Tori fu den apostel
26 Agrepa taigi Paulus: „Yu kan opo taki gi yusrefi.” Ne Paulus langa en anu èn a bigin taki:
2 „Kownu Agrepa, mi breiti taki mi kan opo taki gi misrefi na fesi yu tide fu sori taki den sani di den Dyu e taki fu mi no tru, 3 spesrutu fu di yu sabi heri bun sortu gwenti nanga kesekese den Dyu abi. Fu dati ede mi e begi yu fu arki mi nanga pasensi.
4 Ala den Dyu sabi fa mi ben e libi na mindri mi pipel èn na ini Yerusalem, sensi di mi yongu. 5 Den Dyu disi sabi mi bun langa kba. Efu den ben wani, den ben kan taigi yu taki fosi, mi ben de wan Fariseiman èn den sma dati e hori den wet fu a bribi fu wi moro fini leki ala tra Dyu. 6 Ma now sma tyari mi na fesi krutu fu di mi abi a howpu taki Gado o du den sani di a pramisi den afo fu wi. 7 Den 12 lo fu wi e howpu tu fu kisi a sani di Gado pramisi den. Dati meki den e anbegi Gado fayafaya dei nanga neti. Kownu, na fu di mi abi a howpu disi, meki den Dyu e taki ogri fu mi.
8 Fu san ede unu no wani bribi taki Gado e gi den dedewan wan opobaka? 9 Mi srefi ben abi a tranga bribi taki mi ben musu du ala san mi man fu gens den bakaman fu Yesus fu Nasaret.* 10 Na dati mi ben e du na ini Yerusalem. Mi ben poti furu fu den santawan na straf’oso, fu di den edeman fu den priester ben gi mi primisi fu du dati. Mi ben feni en bun te sma ben wani kiri den. 11 Furu tron mi du ogri nanga den na ini ala den snoga fu meki den libi a bribi fu den. Fu di mi ati ben e bron nanga den srefsrefi, meki mi ben wani du ogri nanga den na ini tra foto tu.
12 Na dati mi ben o go du na Damaskus, fu di mi ben kisi a makti nanga a primisi fu den edeman fu den priester fu du dati. 13 Kownu, di mi ben de na pasi na brekten yuru, mi si wan leti koti kmopo fu hemel. A ben e brenki moro a leti fu a son èn a ben e skèin lontu mi èn lontu den sma di ben de nanga mi. 14 Di wi alamala fadon na gron, mi yere wan sten taigi mi na ini Hebrewtongo: ’Saul, Saul, fu san ede yu e suku fu du ogri nanga mi? Yu e meki en moro muilek gi yusrefi te yu e tan feti teige mi, neleki te wan kaw e skopu a tiki fu en basi.’ 15 Ma mi taki: ’Masra, suma na yu?’ Ne Masra taki: ’Mi na Yesus, a sma di yu wani du ogri. 16 Ma opo tnapu. Mi sori misrefi na yu, bika mi wani taki yu wroko gi mi èn mi wani taki yu de mi kotoigi. Yu musu ferteri sma fu den sani di yu si èn fu den sani* di mi o sori yu ete. 17 Mi o ferlusu yu fu a pipel disi èn fu den trakondre sma pe mi o seni yu go. 18 Yu musu opo den ai, yu musu meki den kmopo na ini a dungru fu kon na ini a leti, èn yu musu meki den kmopo na ondro a makti fu Satan fu kon na Gado. Na so den kan kisi pardon fu sondu èn den kan kisi den sani di Gado e gi den sma di kon santa, fu di den e bribi na ini mi.’
19 Sobun, Kownu Agrepa, mi du san mi si na ini a fisyun fu hemel. 20 Mi go na den sma fu Damaskus fosi. Baka dati mi go na Yerusalem, na ini a heri kontren fu Yudea èn na den sma di no de Dyu. Mi ben tyari a boskopu gi den taki den musu abi berow, taki den musu go dini Gado baka èn taki den musu du sani di e sori taki den abi berow. 21 Dati meki den Dyu grabu mi na ini a tempel èn den pruberi fu kiri mi. 22 Ma fu di Gado yepi mi, meki mi tan ferteri a bun nyunsu na heihei sma nanga mofina sma te na a dei fu tide. Mi e taki soso san den buku fu den Profeiti nanga Moses ben taki na fesi. 23 Den ben taki dati Krestes ben o pina èn a ben o de a foswan di kisi wan opobaka. A ben o preiki èn a ben o tyari leti kon gi den Dyu nanga den trakondre sma.”
24 Paulus ben e ferteri ete fu san ede a no fowtu, di Festus taki nanga wan tranga sten: „Yu e law, Paulus! Den kfalek sani di yu leri meki yu lasi yu ferstan!” 25 Ma Paulus taki: „Mi no e law, Lespeki Festus. Mi e taki tru tori èn mi de nanga krin ferstan. 26 Kownu sabi den sani disi heri bun. Dati meki mi no e frede fu taki nanga en. Mi de seiker taki a sabi ala den sani disi, fu di nowan fu den psa kibrikibri. 27 Kownu Agrepa, yu e bribi na ini den buku fu den Profeiti? Mi sabi taki yu e bribi.” 28 Ma Agrepa taigi Paulus: „Dalek yu o meki mi tron wan Kresten tu!” 29 Ne Paulus taki: „Mi e begi Gado taki heri esi noso baka wan pisi ten, a no yu w’wan, ma ala den sma di e arki mi tide tron leki mi, ma sondro den bui disi.”
30 Ne a kownu opo. A granman, Bernise nanga den man di ben e sdon nanga den opo tu. 31 Ma di den ben e gwe fu drape, den taigi makandra: „A man disi no e du noti fu kisi dedestrafu noso fu koti strafu.” 32 Agrepa taigi Festus tu: „Efu a man disi no ben aksi fu Grankownu krutu en, a ben kan lusu kba.”