no e koti n’nyan èn den no e kibri n’nyan na ini maksin. Tòg un P’pa na hemel e gi den n’nyan. Unu no warti moro den? 27 Suma fu unu kan meki en libi kon pkinso* moro langa te a e broko en ede? 28 Fu san ede unu e broko un ede nanga san unu o weri? Leri wan sani fu den leilibromki na ini a sabana èn luku fa den e gro. Den no e wroko tranga èn den no e meki krosi. 29 Ma mi e taigi unu taki srefi Kownu Salomo di ben abi someni glori no ben weri so moi leki wan fu den bromki disi. 30 Gado e meki den sani di e gro na ini a sabana weri so moi, aladi den sani disi de tide, ma tamara sma e trowe den go na ini na onfu. Dati meki un kan de seiker taki a o gi unu krosi fu weri. Fu san ede unu bribi swaki so? 31 Fu dati ede, noiti un musu broko un ede èn un no musu taki: ’San wi o nyan?’ noso ’San wi o dringi?’ noso ’San wi o weri?’ 32 Ala den sani disi na san den grontapusma e feti fu kisi. Ma un P’pa na hemel sabi taki unu abi ala den sani disi fanowdu.

33 Fu dati ede, tan poti a Kownukondre nanga Gado en retidu na a fosi presi na ini un libi, dan unu o kisi ala den tra sani tu. 34 Sobun, noiti un musu broko un ede nanga tamara, bika tamara o abi en eigi brok’ede. Ibri dei abi en eigi problema.