Gi den Hebrewsma

1 Langa ten psa kba, Gado ben meki den profeiti ferteri den afo fu wi den boskopu fu en na furu okasi èn na furu fasi. 2 Ma now, na a kba fu a ten disi, a meki en Manpkin ferteri wi den boskopu fu en. A poti a Manpkin disi leki a sma di o kisi ala sani. Nanga yepi fu en a meki den sani na hemel èn na grontapu.* 3 A glori fu en na a glori fu Gado. A de precies leki fa Gado de. Den wortu fu en abi krakti èn den e meki taki ala sani e tan leki fa den de. Baka di a krin wi fu den sondu fu wi, a go sdon na a ret’anu fu a Moro Heiwan di de na den moro hei presi. 4 Na so a kon hei moro den engel, fu di a kisi wan nen di bigi moro a nen fu den.

5 Fu eksempre, sortwan fu den engel Gado taigi wan leisi: „Yu na mi manpkin. Tide mi tron yu p’pa”? Noso: „Misrefi o tron en p’pa èn a o tron mi manpkin”? 6 Ma te Gado e tyari a Fosi Manpkin fu en kon baka na grontapu, a e taki: „Meki ala den engel fu Gado boigi gi en fu gi en grani.”

7 Fu den engel a e taki tu: „A e meki den engel fu en tron yeye di abi furu krakti èn a e meki den dinari fu en de leki wan faya.” 8 Ma fu a Manpkin a e taki: „Gado na yu kownusturu fu ala ten, ja, fu têgo.* Nanga a kownutiki fu yu Kownukondre yu e tiri na wan reti fasi. 9 Yu lobi retidu. Yu no lobi ogridu kwetkweti. Dati meki Gado, ja, a Gado fu yu, salfu yu nanga oli, so taki yu kan prisiri moro leki den tra kownu.” 10 A e taki tu: „Mi Masra, na a bigin yu seti den fundament fu grontapu. Nanga yu eigi anu yu meki hemel. 11 Den sani dati o lasi gwe, ma yu o tan fu ala ten. Den alamala o kon owru neleki wan krosi. 12 Yu o domru den kon na wán neleki wan dyakti. Yu o kenki den neleki krosi. Ma yu e tan a srefi èn noiti a libi fu yu o kon na wan kba.”

13 Ma fu sortwan fu den engel Gado taki wan leisi: „Sdon na mi ret’anusei, teleki mi poti yu feanti leki wan bangi gi yu futu”? 14 Den alamala na yeye di musu du santa wroko èn di Gado seni kon fu dini den sma di o kisi ferlusu.