A brifi fu Yudas
1 Disi na wan brifi fu Yudas, wan srafu fu Yesus Krestes èn wan brada fu Yakobus. A brifi disi na gi den sma di wi Gado nanga wi P’pa kari èn di a lobi. A kibri den fu di den na fu Yesus Krestes.
2 Meki Gado sori unu moro sar’ati nanga lobi èn meki a gi unu moro freide.
3 Mi lobi brada nanga sisa, mi ben wani skrifi unu wan brifi fu taki fu a ferlusu di wi alamala o kisi. Ma now mi si taki a de fanowdu fu skrifi unu wan brifi fu gi unu a dek’ati fu feti tranga gi a tru leri. Den santawan ben kisi den leri disi wán leisi nomo èn den leri disi o tan fu ala ten. 4 Mi e skrifi unu fu di wan tu man di no e lespeki Gado boro kon na un mindri. Langa ten kba Gado Buku ben taki dati Gado ben o strafu den sortu man disi. Den e teki a bun-ati fu wi Gado leki wan okasi fu du ogri sondro fu syen* èn a de krin taki den no e horbaka gi Yesus Krestes, a wan-enkri sma di bai wi èn di de wi Masra.*
5 Unu sabi ala den sani disi kba, ma tòg mi wani memre unu na a sani disi: Yehovah* ben fri en pipel fu a kondre Egepte, ma bakaten a kiri den sma di no ben abi bribi. 6 Yu ben abi engel tu di drai baka gi a libi di Gado ben seti gi den sensi a bigin èn di gwe libi a tanpresi fu den. Dati meki Gado tai den nanga keti di no man broko èn a hori den na ini bigi dungru teleki den o kisi krutu na a bigi dei. 7 Na so a ben de tu nanga Sodom nanga Gomora èn den foto di ben de krosbei fu den. Den sma drape ben e libi wan morsu sekslibi* èn den ben gridi fu abi seks na wan fasi di no fiti. Gado strafu den nanga faya di no man dede. Na so den kon de leki wan warskow gi wi.
8 Aladi dati de so, tòg den man disi abi takru denki ala ten,* den e libi wan morsu sekslibi* èn den no abi nowan lespeki gi den sma di e tiri. Boiti dati, den e taki ogri fu den sma di musu kisi grani. 9 Wan leisi a gran engel* Mikael ben e hartaki nanga Didibri fu a dedeskin fu Moses. Ma a no ben denki srefi fu krutu noso kosi Didibri. A ben taki nomo: „Yehovah* musu strafu yu.” 10 Ma den sma disi e taki ogri fu ala sani di den no e ferstan. San den e ferstan na san den e firi èn den e du leki meti di no man denki. Den sani di den e du e meki taki den e pori den eigi libi.
11 Bigi ogri o miti den, bika soso fu kisi gudu den waka a pasi fu Kain èn den feti fu go du den srefi ogri di Bileam ben du. Neleki Korak, den o lasi den libi fu di den e taki sani fu gens den sma di e tiri den. 12 Te den sma disi e kon na den fesa* fu unu den de leki bigi ston di kibri na ondro watra. Den na skapuman di no abi nowan syen. Den e prakseri den eigi bere nomo. Den na wolku di no abi watra, wolku di winti e wai go-kon. Den na bon di no e gi froktu te a ten fu den doro. Iya, den na bon di dede tu leisi* èn di rutu puru. 13 Den na skwala fu wan krasi se di e meki den eigi syen kuku kon na loktu leki skuma. Den na stari di no e waka wán pasi nomo èn fu têgo den o tan na ini a moro dungru presi di de.
14 Heinok, a di fu seibi afo te yu e teri kmoto fu Adam, ben taki profeititori fu den tu. A ben taki: „Luku, Yehovah* ben kon nanga den dusundusun* santawan fu en 15 fu krutu ala sma. A o strafu den sondari fu di den e du wan lo ogri èn den e taki wan lo ogri fu en tu.”
16 Den sma disi gwenti krutukrutu, den no lobi a fasi fa den libi e waka èn den e du nomo san den firi. Den e dyaf nanga den mofo èn den e prèise sma, soso fu kan kisi wini gi densrefi.
17 Ma mi lobi brada nanga sisa, prakseri den sani di den apostel fu wi Masra Yesus Krestes ben taki.* 18 Prakseri taki den ben gwenti fu taigi unu: „Na ini den lasti dei, spotuman o de di o du ala sortu ogri di den e firi fu du.” 19 Na den sma disi e tyari prati kon. Den e du leki meti èn den no abi a yeye fu Gado. 20 Mi lobi brada nanga sisa, meki a santa bribi fu unu yepi unu fu kon moro tranga èn begi nanga santa yeye. 21 Te unu e du dati, dan Gado o tan lobi unu. Na a srefi ten un musu tan wakti teleki wi Masra Yesus Krestes sori unu sar’ati, so taki unu kan kisi têgo libi. 22 Boiti dati, tan sori sar’ati gi den sma di e tweifri. 23 Hari den puru na ini a faya, so taki den kan kisi ferlusu. Tan sori sar’ati gi trawan, ma un musu luku bun san unu e du. Srefi a krosi fu den un musu frede fu fasi fu di den flaka den krosi nanga a sondu libi fu den.
24 Gado man kibri unu fu no fadon èn fu de sondro fowtu. Na so unu kan de nanga bigi prisiri na fesi Gado di abi glori. 25 En na a wan-enkri Gado èn wi Ferlusuman. Na en meki wi Masra Yesus Krestes ferlusu wi. Na Gado abi a glori, a grani, a makti nanga a reti fu tiri. Disi de so sensi owruten, a de so now èn a o tan so fu têgo. Amen.